تسالونيكي الأولى 2 - Hijazi New Arabic Version

خدمة بولس في تسالونيكي

¹ وإنتو، يا اخوان، عارفين انو جيَّتنا لكم ما كانت غلط.

² ومع إننا كنا جربنا القسوة والوَجَعْ والبَهدَله في مدينة فِيلِبِّي، زي ما تعرفوا، إحنا أتجرَّأنا في إلَهَنا انو نكَلِّمكم بإنجيل الله محاربين في وجه المعارضة القوية.

³ وما كانت تَوعِيتنا جاية عن ضلال ولا عن وساخه، وما اختلط معها خباثَه،

⁴ لكن نحنا بنتكلم زي ما كان باين من اختبَار الله لهم انهم يُسْتأمنوا على الانجيل، عشان نِرْضي الله مو الناس اللي بيختبر قلوبَناَ.

⁵ وزي ما تِعرِفوا كمان، إحنا ما راح نستعمل معاكم ابدا الكلام المعسول، ولا بنتحجّج عشان الطمع في حاجة بس الله شاهد

⁶ ولا حاولنا ناخد مجد مِن الناس، لا مِنَّكُم ولا من غيِرَكُم،

⁷ مع إنو لينا حق إنو نفرِض نفسَنا عليكُم كَوْنُو إحنا رُسل للمسيح۔ بس إحنا كناَّ حنونين عليكُم زَي أم بِترضْع عيالها۔

⁸ وازا كان حناننا عليكم شديد، رضينا نقدم لكم مو بس إنجيل الله بس حتى كمان أنفسنا، عشانكم صرتو محبوبين عِندنا.

⁹ إنتو بِتتزكَّرو، يا اخوان، تعبنا وشقانا عليكم، لما جينا بشرناكم بإنجيل الله وإحنا شغالين ليل نهار عشان ما نثقل على أحد مِنَّكم۔ُ

¹⁰ وإنتو شاهدين، والله ِيشهد، إيش سوينا بينَكُم، إنتوا المؤمنين، بطهارة واستقامه وبراءه من اللوم،

¹¹ كمان انتوا عارفين كيف عاملناكم زي معاملة الاب لعيالوا، فاكناَّ نوعي كُل واحِد فيكم ونشجِّعكُم

¹² ونحثكم انكم تمشو بطريق كويس يليق بالله، داك اللي بيناديكم لملكوتو ومجدو.

¹³ وعشان كدا احنا بنشكر الله بدون ما نوقف، لانكم لما اخدتو مننا كِلمة البِشارة مِنَ الله، قِبلتوها مو كأنها كِلمة بشر، لكن زي ما هيَّا في الحقيقة: على أساس إنها كلمة الله اللي مُؤثِّرَة فيكم انتو المؤمنين.

¹⁴ فإنتو، يا إخوان، صرتو على اخلاق كنايس الله اللي في منطقة اليهودية اللي هيَّا في المسيح يسوع. وانتو كمان عانيتو من عيال جلدتكم باللي عانوه همَّا كمان من اليهود

¹⁵ اللي قتلو الرب يسوع والانبيا وقهرونا إحنا كمانا، وهما بيعصو الله وبيعادو الناس كُلَّهُم،

¹⁶ بيمنعونا انو نبشِّر الأمم عشان يِخلَصو، وبكدا بيكملو زنوبهم كل شويه، بس الغضب نزِل عليهم مره.

شوق بولس لرؤية المؤمنين في تسالونيكي

¹⁷ امَّا إحنا، يا اخوان، بعدنا عنَّكُم فترة قصيرة، بالوجه مو بالقلب، عِملنا مجهود أكتر بِكتير مره عشان نشوف وجوهكم واحنا مره مشتاقين لَكُم.

¹⁸ و عشان كدا نوينا نجي ليكم، خصوصاً أنا بُولُسَ اكتر من مره ورا بعض، والشيطان عاندنا.

¹⁹ طيب ايش هوا رجانا أو فرحنا أو تاج إفتخارنا قُدام ربنا يسوع في رَجعَتو؟ موهو إنتو؟ إلا،َّ

²⁰ عشان انتوا فخرنا ووناستنا.