Daniele 1 - Ibbaibele 1963

Daniele abeenzinyina mbubakakaka kulisofwaazya azilyo zyamwami wa-Babuloni

¹ Lino mumwaka watatu wabwami bwa-Jehoyakimu mwami wa-Juda, Nebukadinezara mwami wa-Babuloni wakasika ku-Jerusalemu, wausinkinizya­.

² Nkabela Mwami wakaaba mumaanza aakwe Jehoyakimu mwami wa-Juda azibelesyo zimwi zyaŋanda ya-Leza, elyo wakazileta kunyika ya-Sinara kuŋanda ya-leza wakwe, azibelesyo wakazileta mucilondwedo caŋanda ya-leza wakwe.

³ Lino mwami wakalailila Asipenazi silutwe wabazibe bakwe kuti alete bamwi babana ba-Israyeli, basilunyungu lwabwami alwabapati,

⁴ balombe batakwe tumpenda, bali aziwa zibotu, bajisi maanu abusongo boonse, babwene makani aakumvwisya luzibo, beelede kubeleka milimo muŋanda yamwami, akubaiisya malembo amwaambo waba-Kasidi.

⁵ Nkabela mwami wakababambila zilyo zyabuzuba abuzuba, caabilo cazilyo zinono nzyaakali kulya mwami acawaini ngwaakali kunywa. Wakalailila kuti balelwe myaka yotatwe; yamana myaka yotatwe, baime kubusyu bwamwami.

⁶ Lino akati kabo kakuli bamwi bana ba-Juda, Daniele, Hananiya, Misayeli a-Azariya.

⁷ Nkabela silutwe wabazibe wakabaulika mazina. Daniele, wakamuulika izina lya-Belitsazara; a-Hananiya, wakamupa izina lya-Sadrake; Misayeli, wakamupa lya-Mesaki; a-Azariya wakamupa lyaAbedinego.

⁸ Pele Daniele wakalibeteka mumoyo wakwe kuti atalisofwaazye azilyo zinono zyamwami awaini ngwaakali kunywa, nkabela wakakumbila kulisilutwe wabazibe kuti atalisofwaazyi.

⁹ Lino Leza wakacita kuti Daniele afwidwe lweetelelo aluzyalo kulisilutwe wabazibe.

¹⁰ Nkabela silutwe wabazibe wakaambila Daniele kuti, Ndayoowa mwami simalelaangu, ngonguwe iwakabamba zilyo zyanu azyakunywa zyanu. Sa ncibotu kuti abone ziwa zyanu tazili kabotu mbuli ziwa zyabasanyokwe? Na caba obo, muyoondipesya mulandu kumwami, ambweni ulandigonka mutwe.

¹¹ Mpoonya awo Daniele wakaambila mulangi, silutwe wabazibe ngwaakabikide kukulanga Daniele, Hananiya, Misayeli a-Azariya. Wakati,

¹² Utusoleke toba landa bako mazuba aali ikumi. Batupe zisyu zyakulya amaanzi aakunywa.

¹³ Lino ziwa zyesu zilingulwe, ubone mbuzibede, azyalo ziwa zyabalombe balya zilyo zinono zyamwami, Wamana kubona, utucitile mbubonya mbobona.

¹⁴ Elyo wakabaswiilila mumakani aya, wabasoleka mazuba aali ikumi.

¹⁵ Amane mazuba aali ikumi, ziwa zyabo zyakalingulwa, nkabela kwakabonwa kuti zili kabotu, zilineneede, kwiinda balombe boonse ibakali kulya zilyo zinono zyamwami.

¹⁶ Aboobo mulangi wakagwisya zilyo zinono awaini wakunywa, wakali kubapa zisyu.

¹⁷ Lino aba balombe bone, Leza wakabapa luzibo amaanu aakumvwisya mabuku oonse abusongo boonse. Alimwi Daniele kezi kupandulula zilengano zyoonse aziloto.

¹⁸ Lino nicakamana ciindi mwami ncaakabikide kuti baletwe kulinguwe, silutwe wabazibe wakabaleta kuli-Nebukadinezara.

¹⁹ Elyo mwami wakaambaula abo, nkabela akati kabo boonse teekwakajanwa naba omwe uuli mbuli Daniele, Hananiya, Misayeli, a-Azariya, Nkaambo kako bakaima kunembo lyamwami.

²⁰ Nkabela mumakani oonse aaluzibo amaanu mwami ngaakabuzya kulimbabo, wakajana kuti balainda ziindi zili ikumi basondi abacape boonse bamucisi cakwe coonse.

²¹ Nkabela Daniele kacipona mane kusikila kumwaka mutaanzi wabwami bwa-Koresi.