كورنثوس الثانية 2 - Hijazi New Arabic Version

¹ بس انا قررت انو ما تكون جيتي ليكم سبب حُزنَكُم.

² واذا حزَّنتَكُم مين هو اللي راح يفرحني الَّا اللي حزِّنتو؟

³ عشان كذا بكتب لكم اللي كتبتو هِنا، حتي لمن اجي ما يجيني الحزن من اللي كان لازم يجي منو الفرح. وعِندي ثقة فيكم كُلَّكم انو فرحي هو فرحكم كلَّكم.

⁴ لإنو اللي كتبتو لكم من قَبِل كان طالع من ضيقه شديدة واكتئاب في القلب، ومعاه دموع مرَّه كَثير. وما كان قصدي اني أزعلكم، بس عشان تِعرفوا المحبة القوية مرَّه عندي تجاهكم.

مسامحة المذنب

⁵ واذا كان في واحِد سبّبلي الحزُن، فهوا ما سبّبو ليا انا بس، كمان ليكم كلكم لحد مُعيَّن، هذا عشان ما ابالغ!

⁶ ودحين، يكفي هذا الراجل المُذنِب القِصاص اللي حكم عليه فيه اكثركم.

⁷ واللي يختلف عن كذا، والاحسن لكم دحين انكم تسامحوه وتشجعوه، والاّ ممكن يغرق في حزن مَّره شَدِيد.

⁸ عشان كذا أَتْراجّاكم انكم تِأكدولو مَحبَّتكم.

⁹ واللي كتبتو لكم قاصد أختبركم فيه كمان، عشان اعرف قَدَّيش طَاعَتكُم في كل حاجة.

¹⁰ و اللي بتسامحوه في شيْ، انا كمان اسامحو. واذا كنت انا كمان سامحت ذا الراجل بشي، أكون سامحتو علشانكم في حضرة المسيح،

¹¹ خوف من إنو يستغلنا الشيطان لإننا عارفين نيَّتو.

خدام العهد الجديد

¹² ولمن وصلت الين مدينة تَرُوَاس عشان المسيح، وفتحلي ربنا باب للخدمة

¹³ ما ارتاحت روحي لاني ما لقيت تِيطُسَ اخويا. وودعت المؤمنين هناك و رحت لمقاطعة مقدونية.

¹⁴ بس، شكرا لله اللي بيودّينا دايما في موكب الفوز بالمسيح، وينشر فينا ريحة معرِفتو في كل مكان.

¹⁵ و إحنا ريحة المسيح الطيبة المرفوعه لله، المِتوزِّعه بالتساوي عند اللي بيخلِصو أو اللي بيِهلَكو:

¹⁶ هدولا بيشمو فيها ريحة مِن الموت والين الموت، وذوليك ريحة مِن الحياة و للحياة. ومين هو صاحب الكَفاءة ليسوي الحاجات هذي؟

¹⁷ إحنا ما بِنتاجر بِكِلمَة ربنا زي ما كَتيرمن الناس بيسَوُّو، بس احنا بنسويها من قلبنا ومن عند الله، وقدام الله، نتكلم في المسيح.