Filimoni 1 - Ibbaibele 1963

¹ Ndime Paulo, ndi mwaange nkaambo ka-Kristo Jesu, tuli a-Timoteo mukwesu. Tulamujuzya nywebo Filimona muyandwi wesu simulimoma,

² a-Apiya mucizi wesu, a-Arkipo silumambama, ambungano iibungana muŋanda yako.

³ Luzyalo alube anywe aluumuno luzwa kuliLeza Taateesu akuli-Jesu Kristo Mwami,

⁴ Ndalumba Leza wangu lyoonse ningambilizya nduwe muzikombyo zyangu,

⁵ mbundi mukumvwa luyando lwako alusyomo ndojisi kuli-Jesu Mwami akubasalali boonse.

⁶ Ndakomba kuti luswanaano lwalusyomo lwako lucite kuti bazibe cakubonesya mbububede bubotu boonse mbutujene muli-Kristo.

⁷ Nkaambo ndijene kukondwa kupati akuumbulizigwa kuluyando lwako, mukwesu, myoyo yabasalali mbuyakatalukwa mulinduwe.

Makani aa-Onesimo muzike uulobokede

⁸ Lino nenjanda ndakonzya kukulailila cabukozu kucita cintu ciluzi,

⁹ nekubaboobo wence ndakukombelela buyo caluyando, mbondi Paulo munene, alimwi sunu ndi mwaange nkaambo ka-Kristo Jesu.

¹⁰ Ndakukombelela wence nkaambo kamwanaangu ngundalizyalila nencili muntolongo. Ngu-Onesimo.

¹¹ Ciindi cakamana katakwe mulimo kulinduwe, pele sunu uli amulimo kulinduwe akulindime.

¹² Ndamuboozya kulinduwe, ngooyu, nekuba kuti ngumoyo wangu loko.

¹³ Ndakayanda kumulondola afwiifwi ambe, kuti andimanine milimo mumwenya wako ciindi ncencili mwaange nkaambo ka-Makani Mabotu,

¹⁴ pele taakwe ncenkonzya kucita kutali kuti uwe wazumina, kuti kucita kwako kubotu kutabi kwakusinikizigwa, akube kwakulita.

¹⁵ Ambweni nciceeco ncaakacija kulinduwe kaindi kaniini, kuti uzoomutambule abe wako lyoonse,

¹⁶ atacinoobi mbuli muzike buyo, ainde mubuzike, abe munyoko muyandwi. Ncobeni ulayandwa kulindime, nkabela ulayandwa loko kulinduwe, muziyanza zyoonse zyobile, ambuli muntu ambuli mu-Mwami.

¹⁷ Lino kuti kondijisi mbuli mweenzinyokwe, mutambule ubaanga utambula ndime.

¹⁸ Na wakakubisizya nanka ulijisi cikoloto cako, bika ndime mumwenya wakwe.

¹⁹ Ndime Paulo, ndagwala obu ajanza lyangu ndemwini, nzookuliya. Nsikwaambila ano kuti uwe ulandicenekela cakwiinda abwalo buumi bwako.

²⁰ Mbubo mukwesu, nkondezegwe kwako mu-Mwami, katalusya moyo wangu muliKristo.

²¹ Ndakugwalila mbundasyoma kuti ulandiswiilila, nkabela ndizi kuti uzoocitisya kwiinda mbundaamba.

²² Alimwi ukandibambile ciyusilo, nkaambo ndakulwiila kuti nzoobweedezegwe kulindinywe nkaambo kazikombyo zyanu,

Injuzyo zyakumamanino

²³ Epafra mwaangema muli-Kristo Jesu ulakujuzya,

²⁴ abalo ba-Marko a-Aristarko a-Dema a-Luka basimilimoma.

²⁵ Luzyalo lwa-Mwami Jesu Kristo alube amoyo wanu.