Luka 19 - Kuruei Voa Nawawrea 1920

¹ Iesu Ieriko ikirinave, U pai’iri vimu ai awpemakei’inave,

² A’a nawi Sakaio i‐pokoinave: u moni akoa a’a anu amua vaki; u aru mo’onu mia a’a kei’inave.

³ Iesu oi‐mikiriinave inamu‐oiai u umuli’inave; uku u kape uma vaki, uku a’a kouakoua kei’inave ane, u Iesu inamu‐oiai ali’inavea.

⁴ Iesu paku ai u area‐enanave, iri upa mere inanave ane, uku Iesu kapea ai awpenavailia.

⁵ Iesu ou mako ai paiaka’ane, U iri vao ai inamu‐ekinave, erau voa awkinave ane, Sakaio e, rokoroko liline; uku ei lare ni marea ai Nai pokoiai limakina.

⁶ U emoki lilinave, u Iesu kopai umu‐ai’inave ane.

⁷ A’a uriria ei opara inamu‐oiaka’ane oro erau voa momou‐momou kurunave. Namea‐lipi a’a kiripai pokoiai U enava’ane euna.

⁸ Sakaio ananakinave, Amua erau voa kurunave, Amua e, na aru mekai nai rurupu a’a ekuna; nai a’a ewaea‐awkava’ane euane una aru aua monou eiai, aru aua 4 nai awkuakana.

⁹ Iesu erau voa kurunave, Ei lare ei marea ai iawka anena, uku u awku Aberahamo onu kiri a’a kei’inave.

¹⁰ Uku A’a anu Mere anea’ane euna ikou‐ena a’a evoroai, iekavai ane.

¹¹ Oro Una voa virimakei’inave, aipo voa awku U ipekinave, uku U Ierusalema arekamu ai kei’inave, uku awku oro laikoranave Eloi inu eiei emoki anenavailia.

¹² U erau voa kuruenave, Amua a’a monou eiei miai pani va’au amai aki‐enanave; moawku vairuai u umuli’inave.

¹³ Una aivara 10 u laea‐elau’unave, moni pauna 10 u ekunaveane, erau voa kuruenave ane, Ei moni kavani kavani awkane anea’anea nai vairuane.

¹⁴ A una eiei a’a vai’i?-?awkanave, u neko ai iva a’a oro ekaivirinave, erau voa kurunave ane, Ei a’a amua’?-?akavai enei umuliape.

¹⁵ U kurua eiei miaka’ane amai mere, una eiei ai u vairuaka’ane, aivara u moni ekuaka oro u ai aneai u ekinave, u ipaliane‐iai uku omo kavani‐kavani iaki eiai.

¹⁶ Pinai vaki anenave, erau voa kurunave ane, Amua e, Ni moni pauna monou moni pauna 10 akoane euna.

¹⁷ Amua erau voa kurunave, Imau, aivara ima e, uku ni a’a miki keia’ane euna awku mau’u eiai, ni pai’iri 10 amua‐ekane.

¹⁸ Rere vaki anenave, erau voa kurunave ane, Amua e, ni moni pauna monou, moni pauna 5 akoane euna.

¹⁹ Ei vaki awku amua erau voa kurunave, Ni pai’iri 5 amua‐ekane.

²⁰ Vaki mo anenave, erau voa kurunave ane, Amua e, akoi’i, ni moni pauna monou eu aku, ei moni kapua laru ai piriakeina nai oiviriane euna:

²¹ Uku nai kore kei’inave ni eiai, uku ni iara a’a keina: uku awku ni aiakape ni uakina, uru ni voeakape ni roikina ane.

²² Amua erau voa kurunave, Voa ni ane‐epo mere nai voa veveniakana, aivara?-?lipi e. Ni ipali’inave nai iara a’a kei’inave, nai uakinave awku nai aiakape, nai roikinave uru nai voeakape:

²³ Uku oiana na moni ni aiakape moni oiviria mako ai, nai vairuane na moni, moni inu kavani awku, nai miane‐iai?

