Pilimun 1 - Hanunuu

¹ Inda ti may surat si Pablu, ti napirisu dahil ngani sa kan Kiristu Hisus, hanggan kanta patar-ari si Timutiyu. Inda pag surat tag sa kanmu, Pilimun, sa kanmi pagmahalun pag kaawat sa buruwatun,

² hanggan diman sa iglisya magtiripun sa kanmu balay, hanggan sa kanta patar-ari babayi sa kan Apya, hanggan sa kanta kaparihu sundalu sa kan Arkipu.

³ Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu.

Kay Pagmahal hanggan kay Pagsarig ni Pilimun

⁴ Pirmi duy aku magbaya sa kang Diyus kada kawu kang pag-idarangin,

⁵ dahil nabaritaan niku kanmu pagsarig sa Panginuun Hisus hanggan kanmu pagmahal sa tanan manga nasakupan Diyus.

⁶ Pag-idarangin niku ti pagsarig nimu parihu sa kanmi mamurak lubus sa pag-intindi sa manga kaayadan burak nita magkarausa sa kan Kiristu.

⁷ Patar-ari, lubus aku nagbaya ag nagmasulung maan kang naisipan, pagka naalaman niku kuntay dinmasig maan ti naisipan manga nasakupan Diyus dahil sa kanmu pagmahal.

Magpakihampang si Pablu tungkul sa kan Unisimu

⁸ Dahil sa kanta pakiusa sa kan Kiristu, mahimu mana aku magpaanyu sa kanmu, Pilimun, kuntay tupada yi lang nimu inda.

⁹ Dapat dahil sa kang pagmahal gid sa kanmu, nakan lalu kang gustu magpakihampang gid sa kanmu inda. Aku si Pablu, bilang usa ka gurangun, ti sinugu ni Kiristu Hisus, madi taynguna aku usa ka pirisu dahil sa kanya.

¹⁰ Aku magpakihampang mana sa kanmu tungkul sa kang pinagkaanak, tungkul sa kan Unisimu. Dahil siya kang naabay sa pagsarig kang atay sa pirisuhan.

¹¹ Nu kaybi unman duy napakinabangan nimu siya, dapat taynguna una kawu una aku may pakinabang ngap sa kanya.

¹² Siya kang yi maan ipabalik tabug sa kanmu ga kang yi ipadara kang buu tagipusuun sa kanmu.

¹³ Gustu gid mana niku siya udyi gid ipalakaw niku ginan sa kang arani hampay siya ga kailis nimu magsirbi sa kangku hanggan aku sa pirisuhan waya dahil sa kang magtudlu Mayad pag Barita.

¹⁴ Dapat dayu diman waydi aku mag-ampara sa kanya nu unman kawu pumasnu hampay balaw waydi sa pilitan kanmu awat sa kangku, nu unman sa buluntad nimu pag kagustuhan.

¹⁵ Banta sitay niblag ngalay-ngalay sa kanmu si Unisimu hampay nu bumalik maan siya sa kanmu, kanmu yi gid iribahun siya hanggan di aban.

¹⁶ Bukun yi nimu masabi panawuhun nu unman kanmu yi pagmahalun pag patar-ari. Lubus gid pagmahalun niku siya, dapat ay kanmu pagmahal sa kanya balaw lang ga kang pagmahal sa kanya, dahil balaw lang kanmu panawuhun nu unman ngap patar-ari waya nimu siya sa Panginuun.

¹⁷ Tanggapa maan nimu si Unisimu parihu sa kanmu magtanggap sa kangku, nu pagpahalgaan nimu kanta magpakiusa sa kan Kiristu.

¹⁸ Nu abi nangus siya nagkasala sa kanmu, aw ngatay may utang man, sukta yi lang nimu tunda sa kangku.

¹⁹ Aku ti may surat inda, si Pablu. Aku ngani ti bumayad sa kanmu. Udyi lang gustu niku banggitun kuntay ga utang nimu sa kangku kanmu bag-u buhi sa kan Kiristu.

²⁰ Magpakihampang gid aku sa kanmu dahil ngani sa Panginuun, pasnui gid duy kang pagsabihun sa kanmu. Pakan-i nimu masulung pag kabayaan kang tagipusuun, dahil kawu yi waydi kang patar-ari sa kan Kiristu.

²¹ Tutuu aku magsarig kanmu gid buwatun subra waya sa kang isinurat inda.

²² Aku handai yi gid kang madayunan, dahil aku magsarig yi gid pihu yi pahintulutan Diyus aku makabalik asan tabug sa kanyu, parihu diman sa kanyu paghagadun sa Panginuun.

Manga Pangatapusan pag Bilin

²³ Magpaingana si Ipapras nu kabitay kawu duy asan. Minsan kabay kami napirisu dahil sa kan Kiristu Hisus.

²⁴ Hanggan sida ni Markus, ni Aristarku, ni Dimas, ni Lukas manga kaibahan niku sa buruwatun, magpaingana waydi sa kanmu nu kabitay asan kawu.

²⁵ Pagsa kanyu ti papalad Panginuun Hisu-Kiristu.