Mareko 8 - Kuruei Voa Nawawrea 1920

¹ Ou pani ai uku a’a aruru ovara‐mai kei’inave, oro pei eria mi’inave ane, Una aivara U ai aneai Iesu laea‐elau’unave, erau voa kuruenave ane,

² A’a aruru Nai umu‐ekana, uku lare rere kaiane oro Nai kiripai pokoiane euna, oro pei eria mi’ina ane:

³ Oro pei navai‐navaili?-?makina Nai ekaiviriane omo pai’iri ai, oro oia eavuliakana kapea ai: uku oro aila amai mere anenave.

⁴ Una aivara erau voa veve’enave, Ei kekepere mako ai enei pei ekeiama‐mia?-?mau ei a’a aruru eiai?

⁵ U erau voa veve’einave, Pu aw ekara’aru ana noro mi’ina? Oro kurunave, Pu aw 7 uakeina.

⁶ A’a aruru papa’avai U ekinave: pu aw 7 U mi’inave, nawki‐awkanave ane, la’a vepenave, Una aivara ekunave a’a aruru paku ai aiai; pu aw la’a a’a anu paku ai oro ai’inave.

⁷ Nava mau’u awku ailapea oro mi’inave: U nawki‐awkanave, ekinave ane nava a’a anu paku ai aiai.

⁸ Oro na’anave, lai aukiakei’inave ane: pei kakai uakei’inave oro kekai 7 laru ai roikinave, mi‐enanave ane.

⁹ A’a pei navaka oro 4,000 akoakei’inave: U ekaivirinave ane.

¹⁰ Una aivara kiripai U mapea emoki lakenave, Dalemanuta ai anenave ane.

¹¹ Parisea a’a e’e’okanave, oro nawki‐awkamakei’inave vupu eiai kaia ai, oro ewaea?-?awkava’ane‐iai.

¹² Iesu i’i ovara limakei’inave, erau voa veve’einave, Uku oiana ei kiri a’a vupu vorona? Nai kurunaina kapoi, Vupu eria awkuakeiakana ei kiri a’a eiai.

¹³ U ave’einave, mapea lakenave, Ururu iou ane mekai ke’enave.

¹⁴ Aivara pu aw mi‐aneai aikavaka; mapea ai pu aw monou e oro miaka.

¹⁵ U erau voa ekinave, Oivirine uku Parisea a’a, Heroda ane, uku omo opara veila ika orau parua’ane.

¹⁶ Oro erau voa ekinamakei’inave, Ei voa naea uku enei pu eria mi’ina.

¹⁷ Iesu inamu‐eiaka’ane oro voa ekinamakei’inave, U erau voa veve’einave, Uku oiana noro voa nakina uku noro pu eria mi’ina? Noro eai inamu‐oiapeana, ipapeana ane? Nomo lai eai pauapaua ana?

¹⁸ Noro inamu mi’ina, noro inamu‐oiapeana? Noro keporo mi’ina, noro viriapeana? Noro laikora‐nakiapeana?

¹⁹ Nai pu aw 5 vepeaka’?-?ane a’a aruru 5,000 eiai, pei kakai inu kekai ekara’aru ana noro ama‐roiki’e, evopoa mi‐ena’e? Oro kurunave, Kekai 12 enei mi‐enanave.

²⁰ Pu aw 7 awku a’a aruru 4,000 eiai, pei kakai inu kekai ekara’aru ana noro ama‐roiki’e? Oro kurunave, kekai 7.

²¹ U erau voa veve’einave, Noro eai ipapeana?

²² Oro Betasaida ai anenave, inamu apua a’a U ai arekavakei’inave, Iesu inamu‐apua a’a nekeai oro nawki‐awkanave.

²³ Inamu‐apua a’a anu eve U a’akinave, pai’iri iki ai oravaka‐elenave ane, inamu‐apua a’a anu inamu upa mere u kaunere kaiaka’ane, Una eve awku a’a upa mere aiaka’ane, U erau voa veve’enave, Ni awku inamu‐ama?-?oi’i?

²⁴ U inamu‐ekinave, erau voa kurunave ane, Nai a’a inamu‐eina oro are rokoamakina, oro iri mikirina.

²⁵ Pani mo Una eve inamu‐apua a’a anu inamu upa mere U ai’inave, a’a inamu‐ekiai U awkinave ane: una emai evere’eakei’inave, a’a kavakava ima miki u inamu‐oinave.

²⁶ Iesu ei a’a okaivirinave una marea ai, erau voa awkinave ane, pai’iri ni pa ikiriai.

²⁷ Iesu Una aivara kiripai Kaisaria Pilipi inu pai’iri pai’iri ai elenave: kapea ai Una aivara U erau voa veve’einave, A’a oiamakuru’i Nai eiai?

²⁸ Oro erau voa kurunave, A’a varomo kuruna Ni Ioane Bapatiso: a’a mo kuruna Ni Elia; a’a mo kuruna Ni laikorava kaupu a’a anu a’a monou.

²⁹ U erau voa veve’einave, A noro oiamakuru’i Nai eiai? Petero erau voa kurunave, Ni Keriso keina.

³⁰ U ekinave a’a e pa awkiai.

³¹ Pinai pani eire U erau voa ekinave, A’a anu Mere kukunu aila miai limakina; i mai‐oro, omoro amua a’a ane, kikiria a’a ane, inaka‐awkavakeiakana, avakeiak?-?na ane, lare rere kaiane neko mere ai U moawku rokoa?-?la’avakana.

³² Kurua voa U iki kurunave. Ou voa eiai Petero a’akinave, Una voa ei’inave ane.

³³ Iesu urukimakei’inave, Una aivara inamu‐eimakei’inave ane, U Petero onu voa ei’inave, U erau voa kurunave, Nai neko mere ai enara, Satani e, Uku ni lai a’a anu lai keina, Iehova anu lai peo.

³⁴ A’a aruru Una aivara kiripai U ai aneai U laea‐elauaka’ane, U erau voa kuruenave, A’a e’e’ikavai umuliane, una nane u inakali’inamoki, una iri keoa u uakinamoki, e’e’ikanamoki ane.

³⁵ Uku a’a kavakava una rokoa iawkavai u umuli’ina una rokoa u paukiakana; a kurua a’a una rokoa paukina Nai eiai, Iva voa eiai ane, una rokoa u iawkavakana.

³⁶ Oi kavani ana a’a miakana u pani va’au iki miane, a una imunu u paukiane?

³⁷ Oi kavani ana a’a awkuakana una imunu eiai?

³⁸ Ei eve’eve, namea kiri a’a, makirikeiakana uku Nai eiai, uku Na voa eiai ane; ou a’a eiai A’a anu Mere awku makirikeiakana, Una Mai inu evao’evao iaa aivara‐avaea kiripai U anea’ane.