Ioane 7 - Kuruei Voa Nawawrea 1920

¹ Neko mere ai Galilaia eiei ai Iesu aki‐enamakei’inave: Iudea eiei ai U aki?-?a‐enanavea uku Isaraela a’a U‐avai ipia‐mimakei’inave.

² Isaraela a’a anu komo marea purai arekamu ai kei’inave.

³ Ou uku eiai Una aroa a’a erau voa kurunave, Ei eiei keinamoki, Iudea eiei ai enara, Ni aivara awku inamu‐eiane‐iai iaki Ni li’ina.

⁴ Uku a’a kapeo vaua?-?vaua ai iaki li’ina, panipani ai u umuli’ina ane a’a anu paku ai u ipawkiakeia’ane‐iai. Ei iaki Ni liane, a’a anu paku ai enara oro inamu?-?niane‐iai.

⁵ Uku Una aroa a’a awku a‐pirimaroakoanavea.

⁶ Iesu erau voa kuruenave, Na pani aneape: a pani pani ima keina uku noro eiai.

⁷ Pani va’au vai’i‐naka?-?vai liapea; a u vai’i‐ikanake uku Nai ione li’ina una opara eiai, una opara namea keina.

⁸ A ei purai navai noro inara. Nai eai a‐inanakea ei purai eiai, uku Na pani miki aneape.

⁹ U erau voa kurunave, Galilaia ai i‐pokoinave ane.

¹⁰ Una aroa a’a purai eiai inavaka’ane, neko mere ai U awku vaua‐vaua inanave.

¹¹ Purai ai Isaraela a’a voronave, erau voa veve’einave ane, U ekeiana?

¹² A’a aruru awkono avao ai voa momou mo’onu kei’inave uku U eiai: uku a’a varomo erau voa kurunave, U ima a’a keina: a’a mo erau voa kurunave, Ai, U a’a aruru ewaea‐ekana.

¹³ A’a kapeo iviri kei’inave voa iki kuruai U eiai uku oro Isaraela a’a kore kei’inave.

¹⁴ Purai na’a pani ai Iesu omoro marea ai inanave, omoro kurunave ane.

¹⁵ Isaraela a’a varua’anave, erau voa veve’einave ane, Ei a’a revareva voa eka’ama‐ipali’i, U ipawkia?-?a‐kei’inavea?

¹⁶ Iesu erau voa kuruenave, Na ipawkia voa Na voa peo, ei voa U mere anena, U ane U ikaivirinave.

¹⁷ Una lai kamaialiai a’a umuliane, ei ipawkia voa eiai u ipaliakana, ei voa Eloi mere anena naea, Nai omoro kuruna uku Na nane eiai naea.

¹⁸ A’a anu ipawkia voa una lai mere anena una avioia u vorona. A a’a Una avioia vorona U ane U okaivirinave, u a’a miki keina, namea eria u laru ai uakeina,

¹⁹ Mose vupu nakuapeana, a nomo a’a kapeo vupu kamaiali’ina? Uku oiana i‐avai noro umuli’ina?

²⁰ A’a aruru erau voa kurunave, Ni diabolo mi’ina: uku Ni avai koama‐awkama?-?kei’i?

²¹ Iesu erau voa kuruenave, Awku monou Nai liane euna, noro uriria varua’ana ane.

²² Mai‐oro onu momoa eia opara Mose nakunave, Sabati lare ai noro a’a momoa eina.

²³ A’a Sabati lare ai momoa eiakeia’ane, noro ia’ia ana Nai eiai uku Sabati lare ai maia a’a Nai aukarikava’ane euna?

²⁴ Awku unu aipo e voa pa veve’eai, awku unu iki miki voa veve’ene, noro voa vevea anana miane‐iai.

²⁵ Ierusalema a’a varomo erau voa veve’einave, Ei a’a U peana U avai oro umuli’ina?

²⁶ Akoi’i, U eu ai voa iviri kurumakina, oro voa eria kuruna. Mai‐oro ama‐ipali’i U Keriso kapoi?

²⁷ Ei a’a, Una pai’iri ane, enei ipali’ina: Keriso anea’ane, mako mere U aneakana a’a kapeo ipali’ina.

