Judi 1 - Ibbaibele 1963

Injuzyo

¹ Ndime Juda, muzike wa-Jesu Kristo, kumwi ndi munyina Jakobo. Ndamujuzya nyoonse nomwakaitwa akuyandwa muli-Leza Taateesu akuyo-bwedwa Jesu Kristo.

² Amuvuzizigwe luzyalo aluumuno aluyando.

Ulabakombelezya kuti bakakatile kulusyomo lwabo. Makani aabaiyi babeji

³ Nomuyandwa, ndakalisungweede kumulembela makani aalufutuko ndotufutusigwa toonse, nywebo aswebo, nkabela lino moyo wangu wandisinikizya kumulembela akumukombelezya kuti mulwanine lusyomo ndobakapegwa basalali lomwe lwalyoonse.

⁴ Nkaambo kulisobelede akati kanu bamwi bantu, abakalembeledwe nkuko kale. Mbasikasampusampu, balasandula luzyalo lwa-Leza wesu kuba zisusi zibi, alimwi balatama Jesu Kristo, ngonguwe alike Simalelo wesu, Mwami wesu.

⁵ Lino ndayanda kumwiibalusya, nomwaazi kale oonse, kuti Jehova wakafutula cisi kuzwa kunyika ya-Egepita, pele kusule wakabanyonyoona batazumina.

⁶ Abalo baangelo abatakajatisya bwami bwabo bwakusaanguna pele bakabusia busena bwabo, wakabaanga azyaanzyo zitamani mumudima uusia mbi, kuti bakalindile mane kusikila kulubeteko lwabuzuba bupati.

⁷ Mbubonya obo Sodoma a-Gomora aminzi imwi iyakabambene ayo mbuyakabisya kukucita bwaamu akuba azisusi ziteelede, nkabela yakabikwa kuti ibe citondezyo cakuciswa kwaluumo lwamulilo uutamani.

⁸ Nokubaboobo aba basikulota-lota bacibisya mbubonya, balalisofwaazya kumibili, balaubaansya bwami akusampaula malemu.

⁹ Anu Mikayelo angelo simutwe, naakali kuzumanana a-Saatani akukazyanya mutunta wa-Musa, wakayoowa kumubeteka cakusampaula, wakaamba buyo kuti, Jehova akutapatile.

¹⁰ Pele abo balasampaula makani ngobatezi, alimwi makani ngobamvwa buyo mbuli banyama batajisi miyeeyo, balalibisya kulingao.

¹¹ Maawe kulimbabo, nkaambo kakuti baleenda munzila yaKaini, balitakaanya kumulandu wa-Balamu cakuyandaula lubono, nkabela bafwa mukukazyanya kwa-Kore.

¹² Aba bantu mbobali mabwe aayubide mumapobwe aanu, balapobola anywe cakutayoowa akulilela beni buyo. Makumbi buyo aatakwe maanzi aapepuluka amuuwo. Masamu aakunkumukide aatazyali micelo, aafwide kobile, aakazyulwa miyanda.

¹³ Mayuwe aalwizi aafutu Luka, alakovola bweeme bwao. Ntunyenyeezi tuendeenda buyo, twakayobwedwa mudinla uusia mbi uutamani.

¹⁴ Mbabonya aba mbaakasinsimina Enoki, kuli-Adamu. Wakati, wamusanu mubabili kuzwa Amubone! Jehova waboola abasalali bakwe abali myaanda yamyaanda

¹⁵ Weza kukubeteka boonse, Akubapa mulandu boonse basikasampusampu, Nkaambo kamasampu oonse ngobakasampaula Amajwi mayumu oonse ngobakaamba aanguwe basizibi basikasampusampu.

¹⁶ Aba bantu mbasyolausi, mbatongausi, abeenzegwa azisusi zyabo zibi. Milimo yabo ilaamba majwi aakulitunkula, nkabela balalangilila ziwa zyabantu kuti balivubye.

¹⁷ Pele nywebo nomuyandwa, amuyeeye majwi aakaambwa kalekale kumilomo yabaapostolo ba-Mwami Jesu Kristo,

¹⁸ nkaambo bakamwaambila kuti, kucindi camamanino kuyooba basabuzi, abeenzegwa muzisusi zyabo zyakasampusampu.

¹⁹ Mbambabo bacita mipampo mipampo. Mbasinyama buyo, tabajisi Muuya,

²⁰ Pele nywebo nomuyandwa, amuliyake mulusyomo lwanu lusalala cakwiinda, akukomba mu-Muuya Uusalala,

²¹ akuliyobola muluyando lwa-Leza cakulangilila lweetelelo lwa-Mwami wesu Jesu Kristo lutola kubuumi butamani.

²² Lino bamwi amubeetelele nokuba kuciindi ncobakazyanya anywe,

²³ bamwi mubafutule cakubakwempa kumulilo, abamwi amubeetelele cakuyoowa acakusesemwa niiba ingubo iisofweede amubili.

Kulumba kwakumamanino

²⁴ Lino kuliyooyo uukonzya kumukwabilila kukulebwa, akumusitikizya cakukondwa kubusyu bwabulemu bwakwe, kamutakwe akampenda,

²⁵ kuliLeza uuli alike, Mufutuli wesu, nkaambo ka-Jesu Kristo Mwami wesu, akube bulemu abupati anguzu abwami, kuzwa kumatalikilo, asunu, alyoonse mane kukabe kutamani. Ameni.