Ioane 21 - Kuruei Voa Nawawrea 1920

¹ Iesu Una aivara paku ai moawku erenave Tiberia ururu ai: orau U erenave.

² Simona Petero, Toma Didimo ane, Natanaela ane Kana pai’iri a’a, Galilaia eiei pai’iri, Sebede enu mere orere, Una aivara rere e ane, kiripai i‐pokoinave.

³ Simona Petero erau voa kuruenave, Nava evoroai nai enamakina. Oro erau voa kurunave, Enei awku ni kiripai enavakana. Oro ve’enave, mapea lakenave; kurua kipere ai oro nava eria mia‐rokoanave.

⁴ Pani mereaka’ane Iesu miri ai oinave: U Iesu kei’inave oro a‐ipali’inavea.

⁵ Iesu erau voa kuruenave, Mere e, noro pei ama‐mi’i? Oro kurunave, Pei peaku.

⁶ U erau voa ekinave, Mapea miki mekai keve ururuane, noro nava mia‐rokoakana. Oro keve orau ururunave, keve mapea ai oro lakiai a‐li’inavea, uku nava mo’onu kei’inave.

⁷ Ei uku eiai Iesu unu naumuki aivara Petero erau voa kurunave, Amua ioure! Simona Petero viriaka’ane Amua i‐oimakei’inave, una iaki piliue u lukinave, uku iaki liai una piliue u uniaka, ere aura ai u area‐kinunave.

⁸ Aivara e oro mapea mau’u anenave; (uku oro miri arekamu ai kei’inave, miri mere 100 iadi,) oro keve lakimakei’inave ane.

⁹ Oro miri ai piaka’ane, oporo iau oro inamu‐oinave, nava iau upa mere, pu awku arekamu ai kei’inave.

¹⁰ Iesu erau voa kuruenave, Nava noro eai mia?-?rokoane euna noro minane.

¹¹ Simona Petero mapea lakenave, keve miri ai lakinave ane, keve nava ovara 153 evopoakei’inave: nava anu mu’u keve vepeakape.

¹² Iesu erau voa kuruenave, Pei navai anene. Aivara kapeo iviri kei’inave U erau voa veve’eai, Ni koana? uku oro ipali’inave U Amua kei’inave.

¹³ Iesu paku ai anenave, pu mi’inave, la’a U ekunave; nava awku U orau li’inave.

¹⁴ Pani rere kaiane eire Iesu una aivara paku ai erenave, U imua mere la’avaka’ane.

¹⁵ Oro pei navaka’ane, Simona Petero Iesu erau voa kurunave, Simona, Iona anu mere e, Ni umu‐ikava’i kapoi, ei a’a eiai ni umu mau’u ana? U erau voa kurunave, Lia, Amua e, Ni ipali’ina nai umu‐nikana. Iesu erau voa kurunave, Na mamoe‐ukua ni pei ekune.

¹⁶ Pani rere eire U moawku erau voa kurunave, Simona, Iona anu mere e, Ni umu‐ikava’i? U erau voa kurunave, Lia, Amua e, Ni ipali’ina nai umu‐nikana. Iesu erau voa kurunave, Na mamoe ni pei ekune.

¹⁷ Pani rere kaiane eire U moawku erau voa kurunave, Simona, Iona anu mere e, Ni umu‐ikava’i? Petero lai kukunu awkavakei’inave uku pani rere kaiane U erau voa kurunave, Ni umu‐ikava’i? U erau voa kurunave, Amua e, awku uriria Ni ipali’ina; Ni ipali’ina nai umu‐nikana. Iesu erau voa kurunave, Na mamoe ni pei ekune.

¹⁸ Nai kurunina kapoi, Ni roropaea pani ai ni awre ni pirinave, ni are rokoanave orau ni laikoranave: ni mai?-?vaki pani ai ni eve ni oioka?-?vakana, a’a e ni awre piriakana, ni‐vakaruakana orau ni laikorapea.

¹⁹ Iesu orau kurunave U ipawkiane‐iai Petero onu imua Eloi avioiakana. U orau kuruaka’ane, U Petero erau voa kurunave, Ni e’e’ikane.

²⁰ Petero urukinave Iesu unu naumuki aivara u inamu‐oinave e’e’okamakei’inave: kurua aivara una uku Iesu unu ukari ai keimakei’inave pei pani ai, erau voa kurunave ane, Amua e, anai‐avia vaki koana?

²¹ Petero ei a’a inamu‐oimakei’inave, u Iesu erau voa kurunave, Amua e, ei a’a oiamalimau?

²² Iesu erau voa kurunave, Nai umuliane u rokoai anea’anea Nai vairuane, ni oiamakuru’i? Ni e’e’ikane.

²³ Ei uru upurukiakei’inave aroa a’a awkono avao ai, uru voa eire, ei aivara imuapea: a Iesu orau a‐kurunavea, u imuapea; U erau voa kurunave, Nai umuliane u rokoai anea’anea Nai vairuane, ni oiamakuru’i?

²⁴ Ei aivara u ei a’a u ei awku ioneli’ina, ei voa kikirinave ane: enei ipali’inake una ione miki keina.

²⁵ Awku e aila uakeina Iesu li’inave, awku kavakava kikiriakeia’ane, nai laikorana pani va’au mau’u keina uku buka uriria mako ekuai. Amene.