²⁸ Iesu omoro marea laru ai ipekimakei’inave, U erau voa araro kurunave, Noro ipa‐ilauna, mako mere Nai anena noro ipali’ina ane: Nai verukua aneape, a U ane U ikaiviriane euna U miki keina, noro ipa‐a‐ulaunakea.

²⁹ Nai ipa‐ulauna, uku U mere Nai anenave, U ikaiviriane euna.

³⁰ Oro ei voa viriaka’ane U‐piriai oro umuli’inave: a’a kapeo eve a’akinave, uku Una pani aneakape.

³¹ A’a aruru unu a’a aila pirimaroakoanave, erau voa veve’einave ane, Iva veia ei a’a liane euna Keriso anea’ane U iva veia mo amalimau?

³² Parisea a’a virinave a’a aruru voa e kevakeva kurumakei’inave Uku U eiai; Parisea a’a, omoro amua a’a ane, U‐piriai polikimani a’a ekaivirinave.

³³ Iesu erau voa kuruenave, Pani mau’u e Nai noro kiripai pokoina: neko mere ai Nai U ai enavakana, U ai U ane U ikaivirinave.

³⁴ Noro ivoroakana, noro aui’iapea: Nai i‐pokoiakana noro i‐aneai liapea.

³⁵ Isaraela a’a erau voa veve’eimakei’inave, U ekei?-?menai enei auiapea? Keke’e a’a lai unuku a’a awkono avao ai U ama‐enamau, lai unuku a’a ama‐ipekimau?

³⁶ Ei voa anu miki oiana U erau voa kurunave, Noro ivoroakana, noro aui’iapea: Nai i‐pokoiakana noro i‐aneai liapea?

³⁷ Purai inu ika lare ai, purai inu ovara lare ioure, Iesu la’anave erau voa araro kurunave, A’a kamuri lavere liane, Nai ai u anenamoki, na’anamoki ane.

³⁸ Orau iaa revareva kuruane euna, U ane u ipirimaroakona, u larua mere aiara ere rokoa orekiakana.

³⁹ (U ei voa kurunave uku Avaea Una pirimaroakoa a’a miakana: uku Avaea Iaa ei pani ai a‐awkuakei’?-?inavea; Iesu awku avioia?-?keiakape.)

⁴⁰ A’a aruru unu a’a varomo ei voa viriaka’ane, oro erau voa kurunave, Ei a’a Laikorava a’a kapoi.

⁴¹ A’a mo erau voa kurunave, Ei a’a Keriso keina. A’a mo erau voa veve’einave, Keriso Galilaia mere ama‐anemau?

⁴² Iaa revareva kuruapeana, Keriso Davida anu kiri a’a mere aneakana, Betelehema Davida anu pai’iri mere?

⁴³ A’a aruru awkono avao ai voa kamukamu kuruakei’inave uku U eiai.

⁴⁴ Oro varomo eve a’akiai umuli’inave; a a’a kapeo eve a’akinave.

⁴⁵ Polikimani Omoro amua a’a, Parisea a’a ane, enu paku ai vairunave; oro erau voa veve’einave, Uku oiana noro arekavape?

⁴⁶ Polikimani a’a erau voa kuruenave, A’a verukua kuruape orau ei a’a kuruna.

⁴⁷ Parisea a’a erau voa veve’einave, Noro awku ewaea‐nakavakei’i?

⁴⁸ Mai‐oro onu a’a ana, Parisea a’a anu a’a ana, amapirimaroakoa’e?

⁴⁹ A ei a’a aruru oro Vupu ipapea, oro laeiakeina.

⁵⁰ Nikodemo, u ane u Iesu ai kipere pani ai anenave, u erau voa veve’einave,

⁵¹ Ene Vupu a’a pinai voa veve’eana, neko mere ai paioka voa viriana?

⁵² Oro erau voa veve’enave, Ni awku Galilaia a’a ana? Vorone, ni ipaliane‐iai: uku Galilaia mere laikorava a’a kapeo anena.

⁵³ A’a kavakava una marea ai enanave.