²⁴ Oro arekamu ai oimakei’inave u erau voa ekinave, Moni pauna monou u mere iou‐mi’ine, moni pauna 10 mia a’a awkura ane.

²⁵ (Oro erau voa kurunave, U moni pauna 10 mi’ina.)

²⁶ Nai kurunaina, Awku mia a’a awku mo awkuakeiakana; awku eria a’a awku mau’u u mi’ina u mere ou awku iou‐miakeiakana.

²⁷ A oro na mani a’a, oro umuliape nai amua‐ekavai, eu ai are’ekane, e‐a’ane na paku ai.

²⁸ U orau kuruaka’ane, U paku ai enanave, Ierusalema i inamakei’inave.

²⁹ Betapake, Betania ane, arekamu ai U aneaka’ane, akapu Oliveta ai, Una aivara rere U ekaivirinave,

³⁰ Erau voa ekimakei’inave, Pai’iri paku ai norere ikirira; norere ikirimakeia’?-?ane asini mere i‐piriakeina norere auiakana, una akane ai a’a pa’avape; ururura, eu ai arekane ane.

³¹ A’a erau voa vevenaiane, Uku oiana norere asini mere ururuna? norere erau voa kuruma, Uku Amua oea‐rokona.

³² Orere ekaiviriakei’inave awku auinave orau U kurueaka.

³³ Orere asini mere ururumakei’inave, asini mere enu amua a’a erau voa veve’einave, Uku oiana norere asini mere ururuna?

³⁴ Orere erau voa kurunave, Uku Amua oea‐rokona.

³⁵ Asini mere orere Iesu ai arekanave: omo a’a kape asini mere upa mere oro aparenave, Iesu upa mere ai’inave ane.

³⁶ Orau U enanave, omo a’a kape oro kapea ai aparenave.

³⁷ U Ierusalema arekamu ai anemakei’inave, Oliveta akapu kinumakei’inave, aivara aruru iki Eloi avioiai pinaili’inave voa araro miki uku iva iaki uriria oro inamu‐eiaka.

³⁸ Erau voa kurumakei’inave, Amua Iehova anu nawi aneliviai anelia kopai‐awkavakeina: Pani muku ai airu‐enamoki, pani muku epe’epe ai evao’evao‐ena?-?moki.

³⁹ Parisea a’a varomo a’a aruru mere erau voa kurunave, Ni aivara anu voa Ni eine.

⁴⁰ U erau voa kuruenave, Nai kurunaina, Ei a’a eie?-?kava’ane, rawre voa araro emoki laealiakana.

⁴¹ U arekamu ai aneaka’ane, U pai’iri inamu‐oinave, vikirinave ane

⁴² Erau voa kurumakei’inave, Ni airu unu awku ni ipaliaka livilia ei pani ai! a eai ni inamu mere oro vaua‐ekavakeina.

⁴³ Uku lare aneliviai anelia ni mani a’a vara avini?-?kiakana, nimuruakeiakana, elea mako eria miakana ane.

⁴⁴ Oro upupunikana, ni a’a ane ni laru ai rokona; ni marea enakavakeiakana; uku ni iawka anea pani ni ipaliape.

⁴⁵ Omoro marea U ikirinave, oro inaealimakei’inave marea laru ai U laeinave.

⁴⁶ Erau voa kurumakei’inave, Ei voa kikiriakeina, Na marea nawki‐awkava marea keina: avapu a’a anu marea noro ei marea liane euna.

⁴⁷ Omoro marea laru ai lare kavakava U ipawkimakei’inave. Omoro amua a’a, kikiria a’a ane, a’a aruru unu mai‐oro ane, avai oro uku evoromakei’inave.

⁴⁸ Mua uku oro auiai ali’inavea: uku a’a aruru Una voa viriai oro eiekanave.