Nahus 2 - Vajtswv Txojlus - lus Hmoob Dawb - txhais tshiab xyoo 2004

Ninave yuav puam tsuaj

¹ Lub nroog Ninave, cov uas tsoo koj twb tuaj ua rog rau koj lawm. Kavtsij mus zov rooj loog, zov ncauj kev, cia li sia siv khov kho npaj tos, sau tub rog txhij zog.

² (Yawmsaub tabtom ua kom Yakhauj tebchaws rov muaj hwjchim meej mom li qub ib yam li Yixayee tebchaws yuav vam meej nto moo, vim yog tub sab lws lawv thiab muab lawv tej ceg ua liamsim tag.)

³ Cov tub rog uas siab tuab mas lawv daim hlau thaiv liab ploog, cov tub rog tej tsoos liab tsaus nti. Hnub uas npaj txhij mas tej tsheb ua rog ci nplas cuag li nplaim taws, cov nees ua rog kuj txauj tes peem qas qees yuav mus.

⁴ Cov tsheb ua rog mas dhia nroo ntws taug kev, mus tawg pes lees hauv tej tshav puam hauv nroog, ci nplas li taws tsau, laim pes lias li xob laim.

⁵ Cov thawj rog raug hu, lawv dhia dawm taw pig poog mus, lawv dhia ncaj nraim rau ntawm ntsa loog, lawv tsa kiag daim hlau thaiv hauv ntaj hauv hmuv.

⁶ Lub qhov rooj dej qheb kiag lawm, cov hauv vajntxwv tsev poob siab tag.

⁷ Lawv muab tus poj vaj tej tsoos tsho hle, lawv ntes poj vaj coj mus. Cov nkauj qhev kuj quaj ntsuag zom zaws yam nkaus li nquab quaj thiab lawv ntaus hauv siab.

⁸ Ninave zoo nkaus li lub pas dej uas ntws zuj zus mus lawm. Lawv qw hais tias, “Txhob mus, txhob mus,” tiamsis tsis muaj leejtwg tig rov los li.

⁹ Cia li mus lws nyiaj lws kub. Muaj nyiaj txiag ntau kawg tsis paub tag li, muaj ib puas tsav yam qhov txhia chaw muaj nqes.

¹⁰ Ninave txom nyem lauj, puam tsuaj tag du lug lauj! Lub siab yaj ntshis, hauv caug tshee hnyo, ib ce tsaug qas hnyo, ntsej muag thim xem tag.

¹¹ Tsov ntxhuav lub chaw nyob dua twg lawm? Yog lub qhov tsua uas cov tsov ntxhuav mos nyob thiab kwv nqaij mus noj tsis muaj leejtwg nkag mus tab kaum tau. Qhov chaw uas tsis muaj leejtwg nkag mus zes cov menyuam tsov ntxhuav dua twg lawm?

¹² Tus tsov ntxhuav dua nqaij txaus cov menyuam noj thiab ntxo kiag nqaij caj dab los rau cov maum tsov ntxhuav. Nws nrhiav nqaij coj los puv nkaus qhov tsua thiab dua nqaij los tso puv nkaus lub chaw nyob.

¹³ Yawmsaub uas muaj hwjchim loj kawg nkaus hais tias, “Saib maj, kuv tawm tsam koj. Kuv yuav hlawv koj tej tsheb ua rog kom ncho pa lug, thiab hniav ntaj yuav tua koj cov tsov ntxhuav mos. Kuv yuav muab cov nqaij uas koj noj rho tawm hauv lub ntiajteb mus, thiab yuav tsis hnov koj cov tub tshaj xo lub suab li lawm.”