Jemusi 1 - Ibbaibele 1963

¹ Ndime Jakobo, muzike wa-Leza awa-Mwami Jesu Kristo. Ndajuzya mikowa iili ikumi aibili iimwaikide koonse koonse.

Aamasukusyo

² Bakwesu, amuyeeye kuti ncoolwe cipati na mwasikilwa masukusyo aamisyobo misyobo,

³ nkaambo mulizi kuti kusukusigwa kwalusyomo lwanu nkokuleta lukakatilo.

⁴ Eno lukakatilo alukalondole mulimo walo woonse, kuti mube balondosi akuba aciimo cizulide cakutabula cintu.

⁵ Pele na nkwali akati kanu uubula busongo, akumbile kuli-Leza, uubaabila boonse cabuuya acakutatongauka, nkabela ulabupegwa.

⁶ Pele akumbile cakusyoma, atalimbululi akaniini, nkaambo uulimbulula ulikozyene amankwisita aalwizi aaululuka akutontwa amuuwo.

⁷ Muntu uuli boobo atayeeyi kupegwa cintu ku-Mwami, pe,

⁸ nkaambo ulijisi myoyo yobile, ulapilauka mukweenda kwakwe koonse.

⁹ Lino mukwesu mucete abotelwe asumpulwa,

¹⁰ pele muvubi abotelwe kukucesegwa kwakwe, nkaambo kakuti bavubi bayoomaninina mbuli malangalanga aamusokwe,

¹¹ Nkaambo izuba lyapasula acisansa, cilayumya mani, nkabela malangalanga aao alayuminina, abweebesi bwao bulamaninina, Mbubonya obo amuvubi ulanyana mukweenda kwakwe.

¹² Ngusicoolwe oyo muntu uukakatila mumasukusyo, nkaambo na wabonwa kuti muyumu, ulapegwa musini wabuumi, ngwaakasyomezya Mwami kulibaabo bamuyanda.

¹³ Na muntu watepaulwa, ataambi kuti, Ndatepaulwa kuli-Leza, nkaambo Leza tatepauliki kucibi, alimwi walo mwini tatepauli muntu pe.

¹⁴ Muntu ulatepaulwa na alengawidwa akoongwa kuzisusi zyakwe mwini.

¹⁵ Eno zisusi zyamita buyo, zilazyala zibi, azyalo zibi zyakomena zilatumbuka lufu.

¹⁶ Muteeneki, nobakwesu bayandwa.

¹⁷ Zipego zibotu zyoonse azyoolwe zyoonse zilondokede zilazwa kujulu, zilaseluka kuzwa kuli-Wisi wamimuni, uutasanduki, uutajisi acenzule cakusanduka,

¹⁸ Mbukanze bwakwe mwini mbwaakatuzyalila mumakani aalusinizyo, kuti tukabe mbuli bakabalwebalwe babaabo mbalengede.

Kuswiilila kulike takugwasyi, kucita nkokujisi makani

¹⁹ Muleezi kale makani aya, nobakwesu bayandwa. Pele muntu woonse abe amutwe muuba, amuke kwaamba, amuke kunyema,

²⁰ nkaambo bukali bwamuntu tabucityi ziluleme zya-Leza.

²¹ Nkaambo, kaako, amusowe busofwaazi boonse abubi bufwasukide mumyoyo yanu, mwaatambule cakulibombya makani ngemuzikilidwe mukati, aali anguzu zyakufutusya myuuya yanu.

²² Pele amube basikucita makani, mutabi basikuswiilila buyo balyeena.

²³ Ikuti na muntu ngusikuswiilila buyo, pele tali sikucita makani, ulikozyene amuntu uulilanga mucimboni kubusyu mbwaakalengwa abo,

²⁴ nkaambo amana kulilanga, ulainka, elyo ulafwambaana kuluba mbwabede.

²⁵ Anukuti uusondela mumulao mulondosi wabulubusi, akukakatila kulinguwo, mbwaatali sikuswiilila amatwi buyo uuluba pele sikumana mulimo, ngonguwe uuti longezegwe mukucita kwakwe.

²⁶ Na nkwali uuliyeeya kuti musyomi, nekubaboobo taangi lulimi lwakwe pele walyeena mumoyo wakwe mwini, busyomi bwayooyo mbwabuyo.

²⁷ Busyomi busalala butakwe kampenda mumeso aa-Leza Taateesu mbombuboobu, bwakuti muntu aswaye bamusyaala abamukabafu mumapenzi aabo, akuliyobola cakutaba akabala nikaba komwe kaansi.