Yelemi 9 - Vajtswv Txojlus - lus Hmoob Dawb - txhais tshiab xyoo 2004

¹ Ntuj 'e, kheev kuv lub taubhau yog qhov dej thiab kuv lub qhov muag yog qhov dej txhawv kuv thiaj li quaj tau nruab hnub hmo ntuj txog kuv cov neeg tus ntxhais uas raug tua.

² Ntuj 'e, kheev yog kuv muaj ib lub chaw so hauv ntuj nrag teb do rau cov neeg taug kev, kuv thiaj li tau ncaim ntawm kuv cov neeg thiab khiav kom dhau lawv mus, vim lawv sawvdaws yog cov ua nkauj ua nraug, thiab yog pab neeg uas ntxeev siab.

³ “Lawv ua lawv tus nplaig nkhaus rawv li ib yam li tus qhaub nee, txojkev dag tsis yog txojkev tseeb uas vam meej rau hauv lub tebchaws. Lawv ua ib qho phem tag kuj mus ua ib qho phem thiab, lawv tsis paub kuv.” Yawmsaub hais li no ntag.

⁴ “Cia sawvdaws ceev faj nws tej kwvtij phoojywg, thiab tsis txhob tso siab rau tus kwvtij twg li, rau qhov tias txhua tus kwvtij puavleej dag ntxias, thiab txhua tus phoojywg puavleej mus xyav luag.

⁵ Txhua tus dag ntxias nws tej kwvtij phoojywg, tsis muaj ib tug hais tseeb kiag li. Lawv qhia lawv tus nplaig hais lus dag. Lawv ua txhaum muaj txim txog siav kawg.

⁶ Lawv quab yuam tag los rov quab yuam thiab, lawv dag ntxias tag los rov dag ntxias thiab, lawv tsis kam lees paub kuv.” Yawmsaub hais li no ntag.

⁷ Vim li no, Yawmsaub uas muaj hwjchim loj kawg nkaus hais li no tias, “Kuv yuav muab lawv nchuav li nchuav nyiaj thiab muab lawv sim. Vim kuv haiv neeg ua txhaum, kuv yuav ua tau lwm yam dabtsi rau lawv?

⁸ Lawv tus nplaig yog xib xub uas tua tau neeg tuag, thiab hais tej lus dag. Txhua tus lub ncauj hais lus zoo rau nws tej kwvtij kwvluag, tiamsis hauv nws lub siab caws yej caws ntxiab cuab lawv.”

⁹ Yawmsaub hais tias, “Lawv twb ua tej no los kuv yuav tsis rau txim rau lawv lov? Kuv yuav tsis ua pauj rau haiv neeg uas zoo li no lov?”

¹⁰ Cia li quaj thiab quaj nyiav tej roob thiab quaj ntsuag tej tshav zaub hauv tebchaws moj sab qhua, vim yog raug muab tso tseg piam tag tsis muaj leejtwg hla mus hla los, tsis hnov tej tsiaj nyeg ua suab sab li. Tej nas noog saum nruab ntug thiab tej tsiaj qus khiav ploj tag lawm.

¹¹ “Kuv yuav ua kom Yeluxalees pob ua tej niag pawg cia, ua chaw rau hma nkaum. Thiab kuv yuav ua kom Yuda tej moos nyob do cuas cia tsis muaj neeg nyob hauv.”

Yeluxalees yuav puam tsuaj thiab neeg yuav khiav tag

¹² Leejtwg muaj tswvyim txaus uas yuav nkag siab tau tej no? Thiab Yawmsaub tau hais rau leejtwg es tus ntawd thiaj tshaj tawm tau tej ntawd? Vim li cas lub tebchaws no raug puam tsuaj, muab tso tseg piam tag ib yam li tebchaws moj sab qhua, tsis muaj leejtwg hla mus hla los?

