Galatia 1 - Kuruei Voa Nawawrea 1920

¹ Paulo Iva a’a a’a mere a‐okaiviriakei’inavea, i a’a a‐okaiviriakei’inavea, i Iesu Keriso, Eloi Mai ane, u okaiviriakei’inave, Eloi ane U Iesu imua mere la‐okanave;

² Aroa a’a uriria ane nai kiripai pokoina, ei voa enei mere anena Galatia ekalesia eiai:

³ La’aruku, airu ane, nakuakeinameki, Eloi Mai mere, ene Amua Iesu Keriso mere ane,

⁴ U ane Una nane U awkunave ene namea eiai, U iakava’ane‐iai ei lipi pani va’au mere orau ene Eloi Mai umuli’ina:

⁵ Enei avioinamaki opai keiakana. Amene.

⁶ Nai varua’ana noro epua laikimakina U mere, U ane i Keriso onu la’aruku U laea‐alau’unave, Iva voa e noro pirimaroakoamakina ane:

⁷ Iva voa e eria keina; a a’a varomo lai iakari?-?nakamakina, Iva voa Keriso eiai namea liai oro ipia‐mimakina ane.

⁸ Enei naea, aivara avaea naea pani muku mere, Iva voa e mi‐anea’ane, ei Iva voa mikiriape liane Iva voa enei omoro kurunainave, u laoiakeinamoki.

⁹ Kurua voa nai kuruane euna nai kairinani kuruna, A’a Iva voa e omoro kurunaiane, ei Iva voa mikiriape liane kurua Iva voa noro miane euna, u laoiakeinamoki.

¹⁰ A’a anu avioia ana, Eloi inu avioia ana, nai umuli’ina? A’a kopai‐ekavai nai umu‐ama‐li’i? A’a avieiai nai umuliane, Keriso onu aivara a’a nai keiapea.

¹¹ Ovaki airavaki e, nai nakiai limakina Iva voa nai omoro kurunave a’a evere’eapea.

¹² Uku kurua Iva voa a’a mere nai a‐mi’inavea, i a’a nai a‐ipaikiakei’inavea, i erea voa Iesu Keriso mere kurua Iva voa nai mi’inave.

¹³ Na uru noro viriane euna uku Isaraela a’a anu pirimaroakoa voa eiai, Eloi inu ekalesia nai iara mani‐ekanave, laeinave ane:

¹⁴ Na iviri ane Isaraela a’a anu pirimaroakoa voa eiai na kiri a’a anu iviri paku ai kei’inave, na iviri ovara?-?mai kei’inave a’e mai ane enu eni ipawkia voa eiai.

¹⁵ A U ane na kinia pani ai U lai’ikanave, i Una la’aruku U laea‐ilau’unave,

¹⁶ U evere’enave Una Mere nai laru ai ipawkiai, uku lai unuku a’a awkono avao ai Iva voa nai omoro kuruane‐iai; a’a kiripai nai emoki voa a‐ipinavea:

¹⁷ Ierusalema ai nai a?-?inanavea oro kiripai voa ipiai, oro ane oro na pani paku ai iva a’a kei’inave; Arabia ai nai ikirinave, neko mere ai Damaseko ai nai vairunave.

¹⁸ Aumeia rere kaiane periakei’inave, Petero au‐awkuai Ierusalema ai nai inanave, u kiripai lare 15 nai pokoinave ane.

¹⁹ Iakobo Amua anu ovaki nai i‐au‐awkunave, iva a’a e nai inamu‐a‐einavea.

²⁰ Ei voa nai kikirimakina Eloi inu paku ai nai kuruna oro voa miki keina. Arauau voa nai a‐kurunakea.

²¹ Neko mere ai Suria ai, Kilikia ai ane, nai ikirimanenave.

²² Ekalesia Iudea eiei ai na paku a‐ipali’inave:

²³ Ei uru voa e oro viriaka, U ane eni pani ai u mani‐akanave, eai pirimaroakoa voa u omoro kuruna, kurua pirimaroakoa voa u oa’anave.

²⁴ Uku nai eiai oro Eloi kopai‐awkanave.