كورنثوس الثانية 3 - Hijazi New Arabic Version

أنتو رسالة المسيح

¹ يا ترا، نبدا نمدح نفسنا من جديد؟ والا بنحتاج زي بعض منَّهم لرسايل توصية نحملها لكم او منكم؟

² وانتو الرسالة اللي توَصِّي فينا، واتكتبت في قلوبنا، عشان كل الناس يقدرو يعرفوها ويقروها.

³ وبكذا بيبان لكم انكم رسالة من المسيح احنا خدمناها، و ما اتْكَتَبَتْ بحبر اتكتبت بروح الله الحي، ولا في ألواح من حجرلكنها اتكتبت في ألواح القلب البشري.

⁴ و هذي هي ثقتنا الكبيره من ناحية الله بالمسيح:

⁵ مو عشان احنا عندنا كفاءة ذاتية ندِّعِي بشي لِنَفسنا، بس لانو كفاءتنا من الله،

⁶ اللي خلانا نكون اصحاب كفاءة عشان نكون خُدَّام لعهد جَدِيد متأسس على الروح مو على الحرف. والحرف يودي للموت؛ اما الروح بتدي الحياة.

مجد العهد الجديد

⁷ بس، ما دامت خدمة الموت اللي اتنقشت حروفَهَا في لوح حجر، بدأت بمجد، حتى انو بني اسرائيل ما قدرو انهم يطالعو لوجه موسى، بسبب مجد وجهو، هذاك المجدَ اللي رح يروح وزايل،

⁸ طيب مو أحسن انو تكون خدمة الروح ثابته في المجد؟

⁹ اذا كانت الخدمة اللي تودي للآخره مجيدة، الأحسن بكثير انها تتفوق عليها خدمة المجد اللي تودِّي للبر.

¹⁰ حتى اللي أتْمَجَّد مِن أوَّل ما يكون أتمَجَّد بذي الطريقه بالنظر للمجد الكبير.

¹¹ و اذا كان اللي بيزول نصيبه مع المجد، فالأحسن بكثيير انو المجد يكون من نصيب اللي باقي دايما.

¹² واذا الرجاء الثابت هذا لنا، راح نشتغل بجرأة كبيرة.

¹³ وإحنا مو زي موسى اللي حط حِجاب على وجهو عشان ما يثبِّت بني اسرائيل عيونهم على نهاية الزايل.

¹⁴ بس عقولَهُم اللي اتعمت، لانو هذا الحجاب لسا مِترَخي لين يجي اليوم لما بيتقَري العهد القديم، وهوا ما بينشال الاَّ في المسيح

¹⁵ هذا غير انو الحجاب هذا باقي محطوط على قلوبَهُم لما ينقري كتاب موسى.

¹⁶ بس لمن ترجع قلوبهم للرب، الحجاب بيتشال .

¹⁷ ولأن الرب هوا الروح، وفين ما تكون روح الرب، هِناك الحُرية.

¹⁸ وإحنا كُلَّنا بنشوف مجد الرب بوجوه زي المراية ما عليها حجاب، ونتجلىَّ من مجد الى مجد عشان نشابه الصورة الوحده نفسها، وهذا بفعل الرب الروح.