غلاطية 1 - Hijazi New Arabic Version1 من بُولُسَ، وهوا رسول، مو من جهة الناس ولا بسلطة آدَمِي، لكن بِسُلطَة يسوع المسيح والله الاب اللي اقامو من بين الاموات، 2 ومن كلَّ الإخوة اللي معايا، إللين الكنايس في مقاطعة غلاطية۔ 3 ادعو ليكم بالنِعمة والسلام منَ الله أبونا والرب يسوع المسيح، 4 اللي ضحَّى بنفسوعشان ذنوبنا عشان ينقذنا من العالم الحاضرالشرير، اللي بيمشي مع مشيئة إلهنا وأبونا۔ 5 المجد ليه إلى أبد الآبدين۔ آمين! مو بإنجيل ثاني 6 عجيب! كيف تتغيرو كذا بذي السرعه على اللي ناداكم و دعاكم بنعمة المسيح، وتروحو لإنجيل غريب؟ 7 ما أقصد انو في إنجيل تاني، لكن في ناس تِفَتن بِينَكُم، يبغو يحرَّفو إنجيل المسيح۔ 8 بس، حتى لو ِإحنا بشرناكم، او بشَّركم ملاك من السما، بإنجيل تاني غير اللي بشرناكم بيه، إذا عليه اللعنة! 9 وزي ما قلنا من قَبِل، وأعيد الكلام دحين كمان: اذا كان في واحِد يبشركم بإنجيل غير اللي وافقتو عليه، يكون ملعون! 10 طيب يعني أنا دحين أحاول اني اكسب موافقة الناس أو الله؟ والا شايفيني جالس اطلُب من الناس يرضو عني؟ لو كان كذا بس همي أرضي الناس، ما كنت اكون عبد للمسيح! دعوة الله لبولس 11 وأقوللكم وأخبركم، ياإخواني، انو الإنجيل اللي بشرتكم فيه مو انجيل بشري۔ 12 لا أنا اللي اتسلمتو من إنسان، ولا إتحفَّظْتو، بالعكس جاني بإعلان من يسوع المسيح۔ 13 وانتو سمِعتو قصتي اللي فاتت في الديانة اليهودية، كيف كُنْت أضطهد كنيسة الله متشدد مرَّه، وناوي على تخريبها، 14 وكيف كنت متفوق مرّه في الديانة اليهودية على كثير من اولاد جيلي في أمتي لاني غيور اكثر منَّهُم بالمره على تقاليد آبائي۔ 15 بس، لما رضي الله، اللي اختارني وانا في بطن امي بعدين دعاني بْنِعْمَتو، 16 انو يعلن ابنو فيّا عشان أبَّشَّر فيه بين الأمم، و الوقت اللي ما كنت فيه لحم ودم، 17 وما طلعت الين أورشليم عشان اقابل اللي كانو رُسُل قَبلي، لكن رحت لبلاد العرب، وبعد كذا رجعت لدمشق۔ 18 بعدين طلعت لأورشليم، بعد ثلاتة سنوات، عشان اتعرف على بُطْرُسَ. وفِضِلت عندو خَمسْطَعْشَر يوم۔ 19 بس ما قابلت أحد ثاني مِنَ الرُسُل الاّ يعقوب، أخو الرب۔ 20 واللي اكتبو ليكم هنا، وانا قدام الله، ما أكذب فيه۔ 21 وبعد كذا، جيت الين بلاد سورية وكيليكية۔ 22 ولإني ما كنت معروف عِند الكنايس اليهودية اللي في المسيح۔ 23 و لكن كانو بس يسمعو «انو اللي كان أوَّل بيقهرنا ويذلنا، يبشر دحين بإنجيل الايمان اللي كان يحاول يخربو قبلِ كِذ!» 24 وكانو يمجدو الله بسببي۔ |
Hijazi New Arabic Version © 2024 Strategic Resource Group
Strategic Resource Group