كورنثوس الثانية 12 - Hijazi New Arabic Version

الحلم حقّت بولس وشوكتو

¹ إيوه، شوفة النفس ما تفيدني بْشَيْ؛ بس رح أنتقل للي كشفو لي الرب من أحلام وعلامات.

² أنا أعرف واحد في المسيح، انخطف للسما الثالثه من قبل اربعطتشر سنه: طيب هذا الشيْ صار بجثتو؟ ما ادري ولاّ بغير جثتو؟ ما ادري. الله العالم!

³ وأنا أدري أنو هذا الواحد، بجثتو ولا مو بجثتو؟ ما ادري؛ الله العالم؛

⁴ قد انخطف للفردوس، وسمع حاجات مرَّه غريبه تفوق الخيال وما يجوز لأي أحد أنو يتكلم فيها.

⁵ بهذا أشوف نفسي! بس أنا ما أشوف نفسي باللي يخصني أنا إلا إذا كان له علاقة بضعفي.

⁶ ولو كنت أبغى شوفة النفس، ما رح أكون غبي، لأني أقول الحق. بس أنا ما أسوي كذا، عشان مافي أحد يِحَسِّبْني أكتر من اللي يشوفني فيه أو أنو ما سمعو مني.

⁷ بس ما أشوف نفسي باللي موجود في هذه العلامات من عظمه كبيره، أنعطيت شوكة في جثتي زي ما تكون رسالة من الشيطان يلطمني عشان ما أشوف نفسي!

⁸ عشان كذا أتوسلت للرب ثلاث مرات عشان يشيلها مني

⁹ فقال لي: «نعمتي تكفيك، لأنو قدرتي تتمم الضعف!» وأنا موافق إني أشوف نفسي وأنا مبسوط بالضعف اللي فيَّا، عشان تلُفني قدره المسيح.

¹⁰ عشان المسيح، أنا مبسوط بضعفي والإهانات والهموم والقهر والصعوبات، لأني لما أكون ضعيف، ساعتها أكون قوي!

الاهتمام بالكورنثيين

¹¹ هذا أنا صرت غبي! بس، إنتو غصبتوني! بس كان لازم أنتو تمدحوني، لأني مو مْقَّصِر بشي عن ذولاك الرسل المتفوقين، حتى لو إني ما كنت ولا حاجه.

¹² العلامات اللي تميز فيها الرسل سووها بينكم بكل صبر، من آيات وغرايب ومعجزات.

¹³ في أي مجال كنتو أقل قيمة من الكنايس الثانيه بس أنا ما كنت حِمل ثقيل عليكم؟ سامحوني على هذي الغلطة!

¹⁴ أنا دحين جاهز إني أجيكم مره ثالثه، وما رح أكون حِمل ثقيل عليكم. اللي أسعى له مو هو الشي اللي عندكم لكن هو انتو: مو العيال هما اللي لازم ينتبهوا لأمهم وأبوهم، بس الأم والأب همه اللي لازم ينتبهوا لعيالهم.

¹⁵ وأنا، وأنا مبسوط،، أديكم كل اللي عندي، حتى أديكم نفسي علشانكم، مع أني كل ما زاد حبي لكم أشوف حب أقل.

¹⁶ بس، خِّليه كذا. (تقولو) أني ما ثقَلت عليكم بنفسي، بس تقولو إني كنت محتال وسرقتكم بِمَلْعنه.

¹⁷ بالله عليكم قد كسبت حاجة منكم عن طريق أحد من اللي أرسلتهم ليكم؟

¹⁸ طلبت من تيطس أنو يروح عندكم، وأرسلت معاه هذاك الأخ، قد كسب تيطس منكم حاجه؟ مو إحنا أنا وتيطس، سوينا معاكم نفس الشي وبروح وحده؟

¹⁹ مادام أنتو تحسبوا أنو إحنا نحامي عن نفسنا عندكم! بس إحنا نتكلم قدام الله في المسيح. و كل ذا يا حبايبي، عشان نبنيكم.

²⁰ و انا خايف اني اجي والاقيكم في حالة أنا ما أبغى أشوفها وتلاقوني بحالة ما بتعجبكم! و يكون بينكم مشاكل كثير و حقد و حسد و فرقة و تجريح و نميمة و تكبر و بلبلة.

²¹ خايف انو ربي يخليني مذلول من بينكم لما أجيلكم مرة ثانية، و يكون حزني مرة شديد على اللي حيغلطو من كثير من قبل و ماتابو لما ارتكبو الذنوب ذي من دنس وزنى و فسق!