A RORO KAREA HURI JISAS KRAES I MAK MO ULIA 1 - A LEO KOKONA NOI GOD A LEO HARIKIANA KARAGWA

A heretuva noi Sione a tangaloi na bavtaes tangaloi

¹ Hikani a Roro Karea huri Jisas Kraes*, i Natu i God.

² Mo tinakaki hoki na tangaloi* duruduruki hi i Aesaea mo uli mo viti kwara, “I God u viti kwara, ‘Hika a nogu kaihora. Na horae tomuakinigo, ne takahi na hala huriko.’

³ A tangaloi mo toko kwarekware lo vanua vuroki, mo viti kwara, ‘Tulu vai rarai a hala huri na Hugwe*. Tulu vai bakotoki na hala hi ne huria.’ ”

⁴ Hikani i Sione mo lakalakao lo vanua vuroki, mo bavtaes na tangaloi rusa, mo heretuva mo viti kwara, “Tulu bohi tina nomiu hatiana, tulu lai a bavtaes, vae i God ne domidomi koro na nomiu hatiana.”

⁵ Vunuvunuhi na tangaloi laliki lo vanua doluaki Sutia, vunu vake lo gwatuivanua lakua Serusalem, ramo vanamai vaki maia. Ramo matangwasaraki na noga hatiana, vunu mo bavtaesira lo Kwai Sotan.

⁶ I Sione u lugwaki na lugwa rau kihia kina vulu na kamel, u kwahikwahiki na vinu na buluki, u tuku kani a dio mana meme* na sukabak* na bubu.

⁷ Mo matangwasaraki lakwa na tangaloi mo viti kwara, “A tangaloi ne vanamai takuni tiau aia u lakua karakara siletiau. I nau nahe taritarisa tea vohoki kwara na olo hivo na teri na karo na kaikwokwori na garuna.

⁸ I nau nu bavtaesikamu kina kwai, vae aia neri bavtaesikamu kina Tanungwe Kokona.”

I Sione mo bavtaesi Jisas

⁹ Lo taro hi i Jisas mo vanamai tina gwatuivanua Nasaret lo vanua Galili*, i Sione mo bavtaesia lolo Kwai Sotan.

¹⁰ I Jisas mo galo hake tina kwai, heheriki mo tagai na taetae mo matakahi, a Tanungwe Kokona mo hivo tiluna hoki na ngwaki.

¹¹ Vunu a dilao mo tangi vanamai tina taetae, mo viti kwara, “I nigo i Natugu, a Natu tabe. I nau nu lagwa maiko haburu.”

I Setano mo sinasina rongohi Jisas

¹² Heheriki a Tanungwe Kokona mo kalavakinia vaki lo vanua vuroki.

¹³ Mo hugu takwahini a rani ngavu kaivati, i Setano* mo toko sinasina rongohia. A boboroa ovi aira eia vake takwahini, vae a kaihora tina taetae rau vanamai ramo hago maia.

I Jisas mo tinakaki nona boloki lo vanua Galili

¹⁴ Takuni tina taro hinea ramo lavi Sione, ramo taua lo ingwa na gwarugwaru, i Jisas mo vano vaki lo vanua Galili*, mo heretuvaki na Roro Karea noi God.

¹⁵ Mo viti kwara, “A taroki u taritarisa. A taro hinea i God ne hugwe koro na bulana tangaloi u garagarani. Tulu bohi tina nomiu hatiana, tulu hauhuri lo Roro Karea.”

I Jisas mo kware na tangaloi na reve ika kaivati

¹⁶ I Jisas mo lakao mana Kwai* Tokatoka Lakua Galili*, vae lolona hi mo tagai na tangaloi na reve ika kairua, i Saemon mai tuana i Aduru, raru vohoki na bulagaru kabe tilolo kwai hi.

¹⁷ I Jisas mo viti lakwararua kwara, “Kuru huriau, na huhuikamurua kwara kuru ne kwareki a kaireve na tangaloi.”

¹⁸ Heheriki raru mo tiraki na bulagaru kabe raru mo huria.

¹⁹ Mo lakao kelekele vake mo tagai na tangaloi kairua vake, raru vituatua, i Semis mai Sione i raranatu i Seveti. Raru hugu lo agaga, raru tuku vai huri na bulaga kabe.

²⁰ I Jisas mo tagairarua, vae bulu maia mo kwarerarua. Hikani raru mo tiraki tamagaru lolo agaga mana nona tangaloi boloki maira, raru mo huri i Jisas.

A tangaloi a tanungwe hati luna

²¹ Vunu i Jisas mana nona ngwalagelo ramo lakao, ramo maravuti lo gwatuivanua Kavaneam. Lo Rani* na Mabuana i Jisas mo soro tilolo vale* na tiutangaroa, mo tinakaki mo huhuira.

²² Ramo rongoa, rau idila kina nona huhuiana, huri a nona huhuiana u bakoto, a huirana luna, hete hoki na huhuiana nona tangaloi* kikikila na Uliuli* Kokona.

