كورنثوس الثانية 8 - Hijazi New Arabic Version

هدايا لشعب الله

¹ و دحين، ياخوان، بنعرّفكم، على نعمة الله اللي أهداها في كنايس بمنطقة مقدونية.

² ومع انهم مرّوا بضيقة صعبة مرَّه، بس فرحتهم مرّه كثيره رغم إنّهم في فقر كبير مرَّه بس هذا الشَّي خلاّهم مرّه كُرما.

³ وانا اشهد لهم بأنهم أتبرعو بنفسهم، من غير ما أحد يطلب منهم حاجة و حتى انهم ما تبرعو بحاجة كذا على قدهم، لكن أتبرعو بحاجه اكبر منهم بكثير.

⁴ و هما كمان طلبونا وترجونا كثير بإنو نقبل تبرعهم وشراكتهم لِمساعدة القديسيين.

⁵ و كمان هما كانو فوق التوقعات، خلو نفسَّهم بس للرب اول حاجة وبعدين لنا احنا بمشيئة الله،

⁶ وهذا الشي خلانا نحس من انو تيطس يكمل ذا العمل عندكم زي لماِّ بدا فيه قبل كذا.

⁷ و لكن، زي ما انتو عندكم زيادة في كل حاجة: من الايمان، والكلمة، والمعرفة، والاجتهاد بكل حاجة، وبحبكم لنا كمان، وياريت يكون عندكم زِياده كمان في نعمة العطاء ذي.

⁸ ما بقول الكلام على إني يعني أدّيكم أوامر، انا جالس اختبر مصداقية حبكم بحماس للناس الثانيين.

⁹ وانتو بتعرفو نعمة ربنا يسوع المسيح: عشانكم صار فقير، وهو غني عشان انتو تصيرو اغنيا بفقرو.

¹⁰ وانا بأعطيكم رأيي بهذا الموضوع. وهذا الشي بينفعكم انتو اللي بدأتو من السنة اللي فاتت مو عشان انتو تسووالشي هذا وخلاص لكن عشان تصيرعندكم الرغبة إنكم تحصَلوعلى اشياء أكثر كمان:

¹¹ بس دحين انتو كملو هذا العمل، زي ما انتو كنتو مستعدين تطلبو وعندكم الرغبة، كونو كمان مستعدين تكملو العمل من اللي تملكوه.

¹² و لمن يكون موجود الاستعداد، عندكم بيتقبل العطاء على قد ما عند الانسان، مو على اللي ما يملكو.

¹³ و الشي هذا مو عشان انو يكونو الناس الثانيين بحال ميسور وأغنيا و تكونو انتو في فقر وضيقه، الشي هذا على أساس المساواة:

¹⁴ و بالحاله الموجوده دحين، بتسد الزايد عندكم حاجتهم، عشان يسد الزايد عندهم حاجتكم، وبكذا بتصير المساواة،

¹⁵ وزي ما انكتب: «المكثّر ما يفضل عليه شي، واللي مقلل ما بينقصو شي».

إرسال تيطس عشان يستلم العطايا

¹⁶ و لكن، الشكر لله اللي حط في قلب تيطس زي ذا الحماس عشانكم.

¹⁷ وهو حقيقي استجاب التماسنا، و هو راح لكم بنفسو لأنو هو متحمس كثير.

¹⁸ واحنا ارسلنا معاه الاخ اللي اتمدح كثير بين الكنايس بخدمة الانجيل.

¹⁹ ومو بس كذا، هو كمان الكنايس اختاروه عشان يعززنا و يكون خوينا بالسفر عشان نوصّل ذا العطاء اللي بنقدمو تمجيد للرب نفسو و نبين الاهتمام في بعضنا.

²⁰ واحنا بنحرص انو ماحد يلومنا في الخطوه الكبيره هذي اللي احنا نسويها.

²¹ واحنا حريصين إننا نبعد عن الحاجات السيئة مو بس قدام ربنا، و قدام الناس كمان.

²² و ارسلنا معاهم اخونا اللي ظهر لنا في كل اختبار مرة بعد مرة، انو عندو الحماس الشديد في أمور كتيرة، و هو دحين متحمس اكتر بسبب ثقتو العظيمة فيكم.

²³ و تيطس هذا، هو صديقي و اللي بيساعدني عشان مصلحتكم. أما إخوانا الثانيين، هم رسل الكنايس و مجد المسيح.

²⁴ واثبتوا لهم قدام الكنايس دليل محبتكم و انه صحيح افتخارنا بيكم.