TAETAS 1 - Havai Niu Testamen

¹ Ineu Bol, a tangaloi tabanagi noi God ko a gaihora noi Jisas Kraes. I God u horau ve nain bului na ladohogo nora sinobu hi u leowahera ko ve nain buluire ve rain ilo na hogo ngehi mo haharagi lawe na sinobu ve rain tabanagi lawe God mwerehilogo.

² A ladohogo hi ko a iloilo ngaha mo vanai dena ladotare huri na mwasoana tavagituei, ngehi i God u warataugi teu lawe gide siu a mobei tau vuigi, ko i God vin he kali lei tea.

³ I God u siregi lawe na ure mo ilo huri na mwasoana ngaha lo Roro Garea hi mo waregi serea. Ingeie u lado tau luku huri na tabana ngaha, ko ineu nau waregi sere, na roro hi mo huri na leohora noi God hi a noda vagamwasoi.

⁴ Lawe Taetas, i netuku hogo lo ladohogo hi gorom waheginie a hogogi ko a tamwata dein God i mama ko i Jisas Kraes a noda vagamwasoi.

A tabana noi Taetas lo vanue Krit

⁵ Ineu sireginigo lo venue Krit huri ve goin vei vagasigi na gineu ngerehi, a taranigi garagara ve rain rovo ko huri ve goin rivu re ta maragai lolo togagi venue doluegi vin hurie mwerehi nau veve lawego.

⁶ A tamaragai i vin mwasara dena gineu rau esi, vin toga mei gahorana gatagale hogosie, ko i re netune rain labe siaga lo ladohogo. A sinobu rain mese ilora ve a dorire rau mwere na turui tangaloi ko rahe bulubulu tea.

⁷ A tamaragai a henana vin mese asi tare ve ingeie mo labe tomuegi lo tabanagi noi God, ingeie vin mese bugure, sige vin mese meromero siseri. Ingeie vin mese inu lawagi na waen, vin mese tarani vena gilu, sige vin mese vaileo ve na mwerai homu lune mo lamaginire wai tangaloi.

⁸ A tamaragai vin gesegi ve vin lei vurugegi hine tea mo vanai lobena, vin tabe na gineu ngehi u garea, vin mataisao, vin toga lo mwasoana u vovohoi, ko u gogona ko vin hakobibi na domine.

⁹ Ko vena saga tatakau lo leo hi u vovohoi ve dain lado talune mwerehi gam bete na leo huhui hurie, a tamaragai vin bului na sinobu gina leo huhui hogo ko vin haharagi lawe rahine hi ram qalo goro na leo huhui hogo, huri ve ingere rau vagasile.

¹⁰ A sinobu u sao rahe masinge tea ve rain bulubulu, ingere ram laqagi na gineu mwasarugi ko ram tomuegi rahine wagineu sulo matahala he vovohoi tea, hageliu irahine hi ram veve ve ihine ngerehi hatie duvi Israel rain lei na teve gigilegi.

¹¹ A sinobu ingere ngaha rain siregi ko rain mese laqa mwerehi a vevenagi ingere ram tau gaivutugi na sinobu doluegi huri ram bete na leo huhui lo gineu ngehi vovohoi tea ve rain huhuire ginie, ram vai mwerehi huri ram lamagi na sinobu ko mo vaire ram mwerai homu.

¹² Huri a nora tangaloi ligoligogi gatagale u veve vena, “Ingere ta Krit ram kalikeli tamwere, rau mwere na kakarue asi, ingere a sinobu rau huri wirige, rahe vai te gineu nge ram gagani hogosie.”

¹³ A leo ingere a tangaloi ligolgigogi i vevera a hogo. A leo ngerehi mo veve siagagi lawera vi ingere rau vagasile, siu ingere rain huire hogosie lo ladohogo.

¹⁴ Ingere rain mese rorongtagi na leo kalikeli nora duvi Israel ko a Leo hora nora sinobu hi ram rahagi na hogo.

¹⁵ Lawe rahine rau mwasara, a gineu doluegi rau mwasara, nge lawe rahine ram hora gina galegaleasi ko rahe ladohogo tea, a gineu he mwasara tea hurire. A domire ko a rongrongora rau esi vohogi.

¹⁶ Ingere ram veve huri ve rau ilo God, nge a havagineu ram vai mo haharagi ve ingere ram rahagi rain ronghuri, hatie gineu lure, hatie gineu garea ve vin vanai denire.