Ioane 19 - Kuruei Voa Nawawrea 1920

¹ Ou uku eiai Pilato Iesu mi’inave, vaki‐awmi’inave ane.

² Aiau manumanu kiku vei’inave, Una uku upa mere ai’inave ane, aro kapua oro luki‐awmi’inave ane,

³ Erau voa kurunave ane, Ni ouana Isaraela a’a anu amua e! Omo eve kavai oro vaki‐awmi’inave ane.

⁴ Pilato moawku elenave, erau voa kuruenave ane, Akoi’i, nomo paku ai elemaneai nai awkimakina, uku noro ipaliane‐iai namea eria u laru ai nai auina.

⁵ Iesu elemanenave, manumanu kiku, aro kapua ane, luki‐emimakei’inave. Pilato erau voa kuruenave, Akoi’i, a’a ioure!

⁶ Omoro amua a’a, marevaki a’a ane, inamu‐oiaka’ane, oro erau voa araro kurunave, Iri keoa upa mere a’ane, Iri keoa upa mere a’ane. Pilato erau voa kuruenave, Noro verukua awmi’ine, iri keoa upa mere a’ane ane, uku namea eria U laru ai nai auina.

⁷ Isaraela a’a erau voa kurunave, Enei Vupu mi’ina, i Vupu unu voa U imuai limakina, uku U kuruane euna U Eloi inu Mere keina.

⁸ Kurua voa Pilato viriaka’ane u kore ovara kei’inave;

⁹ Voa vevea marea u moawku ikirinave, u Iesu erau voa veve’enave, Ni ekei mere mane? Iesu voa eria kurunave.

¹⁰ Pilato erau voa veve’enave, Voa kuruiai ni lari‐ama‐li’i? Ni ipapeana nai iva mi’ina Ni‐avai iri keoa upa mere, iva awku nai mi’ina ururuniai?

¹¹ Iesu erau voa kurunave, Iva nikuakeiape liane pani muku mere iva eria ni mi’ina: ou uku eiai u ane u ipiriane euna ni eiai u namea ovara mi’ina.

¹² Ou pani mere ururuai Pilato ipia‐mi’inave: a Isaraela a’a erau voa araro kurunave, Ei a’a ni ururuane, ni Kaisara anu a’a peo: a’a kavakava auoina u amua a’a keina u Kaisara anu mani a’a keina.

¹³ Pilato ou voa viriaka’ane, Iesu iki ai u ora’anave, voa vevea pakara ai, mako nawi Rawre oroiakei’inave, u pa’anave, kurua mako onu Heberu nawi Gabata.

¹⁴ Pasova purai inu pei pani liakei’inave, merea anu pani ai; u Isaraela a’a erau voa kuruenave, Akoi’i, nomo Amua ioure!

¹⁵ Oro erau voa laeali’inave, Lai‐awkane, lai‐awkane, iri keoa upa mere a’ane. Pilato erau voa veve’einave, Nomo Amua iri keoa upa mere nai ama‐avamau? Omoro amua a’a erau voa kurunave, Kaisara e ene amua keina, amua e enei miape.

¹⁶ Pilato Iesu ekunave iri keoa upa mere avai. Oro Iesu mi’inave,

¹⁷ Una iri keoa vakarumakei’inave U elenave Gologota ai, Heberu nawi Uku Na’aro Epamu mako ai.

¹⁸ Iri keoa upa mere oro i‐a’anave, a’a rere mo ane, monou Una eve miki mekai, monou Una eve keau mekai, Iesu vimu ai kei’inave.

¹⁹ Ei voa Pilato kikirinave, iri keoa upa mere paikinave ane. IESU NASARETA A’A ISARAELA A’A ANU AMUA.

²⁰ Ei revareva Isaraela a’a aila orainave: uku Iesu iri keoa upa mere avakei’inave pai’iri arekamu ai: ei revareva Heberu voa, Heleni voa ane, Roma voa ane, kikiriakei’inave.

²¹ Isaraela a’a anu omoro amua a’a Pilato erau voa kurunave, Pa kikiriai, Isaraela a’a anu amua; ei voa kikirine, U erau voa kurunave, Nai Isaraela a’a anu Amua.

