أفسس 3 - Hijazi New Arabic Version

خطة الله الكبيره عشان الامم

¹ وعشان كذا، انا بولس سجين المسيح يسوع عشانكم انتو يا ناس،

² باعتبار انكم سمعتو بتدابير الله اللي اعطاني هي عشانكم:

³ وكيف كشفلي السر عن طريق الوحي، زي ما كتبت من اول وأوجزت،

⁴ وتقدروا، لما تقرو اللي كتبتو، انكم تستوعبو اللي اتعلمتوا عمق عن سر المسيح،

⁵ هذاك السر اللي ماحد دري عنو من الناس من الاجيال اللي قبلنا زي ما انتشر عنو دحين بوحي الروح لرسلو القدييسين وأنبياؤه:

⁶ اللي ماهم يهود بيتشاركو مع اليهود في الورث، و اعضاء معاهم بالجسد، ولهم حق إنهم يستفيدوا من الوعد كمان. و ذا في يسوع المسيح بفضل الإنجيل

⁷ اللي انا صرت خادم ليه بنعمة الله اللي رزقني هي بعمل قدرتو.

⁸ وليا، انا أصغر من اصغر واحد في القديسين كلهم، اتوهبت لي النعمة هادي: إني اعلن بين البشر غنا المسيح اللي ما لو حد،

⁹ وأنوّر على الكل بمعرفة حقيقة تدبير السر اللي خلاه الله، خالق كل شي، متخبي على كل الأجيال.

¹⁰ و الهدف عشان يترفع دحين قدام الزعامات والسلطات في السموات هو اللي بيظهر في الكنيسة من حكمة الله اللي لها اكثر من وجه،

¹¹ زي ما جا بالمعنى اللي ما ينتهي اللي قصدو الله في المسيح يسوع ربنا،

¹² اللي بيه لنا جرأة وقربه واثِقه بسبب الايمان فيه

¹³ عشان كذا بطلب منكم انو ما يقل العزم عندكم عشان المصاعب اللي بقاسيها عشانكم، وهيه حاجه تفتخروا فيها.

صلاة لأهل أفسس

¹⁴ وعشان كذا أنحني على ركبي للأب

¹⁵ اللي هو أصل لكل أبوه في السماوات وفي الأرض،

¹⁶ عشان يديكم، على حسب غنى مجدو، ويمد لكم روح الكيان الداخلي لكل واحد منكم بالقوة المؤيدة،

¹⁷ عشان يعيش المسيح في قلوبكم بالايمان؛ عشان اذا اتأصلتو وكبرتو بالمحبة،

¹⁸ تصيرو قادرين تستشعرو و تعرفو، مع القديسين كلهم، ايش هوا الطول و العرض والتعالي والتعمق،

¹⁹ و تعرفو محبة المسيح اللي هيه تتفوق على المعرفة، فتتملّوا إلين تصيرو مليانين بكل كمال الله.

²⁰ و اللي يقدر يسوي، زي القدره اللي متحركة فينا، اللي تتعدى من غير حدود كل اللي نطلبو و نتصورو،

²¹ لوه المجد في الكنيسة، في المسيح يسوع، في كل الأجيال والدهور! آمِينَ.