كولوسي 4 - Hijazi New Arabic Version

¹ يا سادة، أتعاملو مع خُدّامكم بالعدل وكونو منصفين معاهم، و تكونو عارفين انو ليكم انتو كمان، سيدكم اللي في السما.

تعاليم زياده

² استمرو على الصلاة، وكونوا صاحيين فيها بالشكر،

³ صلو مع بعض عشاننا نحنا كمان، عشان يفتح لنا الله باب نوصّل الرسالة، و نتكلم بسرالمسيح اللي انا متقيد عشانو كمان،

⁴ عشان اعلنو زي ما انا لازم اتكلم بيه.

⁵ أتصرفو بذكاء وحكمة مع اللي هما برا الكنيسة، مستغلين الوقت احسن استغلال.

⁶ خلو كلامكم دايما ملازم بالنعمه، وِيتْصَلَّح بملح، و تعرفو كيف أنكم تردو على كل واحد.

تحيات ختامية

⁷ و اخباري كلها، بيقلكم عنها تِيخِيكُسُ، أخونا الحبيب والخادم الامين وصاحبنا العبد في الرب،

⁸ وأنا أرسلتوا لعندكم علشان هادا الغرض نفسو، عشان تعرفو احوالنا ويشجع قلوبكم،

⁹ و معاه أونسيموس، الاخ الامين الحبيب اللي هو من عندكم. و همه يخبّروكم على أحوالنا هنا.

¹⁰ بيسلم عليكم أَرِسْتَرْخُسُ صاحبي اللي مسجون معايا؛ و مرقس ولد اخت برنابا، علشانو جاتكم شوية توصيات: و اذا جاكم رحبو بيه؛

¹¹ و يسوع المعروف باسم يسطس. دول كلهم أهل ختان، و هم وحدهم اللي كانو بيساعدوني عشان ملكوت الله، و اللي هونّوا عليا عيشتي.

¹² بيسلم عليكم أَبفْرآس اللي هو واحد منكم، وهو عبد للمسيح يسوع، وهو بيسوي اللي عليه كل وقت عشانكم في الصلوات عشان تصمدوا كاملين وليكم كل اليقين من ناحية ارادة الله كلها.

¹³ و انا اشهد لو إنو بيتعب كتير عشانكم وعشان اللي في مدينة لاوُدِكِيَّة واللي في مدينة هِيرَابُولِيس.َ

¹⁴ و يسلم عليكم لوقا الطبيب الحبيب؛ و ديماس.

¹⁵ سلمو على اخواننا اللي في لاودكية، وعلى نمفاس، وعلى الكنيسة اللي تجتمع في بيتها.

¹⁶ وبعد ما تنقري عليكم الرسالة دي، ارسلوها عشان تنقري على كنيسة مؤمنين لادوكيه، و خدو الرسالة اللي عندهم عشان تقروهها انتو كمان.

¹⁷ و قولوا لأرخبس: «انتبه للخدمة اللي جاتك في الرب، وسويها كلها!»

¹⁸ هذا السلام والختام دا بخط يدي، انا بولس. أفتكرو قُيُودِي. وتكون النعمة معاكم.