²³ Kwahaia hi a tangaloi a tanungwe hati luna mo soro tilolo vale na tiutangaroa,

²⁴ mo kakaili mo viti kwara, “!Jisas, ngwera Nasaret! ?Kwara kona vai aha maikami? ?Ku vai kwara kona magarakikami? I nau nu kikilaiko. I nigo a Tangaloi Kokona noi God.”

²⁵ Vae i Jisas mo suri na tanungwe hati hi mo viti kwara, “!Hugu butu! !Ko vano tina tangaloi hika!”

²⁶ A tanungwe hati mo kakaili, mo vai na tangaloi hi a tarabehina mo rurururu, vunu mo vano tiua.

²⁷ A tangaloi aira vunu rau idila haburu, ramo uhiuhi mulekinira ramo viti kwara, “?A havakinau hika? !A huhuiana karagwa! Aia a nona bakotoana eia vake kwara ne hora na tanungwe hati letiu, vae ramo rongohuria.”

²⁸ Heheriki nga a rorona mo ngwalua, mo kwalao dalidali na vanua Galili*.

I Jisas mo vakahiki na tangaloi rusa

²⁹ Lolona i Jisas, mai Semis, i Sione, i Saemon mai Aduru ramo tiraki na vale* na tiutangaroa, ramo vano haragoki vaki lo ingwa i Saemon mai Aduru.

³⁰ I Saemon i gwelikana vavine u ngwalulu huri u mahaki. Lolona i Jisas mo maravuti, heheriki ramo viti lakwae kwara a vavine hi u lenga.

³¹ Hikani mo vano vaki maia mo hago lo kabana, mo tabea mo maraka, a mahakita mo tirakinia. A vavine hi mo maraka mo hago maira, mo bete hinaka lakwara.

³² Mo toko raviravi a mataniaho u soro ba, a tangaloi vunuhira hinea rau lenga maira hinea a tanungwe hati luga, i rabuluiga ramo lavira vanamai vaki mai Jisas.

³³ Vunuhi na tangaloi ramo vanamai tina gwatuivanua lakua hini, ramo vileki tabulutaki lo matakihala na ingwa hi.

³⁴ I Jisas mo vakahiki na tangaloi rusa rau lenga kina lengeana mataroi, vunu vake mo livuti na tanungwe hati rusa, tina tangaloi. Vae he masingeki na tanungwe hati tea kwara rana kwaha, huri rau kikilaia ba.

I Jisas mo heretuva lo vanua Galili

³⁵ Mavukona luirani, vunu mori rani ngwasarasara, i Jisas mo maraka mo vano vaki lolo bubu vuroki hinea a tangaloi tikei eia, mo tiutangaroa takwahini.

³⁶ Vae i Saemon mai rabuluina ratuaki vake, ramo lakao ramo toko soro haroa.

³⁷ Lolona ramo hagwea, ramo viti lakwae kwara, “A tangaloi vunuhia rau tuku soro haroko.”

³⁸ Vae i Jisas mo darakinira mo viti kwara, “Tana vano vaki lo gwatuivanua laliki hike, na heretuva eia vake, huri i nau nu vanamai huri.”

³⁹ Hikani mo lakao doluaki na vanua Galili*, mo toko heretuva lolo noga vale* na tiutangaroa, vake mo livuti na tanungwe hati maira letiu.

I Jisas mo vakahiki na tangaloi a lengeana hati na vinu u vaia

⁴⁰ A tangaloi hinea a lengeana hati na vinu u vaia mo vanamai vaki mai Jisas, mo titiugwao mo kwaha maia mo viti kwara, “Nu kikilai kwara kona vai lai kona vaiau na ngwasara taliku, vae nahe kikilai tea kwara ku masinge diko hetea.”

⁴¹ I Jisas lolo domina u hakavia haburu, mo hokaki na kabana, mo kihia mo viti kwara, “Nu masinge. Ko ngwasara.”

⁴² Heheriki a lengeana hi mo tikei tiua, mo ngwasara.

⁴³ Vunu i Jisas mo korokorotia, mo horae mule heheriki.

⁴⁴ Mo kwaha maia mo viti kwara, “Konahe viti tea vohoki lakwa na tangaloi. Aia vae kona hena bakotoki vaki mana tangaloi* lingilingi, ne taga vivilokinigo. Vunu komo bete nomu hilehile lakwai God hokinia hinea i Mosis mo viti, ne vosangi na tangaloi savia kwara i nigo hika ku ngwasara.”

⁴⁵ Vae a tangaloi hi mo lakao tiua, mo tinakaki mo viti na roroki laliki vataha na mahagweki. U viti huria haburu kareaki, vae i Jisas he vano lai tea vaki na ngwasara lo gwatuivanua. U hugu gegeaki lo vanua hinea a tangaloi tikei eia, a tangaloi rusa vataha na mahagweki ramo toko vanamai vaki maia eia.