تسالونيكي الأولى 4 - Hijazi New Arabic Version

حياة ترضي الله

¹ وكمان، ياخوان، زي ما تعلمتو مننا كيف لازم تمشو بما يرضي الله ، زي ما انتو مسويين، نطلب منكم و بنحرضكم في الرب يسوع انكم تشدو حيلكم بالتقدم في دا اكترو اكتر.

² انتوا تعرفوا الوصايا اللي علمناكم هي من الرب يسوع.

³ فهادي هي مشيئة الله: قَدَاسَتُكُمْ. ودا بإنكم تبعدوا مره عن الزنى،

⁴ ويعرف كل واحد منكم كيف يحافظ على جسموا بالطهاره والكرامه

⁵ مو بِتِجْروا ورى شهواتكم القوية زي الوثنيين اللي ما يعرفو الله،

⁶ وماحد يتعدى على حق اخوه ويغلط عليه بدا الموضوع، لانو الرب هو المنتقم لكل دي الاساءات، زي ما نبهناكم من قبل وشهدنا لكم بحق.

⁷ ربنا ما دعانا للنجاسة بس دعانا(للعيشِ)في القداسة.

⁸ إذا، اللي بيستخف بأخوه في دا الشي، يستخف مو بانسان لكن بالله، باللي اداكم هو فعلا روحو القدوس.

⁹ أما المحبه الاخوية، فانتو مو محتاجين اني اكتب لكم عنها، لانكم انتو بنفسكم أتعلمتو من الله تحبو بعضكم،

¹⁰ ولانكم كمان زي كدا تعاملو كل الاخوان في مقاطعة مقدونية كلها. وبنحرضكم، كمان ياخوان، انكم تسوا هذا بشكل اكبر اكتر واكتر،

¹¹ وتدوروا كيف تعيشوا بهدوء، مهتمين كيف تسوو أشياءكم الخاصة ومحصلين عيشتكم بيدكم، زي ما وصيناكم.

¹² وبكدا تكون سمعتكم طيبه ناحية الناس اللي من برا الكنيسة، وماتكونوا محتاجين لأي حاجة.

المؤمنين اللي رقدوا!

¹³ وإنو احنا نبغى، ياخوان، انو ما يتخبى عليكم موضوع اللي راقدين، عشان ما تحزنو زي غيركم من الناس اللي ما لهم رجا.

¹⁴ و ما دام بنؤمن بانوا يسوع مات و بعدين عاش، و معاه كمان الله يجيب اللي راقدين بيسوع كمان.

¹⁵ هادا بنقولو لكم بكلمة من عند الرب: انوا احنا اللي باقين أحياء إلين ما يرجع الرب، ما راح نسبق اللي رقدوا.

¹⁶ لانو الرب بنفسو رح ينزل من السما لما يجي الأمر بالتجمع، و يُنادي رئيس الملايكة، و يُنادي ببوق إلهي، وساعتها بيرجع اللي ماتو للحياة في المسيح اول شي.

¹⁷ واحنا، لباقين أحياء، كلنا نطلع للسحب عشان نجتمع مع الرب في الهوا. وكدا راح نبقى مع الرب دائما.

¹⁸ وعشان كدا عزو بعضكم بدا الكلام!