Mataio 9 - Kuruei Voa Nawawrea 1920

¹ U mapea lakenave Ururu ke’enave ane, Una pai’iri ai U pi’inave.

² Varuvaru maia a’a kile upa mere keimakei’inave oro U ai mi’‐anenave: Iesu omo pirimaroakoa inamu‐oimakei’inave varuvaru maia a’a U erau voa kurunave, Mere e, ivirili’ine; ni namea paue‐emiakeina.

³ Omo lai laru ai Kikiria a’a varomo erau voa kurunave, Ei a’a mai‐voa kuruna.

⁴ Iesu omo lai ipalimakei’inave U erau voa veve’einave. Uku oiana nomo umu laru ai noro lai lipi mi’ina?

⁵ Oi voa ana paraka keina voa kuruai, Ni namea paue‐emiakeina ana; mo, ei voa ana voa kuruai, La’ane, are rokone ana?

⁶ A uku ipanakiai A’a anu Mere iva mi’ina pani va’au ai namea paue’emiai, (varuvaru maia a’a U erau voa kurunave,) La’ane, ni kile uakine, ni marea ai enara.

⁷ U la’anave, una marea ai u enanave ane.

⁸ A’a aruru ei awkuinamu‐oiaka’ane oro varua’anave, Eloi avioinave ane uku ei iva eiai U a’a awkuaka.

⁹ Iesu awawpemakei’inave a’a monou U inamu‐oinave, nawi Mataio oroiakei’inave, moni akoa marea ai pa’amakei’inave: Iesu erau voa awkinave, E’e’ikane. U la’anave, e’e’okanave ane,

¹⁰ Iesu pei navai marea laru ai pa’amakei‐inave, moni akoa a’a aila, namea a’a ane, U ai anenave U kiripai Una aivara‐oro ane oro papa’anave.

¹¹ Parisea a’a‐oro ei opara inamu‐oimakei’inave, Una aivara erau voa oro veve’einave, Uku oiana nomo Amua pei na’amakina moni akoa a’a kiripai, namea a’a kiripai ane?

¹² Iesu omo voa viriaka’ane U erau voa kuruenave, Kape venea a’a lapu a’a oea‐rokoapea; maia a’a‐oro lapu a’a oea‐rokona.

¹³ Enara ei voa anu miki auira, Umu Nai umuli’ina, epie pei peo: Opara anana a’a laea‐elauai Nai aneakape, a namea a’a‐oro lai urukiai oro laea‐elauai Nai aneaka.

¹⁴ Ioane enu aivara‐oro U ai anenave, erau voa veve’enave ane, Uku oiana enei, Parisea a’a‐oro awku, pani aila pei eieikana, a Ni aivara‐oro pei eieikapea?

¹⁵ Iesu erau voa veve’einave, A’e‐mia vaki inu ukua pei lariliai ama‐li’i a’e‐mia vaki oro kiripai pokoiane? a kurua lare aneakana a’e‐mia vaki oro mere iou?-?miakeiakana, ou pani ai oro pei lariliakana.

¹⁶ A’a kapeo una a’a kape ekoroai kapua nawawrea araupu a’a kape upa mere kikirina; uku kapua nawawrea araupu a’a kape koravakana.

¹⁷ A’a kapeo iri uru ika nawawrea araupu maina laru ai orekana; maina loiane iri uru ika upuna, maina awku oavakeina; a iri uru ika nawawrea maina nawawrea laru ai oro orekana, orau uru ika, maina ane, imakeina.

¹⁸ U ei voa kurumakei’inave ane, Amua a’a monou U ai anenave, Una paku ai are‐epo ai’inave ane, erau voa kurumakei‐inave, Na paka eai imuakeina: anene, Ni eve u upa mere aine, u rokoakana.

¹⁹ Iesu la’anave U amua a’a e’e’okanave ane, orau Una aivara‐oro awku li’inave.

²⁰ A’e monou aumeia 12 aro maia miaka U neko ai anenave, Una a’a kape enu kari u nekenave.

²¹ Uku una lai laru ai u erau voa kurunave, Nai Una a’a kape e nekeane nai auka?-?rikiakeiakana.

²² Iesu urukinave U ei a’e inamu‐oiaka’ane U erau voa kurunave, Paka e, kopaili’ine, ni pirimaroakoa aukarinika’ane euna. Ou pani mere a’e enu kape aukarikavakei’inave.

²³ Iesu amua anu marea ikirimakei’inave, awvi‐lia a’a U inamu‐eimakei’inave ane, a’a aruru awku awni mu’u mailau awkamakei’inave, U erau voa kuruenave;

²⁴ Laikine, ei paka imuapea, u awawkeina. Voa kamukamu oro keke‐awkanave.

²⁵ A’a aruru iki ai laeiakei’inave ane, lalava laru ai U ikirinave, paka anu eve U a’akinave, paka la’anave ane.

²⁶ Ei awku unu uru pani va’au iki upurukiakei’inave.

²⁷ Iesu ou marea mere enamakei‐inave ane inamu‐apua a’a rere e’e’okanave, erau voa laealimakei’inave, Umu akane, Davida anu mere e.

²⁸ U marea laru ai ikirimaneaka’ane inamu‐apua a’a rere U ai ikirinave: Iesu erau voa kuruenave. Norere ama?-?pirimaroakoa’i Nai ei awku liai‐li’ina? Orere kurunave, Lia, Amua e.

²⁹ Orere enu inamu U nekenave erau voa kurunave ane, Norere enu pirimaroakoa orau norere eiai orau evere’enamoki.

³⁰ Orere enu inamu laka’?-?akei’inave; Iesu orere erau voa emoki ekinave, Norere oivirine a’a e ipali’inavaia.

³¹ Orere iki ai eleaka’ane Una uru orere upurukinave pani va’au iki ai.

³² Orere eleaka’ane a’a‐oro momoa a’a U ai ora’anave, ei a’a avaea‐lipi miaka.

³³ Avaea‐lipi ei a’a mere laoiakei’inave ane momoa a’a voa kurunave: a’a aruru varua’anave, erau voa kurunave ane, Ei awku Isaraela pani va’au inamu‐oiakeiape.

³⁴ Parisea a’a‐oro erau voa kurunave, I avaea‐lipi inu amua ei a’a avaea‐lipi laeina.

³⁵ Pai’iri e e uriria Iesu aki‐enanave, omo omoro marea laru ai ipawkimakei’inave, pani muku eiei inu Iva Voa omoro kurumakei’inave, maia kavakava aukarika’?-?anave, a’a aruru unu eapa maia uriria U paue’enave ane.

³⁶ U a’a aruru inamu‐eiaka’ane U umu‐ekanave, uku oro oia eavulimakei’?-?inave, oro keke’e laeiakei’inave, mamoe orau oiviria a’a eria mi’ina.

³⁷ Una aivara‐oro U erau voa kuruenave, Roikia‐uru aila miki keina, roikia a’a ailapea.

³⁸ Roikia‐uru unu Amua nawki‐awkane U iaki a’a ekaiviriane‐iai Una roikia‐uru roikiai.