كورنثوس الثانية 4 - Hijazi New Arabic Version

كنوز في مواعين من الفخار

¹ واذا الخدمة هذي برحمه من الله، ما بتِضعَف عَزيمَتنا.

² بس إحنا رفضنا الاساليب الخفية اللي تخجِّل، ما بنمشي بالمكر، ولا بنزوّر كلمة الله، لكن باعلاننا للحق بنمدح نفسنا عند ضمير كل واحد، قدام الله.

³ بس اذا كان انجيلنا محجبوب، فهوا محجبوب عند الهالكين،

⁴ عند اللي ما آمنو اللي أعمى إلَه هذا العالم عُقٌولَهُم عشان ما ينور لهم نور الانجيل اللي بيخُص مَجدَ المسيح اللي هو صورَة الله.

⁵ إحنا ما بنبشر بنفسنا، إحنا بنبشر بالمسيح يسوع رب لينا، وماحنا الاّ عبيد لكم عشان يسوع.

⁶ فا الله، اللي امر انو يِشرِق نور من الظلام، هوا اللي خلاَّ النور يِشرق في قلوبنا، عشان تشرق معرِفة مَجدَ الله، المتجلي في وجه المسيح.

⁷ بس الكنز ذا بنحملوا احنا في مواعين من فخار، عشان يتبيَّن انو القُدرة العالية جاية من الله مو جايه و طالعه مننا.

⁸ والصعوبات يتضيق علينا من كل ناحية، بس ما بننهار. ما بنلاقي حل مناسب، بس ما بنيأس.

⁹ ويطاردنا القهر، بس ما يتخلى الله عننا. نترمي على الارض، بس ما نموت.

¹⁰ وفين ما نروح، نحمل موت يسوع دايما في اجسامنا عشان تبان فيها كمان حياة يسوع.

¹¹ مع اننا لسا عايشين، إحنا بنتسلم دايما للموت عشان يسوع، عشان تبان في اجسادنا الفانية حياة يسوع كمان.

¹² وبكذا، الموت فعّال فينا؛ والحياة فعَّالة فيكم.

¹³ وبما انو لنا روح الايمان نفسو، اللي اتكتب بخصوصو: «آمنت، عشان كذا اتكلمت»، وإحنا كمان نِؤْمن، عشان كذا نتكلم،

¹⁴ واحنا عارفين اللي قوّم الرب يسوع من الموت راح يقومنا إحنا كمان مع يسوع، ويوقّفنا في حضرتو بصحبَتهم.

¹⁵ وانو كل الحاجات بنعيش قسوتها علشانكم، حتى اذا زادت النعمة في الاكثرية منكم، بتخلي الشكر يزيد عشان مجد الله.

¹⁶ عشان كذا، ما بتضعف عزيمتنا! بس، مادام الانسان الظاهر وباين فينا بيفنى، كمان الانسان الباطن فينا بيتجدد يوم ورا يوم.

¹⁷ هذا لانو اللي بيضايقنا دحين من صعوبات بسيطة عابرة، بينتج لنا بنفس النسبه حياة ابدية من المجد،

¹⁸ يعني بنرفع عيوننا عن الحاجات اللي نقدر نشوفها ونثبتها على الحاجات اللي ما نشوفها. والامور اللي نقدر نشوفها هيا بس لوقت قصير؛ واما اللي ما نشوفها فهِيَّ ابدية.