²² Pilato erau voa kuruenave, Voa nai kikiriane euna nai kikiriane euna.

²³ Aiau Iesu iri keoa upa mere avaka’ane, Una a’a kape oro mi’inave, la’a 4 kokora’anave, aiau kavakava la’a monou awkunave ane; Una piliue ane: Una piliue kapua monou kake?-?reakei’inave, paikia mako eria miaka.

²⁴ Oro erau voa ekinamakei’inave, Piliue enei pa kokoravai, enei vaki ie’enamaki piliue miai: ei awku orau evere’einave uku iaa revareva voa evere’eakeia’ane‐iai, voa orau kuruakeina; Na a’a kape oro kokora’anave, Na piliue eiai oro ie’enave. Ei awku aiau liaka.

²⁵ Iri keoa arekamu ai Iesu unu mei oimakei’inave, Una mei inu aro a’e ane, Maria Keleopa anu a’e, Maria Magadala ane.

²⁶ Iesu Una mei, Una naumuki aivara ane, inamu‐eimakei’inave, arekamu ai oimakei’inave, Una mei U erau voa kurunave, A’e, akoi’i, ni mere ioure!

²⁷ Una naumuki aivara U erau voa kurunave, Akoi’i, ni mei ioure! Ou pani mere kurua aivara Iesu unu mei una marea ai oivirinave.

²⁸ Iesu ipalimakei’inave awku uriria evere’eimakei’inave, uku iaa revareva anu voa evere’eakeia’ane‐iai, U erau voa kurunave, Nai kamuri lavere li’ina.

²⁹ Vana ere iara evopoakei’inave i‐pa‐okavakei’inave: oro mauakapu ere iara evoponave, iri akara anu uri pirinave, Una ane epo ai ai’inave ane.

³⁰ Iesu ere iara miaka’ane, U erau voa kurunave, Oai aku: Una uku U‐vaparia?-?kinunave, imunave ane.

³¹ Uku purai‐lia pani kei’inave, kape iri keoa upa mere keinavaia, sabati inu lare ai, (uku kurua sabati lare iaa lare kei’inave,) Isaraela a’a Pilato nawki‐awkanave imua a’a anu are vepeakeia’ane‐iai, kape iou?-?miakeia’ane‐iai.

³² Aiau anenave, pinai vaki inu are vepenave ane, una a’a ane u kiripai iri keoa upa mere avakei’inave.

³³ Oro Iesu ai aneaka’ane, oro inamu‐oinave U imuakei’inave: Una are oro a‐vepenavea.

³⁴ Aiau monou Iesu unu akane auraea ru’unave, rua mere aro, ere ane, upu?-?nave.

³⁵ Ei voa ione a’a anu voa, una ione voa miki keina: u ipali’ina u voa miki kuruna, uku noro pirimaroakoane‐iai.

³⁶ Uku ei awku liakei’inave iaa revareva voa evere’eiakeia’ane‐iai, Una la’aro monou vepeakeia?-?pea.

³⁷ Iaa revareva voa mo erau voa kuruna, U ane oro ruane euna oro inamu‐ekiaw?-?kavakana.

³⁸ Neko mere ai Iosepa Arimatea, u Iesu unu aivara vauavaua kei’inave uku u Isaraela a’a kore kei’inave, u Pilato nawki‐awkanave u Iesu unu kape iou‐miai: Pilato evere’enave. U anenave, Iesu unu kape iou‐mi’inave ane.

³⁹ Nikodemo awku anenave, u ane u Iesu ai pinai anenave kipere pani ai, imua a’a anu kape kikia muramura u mi‐anenave, muramura anu mu’u 100 pauna kei’inave.

⁴⁰ Iesu unu kape iri keoa mere mimakei’inave, kapua, muramura ane, oro pirinave, Isaraela a’a i’ia opara orau oro li’inave.

⁴¹ Iri keoa mako ai Iesu avakei’inave aura kei’inave; aura laru ai lauoi nawawrea kei’inave, laru ai a’a kapeo i’iakei’inave.

⁴² Oro Iesu i‐inave uku kurua lare Pasova purai‐lia lare kei’inave; lauoi arekamu ai kei’inave ane.