JEMIS 4 - Havai Niu Testamen

Irahine ram huri Kraes ko a ureure

¹ A qaloana ko a vuigaro mo eno mei gimiu. ?Ingere ram vanai logo? Ram vanai dena taratarani esi hi ram qalo mena tarabesimiu. ?Sige hatie?

² Igimiu nem tarani na gineu nge nehe laie tea, siu mo garasi gimiu ko nem vai vagamate na tangaloi huri! Igimiu nehe lai na gineu tea hi nem taranie mosigei giniehi mo vai gimiu nem vui garogi ko nem qalo. Igimiu nehe laie tea a vevenagi igimiu nehe navue tea dein God.

³ Nge tare ve igimiu nem navu na gineu dein God, nehe laie tea a vevenagi igimiu nem tataro huri na gineu ra he vovohoi tea, mo huri na nomiu taraniana sibomiu.

⁴ Igimiu nem mwerena tangaloi hi mo vai na galegaleasi talo bakabaka. Igimiu nehe ilo tea ve tare nem voragi buluana lawe na ure, igimiu ira tavului vuro noi God. Siu tare ve igimiu nem vaileo ve nein voragi buluana lawe na ure, nem tau gimiu sibomiu nem voragi tavalui vuro noi God.

⁵ ?Wa igimiu nem lado vurogi gina Reve reve Gogona ngehi mo veve vena, “I God mo lado siaga garagaragi huri na vui ngehi u mebuhegi sulo lolo loloda.”

⁶ Nge i God mo lolo gareagi gide u liu, giniehi a Reve reve Gogona mo veve vena, “I God mo qalo meire doluegi hi ram sagesagera, nge i God mo vaivei garea lawera hi ram lado biti ginire.”

⁷ Nen siregi gimiu sibomiu lawe God, nge nen qalo siaga goro na Vui Esi ko ingeie vin toa dein gimiu.

⁸ Igimiu nen vanai kakarani lobei God ko i God vin vanai kakarani lobemiu. Igimiu ira tangaloi galegaleasi nen solo mwasaragi na limemiu! Igimiu a tangaloi lado gairue, nen vai na taqangimiu ran mwasara.

⁹ Siu na garasi gimiu ko nen hahagavi garagara! Nen dohi ko nen tangi! Nen leahi na nomiu mangaana sulo tangiana. Nen leahi na nomiu havuhevu sulo hahagavi.

¹⁰ Igimiu nen vai wuweugi gimiu lo nagoi Huqe ko ingeie vin lei hagegi gimiu.

Iniko hate huri ve goin vevegi

¹¹ Retueku, nen mese vevegi gagatagalegi. Tare gom vevegi sige gom tau na bugui gineu lui tuemu, iniko gom vevegi na tau leo sige gom tauteu esi lo tauleo hi. Tare ve gom vevegi na tauleo, iniko hate tangaloi tabetabe. Iniko gom voragi na tangaloi vevegi.

Iniko hate huri ve goin vevegi

¹² I God hogosie mo lawua goro na tauleo, ko ingeie a vevegi hogosie. I God ingeie hi mo vaga mwasoi ko ingeie hi mo vai vohogi. Siu iniko hine ve goin vevegi tuemu?

God na vai na domiana huri na nom mwasoana

¹³ Nen rorongtagieu, igimiu a sinobu hi nem veve vena, “Gaqarigi sige mavugo dain vano lolo togagi venue lawua te logo ko da vai na tabana aiehi huri na higao gatagale huri da vai na mane na lawua.

¹⁴ Nge nehe ilo tea ve a havai vin vei mavugo! ?Igimiu neu ilo huri na mwasoamiu mwere hilogo? A mwasoamiu u mwerena tangtango hi mo tango mahogi qilodo ko siu mo matahara taligu.

¹⁵ Nge huri ve, igimiu nein veve mwere ngaha vena, “Tare ve a taraniana noi God, gide dain mwaso dain vei na gineu nge ngaha sige ngehi.”

¹⁶ Nge siserigi ngaha a dom sagesage mo eno mei gimiu ko a haurorogi huri na havagineu hi nem lado ve nein veie. Siu haurorogi mwere ngaha u esi.

¹⁷ A hava tangaloi tea hi u ilo na gineu garea ve vin veie, nge he vaie tea, a tangaloi hi mo galegaleasi.