Hebrayo 1 - Ibbaibele 1963

Kwaanza kwamakani: Kristo ulabainda basinsimi abaangelo

¹ Kuciindi cakalekale Leza wakaambila bamatata mubasinsimi ubucebuce akuziyanza zinjizinji,

² pele kumamanino, sunu, cino ciindi watwaa­ mbila mu-Mwanaakwe, ngwaakasala kuti abe ngomukamwini wazintu zyoonse, alimwi kulinguwe wakaanza zintu zyoonse.

³ Walo, mbwali nguumwesya bulemu bwa-Leza, alimwi nguwenya ncecizibyo icizibya mbwabede Leza, nguuyumya zintu zyoonse kujwi lyakwe lili anguzu, naakamana kulituula kuti abe cituuzyo cakusalazya bantu kuzibi, wakaakukala kujulu kululyo lwacuuno ca-Leza cabupati.

⁴ Wakaba uuinda baangelo, mbubonya izina lyakwe ndyajisi mboliinda mazina aabo,

⁵ Nkaambo ino ndelili Leza naakaambide kuli-angelo umwi kuti, Yebo nduwe Mwanaangu, Sunu ndakuzyala? alimwi kuti, Mebo ndilaba Wisi uwakamuzyala, Walo ulaba Mwanaangu?

⁶ Alimwi, alete buyo Mwanaakwe mutaanzi munyika, waamba kuti, Abalo baangelo boonse ba-Leza kabayoomukomba.

⁷ Alimwi mbobuya mbwabaamba baangelo uti, Baangelo bakwe nguubacita myuuwo, Abalo basimilimo bakwe wabacita mabangabanga aamulilo.

⁸ Anu kwalo ku-Mwana wakateeti, Cuuno cabupati bwako, Leza, ncalyoonse lyoonse, Akalo kasako kabwami bwako bupati nkasako kakululama kwinikwini

⁹ Yebo uyandisya kululama, pele butongo tobuyandi, ulibusulide, Aboobo Leza, Leza wako, wakunanika mafuta aali ecoolwe iciinda cabeenzinyoko.

¹⁰ Alimwi, Yebo O Mwami, nduwe wakatalika kwaanza nyika kumasokelo, Elyalo ijulu njemilimo yamaanza aako.

¹¹ Lyalo ijulu liyooloba, anu yebo pe, tokwe ankoya. Liyookulumpala mbuli zyakusama.

¹² Uyoolivunga mbukuvungwa cibaki, Ii nkasimpe, mbubonya mbuli zyakusama, mpoonya ziyoosanduka akusanduka, Pele yebo unooli mbubonya, Ayalo myaaka yako tiikooyoogola.

¹³ Ino ndelili naakaambide kuli-angelo umwi kuti, Kala kujanza lyangu lyalulyo, Mane basinkondonyoko ndikabacite kuti babe njemitandabilo yamatende aako?

¹⁴ Sena baangelo boonse tiili myuuya iimubelekela, mbatuma kuya bumubelekela kulibaabo abayoojana kufutuka?