تسالونيكي الأولى 5 - Hijazi New Arabic Version

يوم الرب

¹ اما حكاية الزمان والاوقات المحددة، مانتو محتاجين انو ينتكتب لكم فيها.

² لانكم تعرفوا كويس انوا يوم الرب رح يجي زي ما يجي الحرامي بالليل.

³ وهما الناس بيقولوا: جا السلام والامن! ينزل عليهم الهلاك المفاجيء زي ساعة الولادة اللي تفاجيء الحرمه الحامل، ومارح يقدروا يفلتوا.

⁴ بس انكم، انتو ياخوان، مو في الضلمة عشان تتفاجؤا في دا اليوم زي وكأنو حرامي.

⁵ انتو كلكم عيال النور وعيال النهار. احنا مو اهل الليل ولا أهل الظلام.

⁶ اذا، لا نّنام زي ما ينامو التانيين،لكن نفضل سهرانين وصاحين،

⁷ في الليل ينام اللي يناموا، وفي الليل يسكر اللي يسكروا

⁸ بس احنا اهل النهار نبقى صاحيين، ماخدين من الايمان والمحبة حصانة لصدورنا، ومن الرجا بالخلاص خوذة وحماية لروسنا.

⁹ فالله اختارنا مو عشان ينزل علينا غضبو بس عشان نِحَصّل الخلاص بربنا يسوع المسيح،

¹⁰ اللي مات عننا عشان كلنا نعيش معاه، سواء كنا سهرانين في الحياه ولّا راقدين في الموت!

¹¹ عشان كدا عزو بعضكم وشددو على بعضكم، زي مانتو مسويين.

تعليمات أخيرة

¹² و كمان نتمنى منكم، ياخوان، انكم تميزو دولا اللي بيجتهدو بينكم، و بيهتمو بيكم زي ما يبغى الرب، ويعونكم،

¹³ وانكم تقدّروهم تقدير كبيرمره في المحبة،عشان عملهم. عيشو بسلام مع بعضكم البعض.

¹⁴ واحنا بنطلب منكم ياخوان، انكم تفهّمو الفوضويين وتشدّدو اللي ما عندهم العزم، وتساعدوالضعفا، وتعاملوالكل بطولت البال.

¹⁵ و انتبهوإنو يبادل أحد منكم شرغيرو بشر زيو. دائما دورو على الخير بمعاملتكم مع بعضكم البعض و معا التانيين كلهم.

¹⁶ أفرحوا دايما؛

¹⁷ ما توقفوا عن الصلاة؛

¹⁸ اشكرو الله دايما وعلى كل حال: ودي هي ارادة الله لكم في المسيح يسوع.

¹⁹ لا تطفوا الروح ،

²⁰ ولا تحتقّروا النبوات؛

²¹ امتحنو كل حاجة وأتمسكو بالشي الكويس.

²² ابعدو عن كل شيء فيه شبهه للشر.

²³ واله السلام بنفسو يقدسكم للكمال ويحفظكم سالمين، روح ونفس وجسد، عشان ما يكون عليكم لوم لما يرجع ربنا يسوع المسيح.

²⁴ والله اللي بيدعيكم صادق، والكلام دا رح يصير.

²⁵ ياخوان، صلو عشاننا.

²⁶ سلمو على كل الاخوان ببوسة طاهرة!

²⁷ بسألكم بالله تِقْرو دي الرسالة على كل الإخوان.

²⁸ معاكم نعمة ربنا يسوع المسيح.