كورنثوس الثانية 11 - Hijazi New Arabic Version

بولس والرسل اللي يكذبو

¹ ياريت تتحملوا غباوتي، بس إنتو في الحقيقة متحملينّي.

² وأنا أغار عليكم غيره من عند الله عشان أنا طلبتكم لراجل واحد هو المسيح، عشان اديكم لو زي البنت البكر المؤدبه.

³ بس أنا أخاف انها تعمي قلوبكم عن الإخلاص والطهاره لناحية المسيح زي ما الحيَّه أغوت بخبثها حوا.

⁴ وإذا كان اللي جاكم يبشر بيسوع ثاني ما بشَّرنا فيه إحنا أو كنتو نُلْتُو روح ثانيه، ما نُلتوها،أوتقبلوا انجيل ما قِد قبلتوه، وبكذا تتحملوا ذا بكل رضى وسرور.

⁵ وأنا اعتبر نفسي مو متخلف عن ذول الرسل المتوفقين.

⁶ ومع اني أتكلم كلام الناس البسيطين واللي ما فيه فصاحة، بس المعرفة ما تنقصني. وإحنا بيّنا لكم ذا في كل شيْ قدام الكل.

⁷ يعني أنا أكون مذنب إذا، أني بشرتكم بالإنجيل من غير مقابل أوفلوس منكم، وبكذا نزلت وطيَّحت من مقامي وزودت مقامكم؟

⁸ وظلمت كنايس ثانية لما خليتها تشيل نفقة خدمتكم.

⁹ ولما كنت عندكم و صرت محتاج، ما ثقلت على أحد منكم. لأنو الإخوان اللي جو من مقاطقة مقدونية أدّوني على قد حاجتي. وحفظت موية وجهي، ورح أحفظها كمان، وما حكون ثقيل عليكم بشيْ.

¹⁰ وطول ما المسيح لو حق فيا، ما رح يقدر أحد أنو يوقف اعتباري لنفسي هذا في بلاد أخائية كلها!

¹¹ ليه؟ عشان أنا ما أحبكم؟ العلم عند الله!

¹² بس، أنا رح اسوي اللي أسويه دحين عشان ما يكون فيه حجه للي يدورو ورا حجة تبرر أنهم زيّنا في اللي يشوفو نفسهم فيه.

¹³ اللي زي ذول همه رسل كذابين وخبيثين، يسووا نفسهم زي رسل المسيح.

¹⁴ وما في شيْ عجيب: الشيطان كمان يسوي نفسه كأنو ملاك نوّر.

¹⁵ ومو كثير على الشغالين عندو أنهم يسووا نفسهم زي خدام البِر. وأنو مصيرهم رح يكون على حسب عملهم.

بولس يعتز بأوجاعو

¹⁶ أقوللكم مره ثانية: ما أحد يحسّبني غبي وإلا، إرضو فيا ولو كنت غبي، عشان أنا كمان أشوف نفسي وأثق فيها شويه!

¹⁷ واللي أقولو هنا ما أقولو زي ما يقول الرب، بس زي ما يكون فيا غباوه، وعندي ذي الثقة في نفسي اللي تخليني افتخر:

¹⁸ وزي ما في ناس كثير يفتخرو ويشوفو نفسهم على حسب الجسم، أنا كمان رح أشوف نفسي وأفتخر.

¹⁹ وعشان انتو عاقلين، تتحملو الأغبيا وأنتوا مبسوطين!

²⁰ لأنكم تتحملو كل واحد يخليكم عبيد عندو، وياكلكم ويستغلكم، ويتكبر عليكم، ويكفخكم على وجوهكم.

²¹ ايش المذِله هَذي! قد ايش كنا ضعيفين في تعاملنا معاكم! بس مادام أنا أتكلم بغباوة، فكل شي يتطّاولو عليه ذولي، أنا أتطاول عليه كمان.

²² إذا كانوا عبرانيين، أنا كمان عبراني؛ اذا كانوا اسرائيليين، أنا كمان إسرائيلي؛ إذا كانوا من عيال ابراهيم؛ أنا كمان من عيالو!

²³ وإذا كانوا خدامين للمسيح، أصير أتكلم كأني أتجننت، لأني متفوق عليهم: في التعب تعبت كتير مره، في الجلدات انجلدت فوق ما تتخيل، في السجون انسجنت أكثر، وكنت ممكن أموت أكثر منهم مرات.

²⁴ اليهود جلدوني خمس مرات، كل مرة تسعة وثلاثين جلده.

²⁵ وانضربت بالعصايه ثلاث مرات. ورموني بالحجاره مره. واتكسّرت السفينة فيا ثلاث مرات. وفضلت في نص البحر يوم كامل طول نهاره بليله.

²⁶ سافرت كثير؛ جات علَيا سيول جارفة، وجوني قطاع الطرق، وتعرضولي عيال قبيلتي، وعبدة الأصنام، ومصايب كمان في المدن، وخطر ومصايب البر، وخطرالبحر، ومن بينهم نصابين محتالين.

²⁷ و قدْ ايش تعبت وكدّيت وسهرت كثير، وتعبت من الجوع والعطش والصوم من غير أكل وقت كثير، وتعبت من البرد من غير ملابس.

²⁸ وفوق كل هذي المخاطر والصعوبات من الخارج، كمان زاد عليَّا الضغط يوم ورا يوم، لأني صرت شايل هم كل الكنايس.

²⁹ في أحد يضعف وانا ما أضعف، وفي أحد أموره متعثرة وأنا ما أتحرق عليه؟

³⁰ إذا كان لا بد من شوفة النفس، أنا رح أشوف نفسي بضعفي.

³¹ ويعلم الله أبو ربنا يسوع، المبارك للابد ، إني ما أكذب:

³² لأنو الحاكم اللي عيَّنو الملك الحارث على مدينة دمشق، شدد الحراسة على مدينة دمشق، عشان يمسكوني،

³³ بس أنا ادلدلت في سله من شباك في السور، وشردت منو.