كورنثوس الثانية 7 - Hijazi New Arabic Version

¹ واذا حصلنا هذي الوعود، يا حبايب، خلينا نطَّهر أنفسَنا من اي شي ينجس الجسد والروح، ونكمل القداسة في مخافة الله.

فرح بولس بتوبة الكنيسة

² وسّعو لينا مكان في قلوبكم: إحنا ما بنعامل احد معاملة ظالمة، وما اذينا أحد، وما استغلينا احد.

³ ما بقول هذا الشي عشان ادينكم. وانتو، زي ما قلت من أول، في قلوبنا، حتى إننا بنموت معاكم او بنعيش معاكم!

⁴ كبيرة ثقتي فيكم، وعظمه شوفة نفسي فيكم. انا مليان تشجيع و زيادة فرحتي في كُل همومنا.

⁵ وإحنا لما وصلنا لمقاطعة مقدونية، اجسامنا ما ذاقت طعم الراحة، لكن واجهتنا الهموم من كل ناحية: وكثرت حولنا الهروج، و الخوف زاد فِي داخلنا.

⁶ إلاَّ انو الله، اللي يشجع المسحوقين المعدومين، مدَّلنا التشجيع بجيَّة تِيطُس لنا،

⁷ مو بجيتو بس، لكن بالتشجيع اللي حصّلناه عندكم. وقلّنا عن وَحشَتكُم، وحزنَكُم، وغِيرتْكُم عليا، و زاد فرحي.

⁸ واذا كنت حزَّنتَكُم برِسَالتي ليكُم، انا مو ندمان على كذا، مع إني كنت نادم، لأني بشوف ذي الرسالة حزنتكم حتى لو لفترة.

⁹ وانا دحين فرحان، مو عشان حزنتو، بس عشان حزّنكم وداكم للتوبة. لإنكم حزنتو باللي بيتوافق مع مشيئة الله، عشان ما تتأذو مننا في اي شيْ

¹⁰ الحزن اللي بيتوافق مع مشيئة الله بيجيب توبة تودي للخلاص، وما عليه ندم. بس حزن العالم يسوي موت.

¹¹ شوفو، هذا الحزن نفسو اللي متوافق مع الله، قد ايش سوى فيكم اجتهاد، و تأسَّف، و استنكار، و خوف لكن كمان وحشه، وكمان غيرة، والحساب كمان! و انتو بينتو انكم بريئين بكل حاجه من ذا الشي.

¹² اذا، انا كتبت لكم الرسالة ذي زي الرسالة اللي كتبها قبل مو عشان المذنب ولا عشان اللي صار الذنب عشانو، كتبتها حتى يبان قد ايش انتو متحمسين لطاعة الله.

¹³ وعشان كذا احنا صبرنا. وفوق هذا الصبر، اتبسطنا كثير لفرحة تيطس لانو روحو انتعشت فيكم كتير.

¹⁴ واذا كنت مفتخر بحاجه عندو ليها علاقه فيكم فأنا ما رح اتكسف؛ و زي ما تكلمنا معاكم بكل حاجه بالصدق، كمان كان فخرنا فيكم عند تيطس كان من جد صادق برضو.

¹⁵ ومحبتو لكم بتزيد اكتر لما بيتذكر كيف كانت طاعتكم وكيف كان خوفكم ورجْفتكم لما استقبلتوه.

¹⁶ وانا بتبسط لاني واثق فيكم بكل حاجة.