Bakolose 1 - Ibbaibele 1963

Injuzyo. Paulo ulalumba Ba-Kolose akubakombela

¹ Ndime Paulo nendakasungulwa abukanze bwa-Leza kuba apostolo wa­-Jesu Kristo, tuli a-Timoteo mukwesu,

² Tulamujuzya nywebo noba­ salali abakwesu basyomesi bamuli-Kristo nomuli ku-Kolose. Amube aluzyalo aluumuno kuzwa kuli-Leza Taateesu.

³ Tulalumba Leza Wisi Mwami wesu Jesu Kristo, alimwi tulamukombela lyoonse,

⁴ nkaambo tulimvwide makani aalusyomo lwanu ndumusyomya Jesu Kristo aluyando lwanu ndumuyandya basalali boonse,

⁵ nkaambo kabulangizi mbumuyobwedwa kujulu, Obu bulangizi mulibumvwide kale kuciindi ncimwakakambaukilwa lusinizyo lwa-Makani Mabotu,

⁶ Aya makani akasika kulindinywe mbuli mbwaasika kunyika yoonse, nkabela koonse koonse alaya buzyala micelo akuya buvula mbubonya mbwaakacita kulindinywe kuzwa kubuzuba obo mbumwakasaanguna kwaamvwa akuziba cakusinizya luzyalo lwa-Leza.

⁷ Makani aaluzyalo olu mwakaaiya kuli­-Epafra muzikema, uusyomeka kukucita milimo ya-Kristo nkaambo kandinywe,

⁸ nguwenya wakatutondezya makani aaluyando lwanu lwamuMuuya.

⁹ Aboobo aswebo, kuzwa kubuzuba obo mbutwakaamvwa, tatuleki abuniini kumukombela akumukumbilila kuti mukazuzigwe luzibo lwakuziba makanze aakwe mbwaabede, akuba abusongo bunji bwakumvwisya makani aamuuya,

¹⁰ kuti mweende munzila iielede cakubotezya Mwami muziyanza zyoonse, muzyale micelo yamilimo mibotu yamisyobo yoonse akuya bukomena lyoonse mumakani aakuziba Leza,

¹¹ Tulakumbila kuti mbuli inguzu zyakwe mbuzilemekeka, anywebo muyumisigwe mbubonya akuba abuyumu bunji bwakukakatila abwakukazika myoyo yanu abwakukondelelwa.

¹² Amukalumbe Taateesu nkaambo wakatucita kuti tweelelwe kuba acaabilo calukono lwabasalali bali mumumuni.

Kristo ncecikozyano ca-Leza, alimwi ngu-Mwami wazintu zyoonse

¹³ Nguwenya Taateesu iwakatufutula kuzwa kunguzu zyamudima akutunjizya mu-Bwami bwa-Mwanaakwe uuyandwa.

¹⁴ Mumwanaakwe oyo mutujene lununuko abulekelelo bwazibi.

¹⁵ Ngonguwe cikozyano ca-Leza uutabonwi, mutaanzi kuzyalwa kuzilenge zyoonse,

¹⁶ nkaambo mulinguwe muzyakalengwa zintu zyoonse, zyamujulu azyaansi, zintu zibonwa azitabonwi, zyuuno zyabwami, bami, beendelezi abasinguzu, zyoonse buyo zyakalengwa anguwe kuti zibe zyakwe.

¹⁷ Ngumutaanzi wazintu zyoonse, nkabela mulinguwe zintu zyoonse muzijatene.

Kristo ngomutwe, imbungano ngomubili

¹⁸ Ngomutwe wamubili, nkukuti imbungano, nkaambo ngonguwe mutaanzi iwakasaanguna kuzyalululwa kuzwa kulufu, kuti abe mutaanzi akati kaboonse.

¹⁹ Nkaambo cintu ncaakayanda Leza nceeci cakuti bu-Leza buzulide bukale mulinguwe.

²⁰ Alimwi wakabeleka kujanza lyakwe kukuliyanzanisizya zintu zyoonse, niziba zyaansi niziba zyakujulu, akucitya luumuno abulowa bwaciingano cakwe.

Muli-Kristo Ba-Kolose mobajene lufutuko

²¹ Lino nywebo kuciindi cakamana mwakali kule, nkabela mumyoyo yanu mwakali basinkondonyina Leza nkaambo kamilimo mibi, pele sunu wamuyanzanya.

²² Wamuyanzanya kukufwa mumubili wakwe uufwika, kuti amwiimikizye kubusyu bwakwe cakusalala acakubula kampenda acakutaba amulandu,

²³ nkukuti na mwakakatila akubombomana bombolo mulusyomo, akutazungaana kuzwa kubulangizi bwa-Makani Mabotu ngimumvwide, Ngaonya makani aakakambaukilwa bantu boonse baansi ano, nkabela ambebo nde-Paulo ngindakapegwa bufundisi.

Maciswe ngaakajana Paulo mumilimo yabuapostolo bwamasi

²⁴ Lino ndakondelwa maciswe ano ngenciswa nkaambo kandinywe. Njanda kuzuzya mumubili wangu makani aacisyeede aamapenzi aa-Kristo nkaambo kamubili wakwe, nkukuti imbungano yakwe,

²⁵ Mebo ndi similimo wambungano eyo, nkaambo kakuti eyi milimo ndakaibikilwa a-Leza nkaambo kanu, kuti nkalungulule makani oonse aa-Leza,

²⁶ makani aayubide aakasisidwe muciindi camizukulu yakalekale, pele sunu aliyubunwide kubasalali,

²⁷ Kulibaaba Leza wakayanda kuyubununa mbububede buvubi bulemu bwamakani aya akati kabamasi. Makani ngaaya aakuti Kristo uli mukati kanu, alimwi ngonguwe bulangizi bwabulemu.

²⁸ Nguwenya ngutukambauka swebo, mbutuli mukulungulwida bantu boonse akwiisya bantu boonse cabusongo bunji, kuti tubaimikizye boonse kubusyu bwa-Kristo cakulondoka.

²⁹ Nciconya eco ncimbelekela akusolekesya mbuli inguzu zyakwe mbuzibelekesya loko mukati kangu.