Obadiya 1 - Ibbaibele 1963

Zibi zyaba-Edomu nzibabisizya ba-Israyeli

¹ Nceeci cilengano ca-Obadiya. Mbuboobu mbwaamba Mwami Jehova aa-Edomu. Twaswiilila impuwo iizwa kuli-Jehova. Kwatumwa mu­ tumwa akati kabamasi. Uti, Amubuke, twiinke kuyoomulwisya.

² Bona! Ndimucesezye akati kabamasi. Ulisampukide loko.

³ Kulisumpula kwamoyo wako kwakweena, uwe nokede mukati kaŋanzi zyamandomba, noli acikalilo cakujulu, noamba mumoyo wako kuti, Ngwani uukonzya kundiselusya ansi?

⁴ Nekuba kuti utante kujulu mbuli insika, akuyaka citeente cako akati kanyenyeezi, akooko njookuselusya, mbwaamba Jehova.

⁵ Ma! Ulisaalidwe! Nikwakali kuti babbi bakeza kulinduwe, nanka bafumpi beza masiku, sa teebakali kunoobba cakukuta buyo na? Nikwakali kuti wakasikilwa basikucela misaansa, sa teebakali kunoosiya micelocelo imwi na?

⁶ Pele Esau walangisigwa! Ziyandisi zyakwe zilondwedwe zilijanidwe.

⁷ Boonse mbotangene abo cizuminano bakutanda akumamanino aanyika. Boonse mbowakakede abo caluumuno bakweena, akukuzunda. Abo ibakalya insima kulinduwe bakuteya cigece. Walo taswiilili pe.

⁸ Mubuzuba obo, mbwaamba Jehova, sa nsikooyoonyonyweda ba-Edomu basongo, akumanina cilundu ca-Esau bupampu na?

⁹ Basintaze bako, O Temani, bayookanduka, aboobo bantu boonse bakucilundu ca-Esau bayoomana kujayigwa.

¹⁰ Nkaambo kabuvupi mbowavupula mnyoko Jakobo, bweeme buyookuvumba. Uyookosolwa cakutabuka limbi.

¹¹ Nkaambo mubuzuba obo niwakaimikila kumbali, bazwakule nibakasaala imbono zyakwe, bamasi nibakanjila munlilyango yakwe akuwaalila Jerusalemu cisolo, ayebo wakali mbubonya mbuli baabo.

¹² We! Utakondelelwi munyoko mubuzuba mbwaba mubuzike. Utasekeleli bana ba-Juda mubuzuba bwalunyonyooko lwabo. Utaambi cakulisumpula mubuzuba bwamapenzi aabo.

¹³ Utanjili mumulyango wabantu bangu mubuzuba bwamafwabi aabo. Utalangi ayebo cakukondwa mbubapenga mubuzuba bwamafwabi aabo, nikuba kutambika maanza kumbono zyabo mubuzuba bwamafwabi aabo.

¹⁴ Utaimikiti amaandaanino aanzila kuti ujaye abo bali mukuloboka, alimwi utaabi abo basyeede mubuzuba bwamapenzi.

¹⁵ Nkaambo buzuba bwa-Jehova buli afwiifwi. Bulasikila misyobo yoonse. Lino mbuli mbuwacita, ayebo uyoocitilwa mbubonya. Kubisya kwako kuyoobweeda amutwe wako omwini.

¹⁶ Nkaambo mbuli mbumunywide acilundu cangu cisalala, bamasi boonse bayoonywa mbubonya obo ciindi coonse. Bayoonywa akukolwa, elyo bayooba mbuli mbubatabede.

¹⁷ Pele mucilundu ca-Ziyoni muyooba inkamu lilobokede, iyoosalala, nkabela luzubo lwa-Jakobo luyoovuba imbono zyabo.

¹⁸ Luzubo lwaJakobo luyooba mulilo aluzubo lwa-Josefa luyooba mabangabanga, aluzubo lwa-Esau luyooba zisikosiko ziyumide. Bayoobatenta akubamaninizya, nkabela takukooyooba uusyaala muluzubo lwa-Esau, Mbwaamba Jehova.

¹⁹ Nkabela bana bakumusanza bayoovuba cilundu ca-Esau, abana batulundulundu bayoovuba nyika yaba-Filisti, alimwi bayoovuba myuunda yaEfraimu amyuunda ya-Samariya, abalo bana ba-Benjamini bayoovuba Gileadi.

²⁰ Basaale bankamu yabana ba-Israyeli bakede akati kaba-Kanana bayoovuba nyika mane kusikila ku-Zarefati, abasaale ba-Jerusalemu bakede mu-Sefaradi bayoovuba minzi yakumusanza.

²¹ Elyo kulasika bafutuli kucilundu ca-Ziyoni kuzoobeteka zilundulundu zya-Esau, abwami buyooba bwa-Jehova.