Joshua 1 - Ibbaibele 1963

Joshua mbwaakapegwa milimo yakwe

¹ Lino Musa mulanda wa-Jehova naakamana kufwa, Jehova wakaambila Joshua mwana wa-Nuni, similimo wa-Musa, wakati,

² Musa mulanda wangu wafwa. Lino buka, uzubuke oyu mulonga wa-Jordano, uwe abantu aba boonse, kuti muye kunyika ilya njinti bape bana ba-Israydi,

³ Kufumbwa antu aayoolyatwa andyato zyamaulu aanu njoomupa mpawo, mbubonya mbundakaambila Musa,

⁴ Kuzwa kunkanda akuzwa kucilundu eci ca-Lebano mane kusikila kumulonga, mulonga mupati wa-Firate, nyika yoonse yaba-Hiti, akusikila kulwizi lupati luli kububbila, yoonse buyo iyooba CISI canu.

⁵ Takukooyooba muntu naba omwe uukonzya kwiima nji kunembo lyako mazuba oonse ngoyoopona, Mbuli Musa mbundakali awe, njooba ayebo mbubonya. Nsikwe nenti kamulekelezye nikuba kuyoomuleka buyo pe.

⁶ Koyuma akuba mukozu, nkaambo nduwe uuyookonya bantu aba nyika njindakakonkezya bamawisi kuti njoobapa njiyo,

⁷ Pele koyuma akuba mukozu loko kuti mubambe kabotu mulao woonse Musa mulanda wangu ngwaakamulailila. Utaleyi kuzwa kulinguwo, pe, nikuba kululyo nikuba kulumwensi, kuti ujane coolwe koonse koonse nkoya.

⁸ EH ibbuku lyamulao talyeelede kutantamuka kumulomo wako, pe, uleelede kubika miyeeyo yako kulindilyo lyoonse buyo, isikati amasiku, kuti ubambe kabotu makani oonse aalembedwe mumo, nkaambo kucita obo nkokukonzya kubotya inzila yako akukuletela coolwe.

⁹ Sa teensi ndime ndakulailila na? Koyuma akuba mukozu. Utakankami nikuba kuyoowa, pe, nkaambo Jehova Leza wako uli ayebo koonse koonse nkoya,

¹⁰ Mpawo Joshua wakalailila basilutwe babantu kuti,

¹¹ Amwiinde koonse koonse akati kazilao, mwaambile bantu kuti, Amulibambile zyakulya, nkaambo amana buyo mazuba otatwe, muyoozubuka oyu mulonga waJordano kuyoovuba nyika eyo Jehova Leza wanu njamukonya,

¹² Nkabela ba-Rubeni aba-Gadi acisela camukowa wa-Manase, Joshua wakabaambila kuti,

¹³ Mutalubi ijwi Musa mulanda wa-Jehova ndyaakamulailila, Wakati, Jehova Leza wanu wamupa kulyokezya, wamupa nyika ino.

¹⁴ Lino banakazi banu atwana twanu aŋombe zyanu, boonse balasyaala mumonya munyika Musa njaakamupa mutala omuno lya-Jordano, pele inywe nubeni muleelede kuzubuka azilwisyo zyanu kunembo lyabasiluzubo banu. Bazubuke boonse baalumi basintaze, kuti mubagwasye,

¹⁵ mane Jehova amane kupa basiluzubo banu kulyokezya mbubonya mbumwapegwa anywe, bavube abalo nyika Jehova Leza wanu njabapa, elyo kusule muzooboola kunyika yalukono lwanu, mwiivube eyi nyika Musa mulanda wa-Jehova njaakamupa omuno mutala lya-Jordano kubuzwezuba.

¹⁶ Nkabela bakavwiila Joshua kuti, Makani oonse ngotulailila tulaacita, alimwi koonse nkoyootutuma tuyooinka nkuko.

¹⁷ Mbubonya mbutwakaswiilila Musa, tulakuswiilila ayebo, pele Jehova Leza wako abe ayebo mbubonya mbwaakali a-Musa.

¹⁸ Kufumbwa muntu uusampaula majwi aako akutaswiilila makani oonse ngomulailila, uleelede kujayigwa. Koyuma buyo akuba mukozu.