Ioane 15 - Kuruei Voa Nawawrea 1920

¹ Iri miki Nai rokoakeina, iri oiviriai Na Mai uapokoina.

² Na vao kavakava uru meriape liane U iou‐mi’ina: vao kavakava uru merina U akara nawawre eina, u uru aila meriane‐iai.

³ I voa mere Nai ipanakiane euna noro eai urupu keina.

⁴ Nai laru ai noro pokoine, noro laru ai Nai po?-?koinamiki ane. Orau vao verukua uru meriai liapea, u iri laru ai pokoiape liane; orau noro awku uru meriai liapea, noro Nai laru ai pokoiape liane.

⁵ Iri Nai rokoakeina, vao noro rokoakeina: u Nai laru ai pokoina, Nai awku u laru ai pokoina, u uru aila merina: noro Nai mere lai‐naka?-?vakeia’anenoro eria liai li’ina.

⁶ A’a Nai laru ai pokoiape liane, vao orau u laoiakeina, paroro‐liakeina ane. Imua vao a’a roikina, iau laru ai kaiena, oro ruekava‐keina ane.

⁷ Noro Nai laru ai pokoiane, Na voa noro laru ai pokoiane ane, orau noro nawki‐awkavakana, orau liakeiakana noro eiai.

⁸ Noro uru aila meriane, Na Mai avioiakeina; Na aivara miki noro keiakana ane.

⁹ Orau Mai umu‐ika’ane euna, orau Nai umu‐naka’ane euna: Na umu laru ai noro pokoine.

¹⁰ Na voa noro kamaia‐ekava’ane, Na umu laru ai noro pokoiakana; orau Na Mai inu voa Nai kamaia‐ekava’ane euna, Una umu laru ai pokoina ane.

¹¹ Ei voa Nai kurunaiane euna, Nai kopai miane‐iai noro laru ai, nomo kopai evo?-?poakeia’ane‐iai ane.

¹² Na vupu eire, Noro umu‐nakane, orau Nai umu‐naka’ane euna.

¹³ Umu ovara‐mai eire a’a una rokoa awkuai una a’a eiai, a’a kapeo umu e mi’ina ei umu ipi’ipiakeina.

¹⁴ Noro awku uriria liane Nai nakina, noro Na a’a keina.

¹⁵ Ei pani mere nawi aivara Nai naroiapea; uku iaki una amua limakina aivara a‐ipali’inakea: Na a’a Nai naroiane euna; uku awku uriria Nai viriane euna Na Mai mere Nai ipanakiane euna.

¹⁶ Noro ie’i’iape, a Nai ienaiane euna, everenaiane euna ane, noro eleane‐iai, uru meriane‐iai ane, nomo uru keia’ane‐iai ane: uku awku kavakava noro Mai nawki‐awkavakana Na nawi eiai, U nakuane‐iai.

¹⁷ Ou uku eiai Nai nakina, Noro umu‐nakane.

¹⁸ Pani va’au vai’i‐nakava’ane, noro ipali’ina oro pinai vai’i‐ikanave.

¹⁹ Noro pani va’au unu a’a keia’ane, pani va’au una a’a umu‐ekana: uku noro pani va’au unu a’a peo, pani va’au mere Nai ienaiane euna, ou uku eiai pani va’au vai’i‐nakana.

²⁰ Voa Nai kurunainave noro pa aikavai. Aivara una amua upa mere keiapea. Oro mani‐ikava’ane euane, oro mani‐nakavakana ane; Na voa oro kamaia‐ekava’ane euane, nomo voa awku oro kamaia‐ekavakana.

²¹ Ei awku uriria oro nalauakana uku Na nawi eiai, uku U ane U ikaivirinave oro ipaulauape.

²² Nai aneakape livilia, ipekiakape livilia ane, oro namea miakape: a eai oro uku eria mi’ina omo namea eiai.

²³ U ane U vai’i‐ikana, Na Mai awku u vai’i‐awkana.

²⁴ Oro awkono avao ai Nai iaki liakape livilia, iaki a’a e liakape, oro namea miakape: enere Mai ane, oro inamu‐aiane euna, vai’?-?i‐akava’ane euna ane.

²⁵ A uku kurua voa evere’eakeia’ane‐iai omo vupu laru ai kikiriakeina, Oro vai’i‐ikanave, oro uku eria miaka ane.

²⁶ Paioka anea’ane, Mai mere Nai okaiviriakana, U ane U Miki inu Avaea keina, Mai mere elemanena, Nai eiai U ioneliakana:

²⁷ Noro awku ioneliakana, uku pinai pani mere Nai kiripai noro pokoiane euna.