Hebrews 1 - Hawa Naga Bible 2001

Vsaz maq Vtvlvy kuq Tishox Bomc

¹ Mvnnuex pat nuex Tishox rueq naungshiq jix vwaz tamx muex paunghvlc lauk phvnx ruip saz kuex shvmmax bix maq raz tueq tvkhic wvnc tueq,

² yuq muinz vruex vtvsuip raungnuiyq nuex Vsaz maq naungshiq rulc rvbomc phuex. Vsaz maq raungx vghaq lotlaz tvdung sung ruiux, vtvsuip nuex phvnx ruip saz guimz jix waz yaungc vpiq kuex thvl taq shec tueq.

³ Vpiq kuex Tishox ngauz vngax maq phelez httax yaq, vpiq kuex Tishox shvmx vrvmx yac yaungx ruiux, vpiq luimc vkawc mvrc yaq bomjungc maq raungx vghaq kuex tv-phaungx ngaungx taq tueq. Vpiq rueq miqsaz htenc mvrax wawc tvdungc wvnc tvkoc shuimc tvlot yix maq, raungmungx nuex Luimc Vkawc Yunghvlc Tishox yaukkeq kox nuex ngaungc yaq.

Tishox Saz Yungc Loayc lvmz

⁴ Vsaz muex Tishox rueq vkuq muingc jungc kuex raungkamx bix muingc htauk nuex muinz yunghvlc rvtueq rulc rv-ngvlc, Vsaz kuex raungkamx bix htauk nuex muinz pinhtumc yunghvlc.

⁵ Yvmx khoc lac ngoz ruiux lec Tishox rueq raungkamx bix mruex jix muex muinz, “Mnoz kuex Isaz rvtoq; majuiuc raungnuiyq dvyx Ngaz kuex m-Waz muex yaungx wvnc vtaungx,” ngoz tueq muinz, kvmaq Tishox rueq mruex jix raungkamx waz muex muinz, “Ngaz kuex vpiq Waz yaungx taungx, vpiq kuex Isaz muex yaungx tuex,” ngoz tueq muinz ngoz muq doc.

⁶ Yuq muinz Tishox rueq Vsaz pekhux waz kuex mungkawx nuex tvkay dvnc tueq nuex, “Tishox raungkamx bix lotlaz rueq kvruex waz kvmac nawk palx wuez shuex,” ngoz tueq jungx tueq.

⁷ Tishox rueq raungkamx bix lvmz jungx tueq kuex, “Tishox rueq vpiq raungkamx bix kuex raungguil ikhoc tvyaungc tueq, vpiq nvrc waz hez kuex wvrluic tuz ikhoc tvyaungc tueq,” ngoz tueq.

⁸ Vsaz lvmz jungx tueq nuex, Tishox rueq, “O Tishox lex, mmungtan kuex pattup pat-sac phaungx ngaungx wvnc tuex! Mnoz rueq mmiqsaz htenc kuex tvrac vlvmz maq guimz lawc vshuiux.

⁹ Mnoz rueq vlvmz kuex lungwawx ruiux, vyaq kuex shuiuc gay vshuiux. Kvkhoc rvtueq m-Tishox ngoz yaq Tishox rueq mnoz kuex thvl wvnc vtueq, mkungjix muex kuq tueq htauk nuex muinz vyungx pinhtumc vkoz vkez tvtsanc nganc tueq,” ngoz tueq.

¹⁰ Kvmaq vpiq rueq, “Taungjix lex, vphaungc vyaungc nuex ghaq kuex tvdung sung taq toq, m-yauk maq raungx kuex tvdung sung taq toq.

¹¹ Kvruex htenc kuex vmoz rvwvnc tuex yuq muinz mnoz kuex phaungx duing dvyx rvtuiux; tsuingshiq lotlaz kuex khoz vkhvy ikhoc jez wvnc tuex.

¹² Mnoz rueq hungyungx ikhoc kvruex htenc kuex tul gay shuiux, khoz vkhvy ikhoc layc gay tsuingshiq rvhumc tuex. Yuq muinz mnoz kuex mkaq muinz rv-ngvlc dvyx, mrullungx muinz vhtumx ngoz tueq vguez.”

¹³ Tishox rueq mruex raungkamx bix muex muinz: “Mralx htenc kuex m-yaz phac khung nuex ngaz rueq tvyaungc shaungx nuex httuiuc laz, ngvy vkeq kox nuex ngaungc kuiuz,” ngoz tueq ngoz muq doc.

¹⁴ Kvkhoc ngoz ruiux raungkamx bix kuex ukhaq lac rvtvnx? Tsuingshiq kuex palc daungc wvnc rvhumc jix htenc muex romc kuy tvkoc Tishox rueq vtvkaz bomc nvrc siyac htenc dvyx rvtueq.