¹³ Mas Yawmsaub hais tias, “Lawv tso kuv txoj kevcai uas kuv muab txawb rau ntawm lawv xubntiag tseg, thiab tsis mloog kuv lub suab thiab tsis ua lub neej raws li ntawd,

¹⁴ thiab lawv tawv ncauj ua raws li lawv lub siab nyiam, thiab raws ncuj nciav tej dab Npa‑as ib yam li uas lawv tej poj koob yawm txwv qhia rau lawv lawm.”

¹⁵ Vim li no, Yawmsaub uas muaj hwjchim loj kawg nkaus, yog Yixayee tus Vajtswv, hais li no tias, “Saib maj, kuv yuav muab zaub iab zaub daw rau haiv neeg no noj thiab muab dej muaj taug rau lawv haus.

¹⁶ Kuv yuav ua kom lawv tawg ri sua mus nyob rau hauv tej tebchaws uas lawv thiab lawv tej poj koob yawm txwv tsis tau paub dua li, thiab kuv yuav tso ntaj caum lawv qab mus txog thaum kuv ua kom lawv puam tsuaj tag.”

¹⁷ Yawmsaub uas muaj hwjchim loj kawg nkaus hais li no tias, “Cia li xam saib, thiab hu cov pojniam uas txawj quaj nyiav tuaj, cia li tso neeg mus hu cov uas txawj quaj nyiav tuaj.

¹⁸ Cia lawv maj nroos tsa suab quaj nyiav peb, kom peb tej qhov muag thiaj los kua muag, thiab peb daim tawv muag thiaj txhawv kua muag ntws nto.

¹⁹ Tau hnov lub suab quaj nyiav hauv Xi‑oo. ‘Peb puam tsuaj tag lauj! Peb txaj muag kawg li lauj! Rau qhov peb tau tawm hauv lub tebchaws lawm thiab lawv twb muab peb tej vaj tse rhuav pob tag lawm.’ ”

²⁰ Cov pojniam 'e, cia li mloog Yawmsaub tej lus, thiab tig nej lub pob ntseg mloog tej lus uas nws lub qhov ncauj hais. Cia li qhia nej tej ntxhais paub quaj ntsuag, thiab nyias qhia zaj nkauj tuag rau nyias kwvtij kwvluag,

²¹ rau qhov txojkev tuag twb nce tuaj nkag peb qhov rais thiab nkag rau hauv peb tus vajntxwv tej vaj tse, thiab muab tej menyuam txiav ploj tag tom tej kev thiab muab tej tub hluas txiav ploj tag hauv tej tshav puam.

²² Cia li hais tias, “Yawmsaub hais li no tias, ‘Tej cev tuag yuav pawg lug ib yam li tej quav tsiaj tom tej teb thiab ib yam li cov teg qoob uas hlais tso pawg lug raws cov uas hlais qab, tsis muaj leejtwg khaws.’ ”

²³ Yawmsaub hais li no tias, “Tus uas muaj tswvyim tsis txhob khav nws lub tswvyim, tus uas muaj zog tsis txhob khav nws lub zog, tus uas muaj tsis txhob khav qhov uas nws nplua nuj.

²⁴ Cia tus uas khav tsuas khav txog qhov no, yog qhov uas nws nkag siab thiab paub kuv tias kuv yog Yawmsaub yog tus uas hlub ruaj khov mus li, txiav txim ncaj thiab ua ncaj ncees rau hauv ntiajteb, rau qhov kuv txaus siab rau tej uas hais no.” Yawmsaub hais li no ntag.

²⁵ Yawmsaub hais tias, “Saib maj, lub caij lub nyoog tabtom los yuav txog, mas kuv yuav rau txim rau txhua tus uas lam ua kevcai txiav tsis yog ua tiag tiag,

²⁶ yog cov Iyi, cov Yuda, cov Edoo, cov Asmoo, cov Mau‑a thiab txhua tus uas nyob hauv ntuj nrag teb do uas chais plaubhau raws npoo nplooj ntseg. Cov neeg no tsis ua kevcai txiav, thiab cov Yixayee sawvdaws los kuj tsis yog ua kevcai txiav hauv lub siab.”