JEMIS 5 - Havai Niu Testamen

A leo matagutegi lawe na mwera homu

¹ Igimiu ira mwerai homu nein rorongtagi, igimiu hi nein ngara ko nein tangi a vevenagi a gineu esi vin hogosi gimiu.

² A nomiu mane rau mabobo beno ko a bebe rau geni tangtau na luqemiu.

³ A nomiu gol ko a silva rau deire. A dairegi hi vin voragi na gigilegi lawe gimiu. Siu vin gao na tarabesimiu mwere na avi. Ingeie gimiu nem hogoni vunigi na nomiu matai hako gineu tau mosigei huri na rovonai bongi.

⁴ Igimiu nehe masi nge tea ve nein voli na tangaloi ram tabana lolo talumiu, ko ngaha a bugui gaivoli ngehi nehe volire tea ram ulo ram tau na bugugi lumiu. A ngaraana nora tangaloi tabana hi rau weli na mwasi bulemiu rivurivu u dadari lolo qeroi God Managi.

⁵ Lune igimiu nem toga mosigei lolo ure, nem lado huri na taqangimiu vena horo ko nem hakovi na gineu hi a manera rau lalawua doluegi. Siseri ngaha igimiu neu mwerena bulugi hi rau damoe ram vano lo tantanogi hi ram durure aie ve ran durure.

⁶ Igimiu nem vevegi asiesigi ko nem vagamate na sinobu hi rau vovohoi rahe vai na gineu esi tea, ingere rahe qalo tea mei gimiu.

A Leo huhui hala Saosao

⁷ Retueku, igimiu nen toga rongribi vin dadari a Huqe vin vonai taligu. Igimiu nein lehi na tangaloi geligeli talu. Ram rarai gina rongoribi huri na uhei gai tevutevu ko a uhei udu ko lo tagugi hi a rivurivu garea ram mwaso den tano.

⁸ Siu igimiu nen rongribi mwere ire tangaloi geligeli talu hi ko nen mese dom wiriwiri, a vevenagi a Huqe vin vonai vin siseri.

⁹ Nen mese singo tatabegi gagatagalegi gimiu vaiteu i God mo vevegi gimiu. Leoi vevegi u labe beno lo mataivale.

¹⁰ Retueku, igimiu nen huri lo taikerure tangaloi ligoligogi hi ru laqa lo henai Huqe. Ingere ram gagarasi ko ingere ram rongoribi.

¹¹ Igamai gau veve beno huri ve tare nem wali na gagarasi tuturedu, ngehi a vaigarea dein God. Igimiu nein lado haqe huri i Job u rongoribi. Siu lo vagasigi, a Huqe u veigarea ginie a vevenagi a Huqe u hahagavi ko u lolo garea.

Goin domi siu gom laqa

¹² Retueku, igimiu nein mese haharigi vohogi. Nein mese haharigi nem ware na ute ta eulu sige a ure, sige a gineu te wagineu vage. A nomiu io, a io hogo. A nomiu Hatie, a hatie hogo. Nein mese veve gimiu vage vaiteu nem vano lo vevegi.

A huireana nona tataro

¹³ ?Wa lavasigi dein gimiu ram toga romasi. ?Igimiu nein tataro. ?Wa lavasigi dein gimiu ram havuhevu? Igimiu nein huri Roro Garea lawe God.

¹⁴ ?Wa lavasigi dein gimiu ram sege? Ingeie vin ware ra tomtomuegi ta lolo warelue. Ingere rain tataro hurie ko ingere rain vurei gina vurei bonbon lo henai Huqe.

¹⁵ Tare ve igimiu nem tataro gina ladohogo huri na sinobu ram sege, ingere rain mwaso. A Huqe vin vagamwasoire tare ingere rau galegaleasi, ingeie rain ladovohogi na bugure.

¹⁶ Siu igimiu nen vui ladovohogi na bugumiu. Nen tataro huri gimiu gagatalegi siu huri igimiu nein mwaso. A tataro nona tangaloi vovohoi u huire garagara ko u managi.

¹⁷ I Elaeja ingeie a tangaloi mwerei gide. Ingeie u tataro huri na uhe ko he uhe tea huri na higao gaitolu mautugi.

¹⁸ Siu ingeie u tataro taligu ko a uhe mo soi den mahava ko mo vai na ririvue ram mwaso.

Igide dain lei na sinobu ngerehi rau vano dena leo hogo, ve ran vanai taligu

¹⁹ Retueku, tare ve ihine tea dein gimiu ram ahu beragi dena matahala hogo, igimiu nein veileo ve nen tomueginire tavanai taligu.

²⁰ Igimiu nein ilo vurugegi tare nem vai na tangaloi galegaleasi ram tudori den nora doridori esi, igimiu nein vagamwasoire den mateana ko a nora galegaleasi u sao rain meriqe.