أفسس 5 - Hijazi New Arabic Version

¹ وسووا إذاً زي الله كانكم عيال حبايب،

² وامشو في المحبة على أخلاق المسيح اللي حَبَّنا وضحى بنفسو علشاننا أضحيه وذبيحةً لله ريحتها طيبةَ.

³ أما الزنا، وكُل نجاسة او شهوة مفجوعة، ما يتذكِر بينَكُم حتى إسمَهَا، زي ما بيناسب القديسين۔

⁴ وكمان الوساخه والكلام السخيف والهَلْس، حاجة مو حلوة۔ والأحسن ليكم انكم تتكلموا بالشكر لله!

⁵ إنتو تِعرِفو ذا الشي كويس: إنو كل زاني أو نِجِس أو صاحب شهوة، ما هوا الاَّ عابد اصنام مالو ميراث في مَلَكُوت المسيح والله۔

⁶ ما يضحك عليكم أحد بكلام باطل! و علشان ذي الحاجات بِيٍنْزُل غضب الله على عيال العصيان۔

⁷ طيب، لا تكونو شركا ليَهُم.

⁸ بس كنتو في الماضي ظالمين، بس انتو ذحين نور في الرب إمشو بأخلاق عيال النور.

⁹ لإنو ثمر النور بيكون في كل صلاح واستقامه وحق.

¹⁰ كذا تعرفوا الحاجات اللي بترضي الرب۔

¹¹ كمان ما يكفيكم بإنكُم ما تشَاركو في اعمال الظلام اللي ما منها فايده، بالعكس أفضحوها كمان.

¹² الحاجات اللي بتسووها بالسِّر، حتى الكلام فيها وِحش.

¹³ و انو كل شيْ، إذا ما فضحوَ النور، بيصير مكشوف:

¹⁴ لأنو اللي يكشف كل شي هوا النور علشان كذا بيتقال: «إصحى يا نايم، وقوم من بين الاموات، فبيشرق عليك نورَ المسيح!»

¹⁵ فانتبهو تماما كيف تتصرفو بطريقكم بتركيز، مو زي تصرف الجاهلين بالعكس بتصرف العاقلين،

¹⁶ واستغلو الوقت احسن استغلال، لانو الايام شريرة.

¹⁷ عشان كذا لا تصيرو اغبيا، وافهمو ايش اللي يبغاه الرب.

¹⁸ لا تسكرو بالخمر، لأنو فيها خلاعة، بس إتْعَبُّو بالروح،

¹⁹ مِكلمين بعضَكم بمزامير وتسابيح واناشيد روحية، مرنمين ومرتلين بقلوبَكُم للرب؛

²⁰ رافعين الشكر كُل وقت وعلى كل شي لله والآب، باسم ربنا يسوع المسيح؛

²¹ خاضعين مع بعضكم في مخافة المسيح.

وصايا للبيت المسيحي

²² يا زوجات، اسمعوا كلام أزواجَكُم، زي ما هو للرب.

²³ لأنو الزوج هو راس الزوجة وكمان المسيح هو رأس الكنيسة (جسمو)، وهوا نفسو مخَلِّص الجسد.

²⁴ وزي ما انو الكنيسة خضعت للمسيح، كمان الزوجات لأزواجَهم، في كل شي.

²⁵ يا ازواج، حبو زوجاتكم زي ما حب المسيح الكنيسة وضحى بنفسو علشانها،

²⁶ عشان يقدِّسها ويطهرها يغسلها بالمويه، بالكلمه،

²⁷ علشان يزُفَّها لنفسو كنيسة حلوة مافيها عيب او تجاعيد أو اي حاجة ناقصة بالعكس بِتكون مقدَّسة مافيها عيوب.

²⁸ على ذا الموال لازم على الازواج إنهم يحبو زوجاَتَهُم زي أجسامَهُم۔ اللي بيحب حرمتو، بيحب نفسو۔

²⁹ مافي أحد بيِكره جسمو أبدا، بالعكس بيأكِّلو ويهتم فيه، زي ما بيعامل المسيح الكنيسة كمان۔

³⁰ فإحنا أعضاء جسمو.

³¹ علشان كذا بيستَقِل الزوج عن ابوه واموه، ويتَّحِد بحرمتو، ويصيرو الاثنين جسد واحد۔

³² ذا السرعظيم بس انا بنصح فيه للمسيح والكنيسة!

³³ بس انتو كمان، كل واحد مع نفسو، خلي كل واحد فيكم يِحُب حرمتو زي ما يحُب نفسو بس الحرمه، عليها انو تهاب زوجها.