Mikhas 3 - Vajtswv Txojlus - lus Hmoob Dawb - txhais tshiab xyoo 2004

Cem Yixayee cov thawj

¹ Thiab kuv hais tias, “Nej cov uas ua thawj hauv Yakhauj thiab cov uas kav Yixayee caj ces, nej cia li mloog. Tsim nyog nej yuav paub txojkev ua ncaj los tsis yog?

² Nej ntxub kev zoo nyiam kev phem, nej laws kuv haiv neeg daim tawv thiab laws tej nqaij ntawm lawv tej pob txha.

³ Nej noj kuv haiv neeg tej nqaij thiab tev lawv daim tawv los, thiab muab lawv tej pob txha lov ua tej ywb yav, thiab muab lawv tsuav mos nyoos ib yam li cov nqaij hauv lub yias, ib yam li cov nqaij rog hauv lub lauj kaub.”

⁴ Lawv yuav quaj thov Yawmsaub, tiamsis nws yuav tsis teb lawv. Thaum ntawd nws yuav fee plhu ntawm lawv vim lawv tau ua phem kawg.

⁵ Yawmsaub hais li no ntsig txog cov xibhwb cev lus uas coj kuv haiv neeg yuam kev, uas qw tias muaj kev thaj yeeb rau thaum lawv muaj noj, thiab tshaj tawm tias muaj kev ua rog rau tus uas tsis muab ib yam dabtsi rau lawv noj hauv lub qhov ncauj.

⁶ “Vim li no yuav ua hmo ntuj rau nej tiamsis nej yuav tsis ua yog toog pom, yuav tsaus ntuj nti tiamsis nej yuav tsis txawj pom tom hauv ntej. Lub hnub yuav poob qho rau cov xibhwb cev lus ntawd, nruab hnub los yuav tsaus ntuj nti rau lawv.

⁷ Cov uas txeev ua yog toog pom yuav poob ntsej muag, cov uas pom tom hauv ntej yuav raug txaj muag. Lawv sawvdaws yuav pos ncauj nti rau qhov tsis muaj lus teb ntawm Vajtswv tuaj.”

⁸ Hais txog kuv mas kuv muaj hwjchim thiab muaj Yawmsaub tus Ntsuj Plig thiab muaj txojkev ua ncaj thiab muaj zog puv nkaus, xwv thiaj tau qhia Yakhauj paub nws tej kev fav xeeb thiab qhia Yixayee paub nws lub txim.

⁹ Nej cov uas ua thawj hauv Yakhauj caj ces, thiab cov uas kav Yixayee caj ces, cia li mloog tej lus no. Nej ntxub qhov ua ncaj thiab muab qhov zoo ntxeev ua qhov phem tag huvsi.

¹⁰ Nej muab ntshav los tsim Xi‑oo thiab muab kev txhaum los tsim Yeluxalees.

¹¹ Cov thawj hauv lub nroog yuav nyiaj xiab tu plaub, cov pov thawj yuav nqe ntiav thiaj qhuab qhia, cov xibhwb cev lus yuav nyiaj thiaj hais pom tom hauv ntej, los lawv tseem vam Yawmsaub thiab hais tias, “Yawmsaub nrog nraim peb nyob los tsis yog? Tsis muaj ib yam kev phem dabtsi yuav tshwm los raug peb li.”

¹² Vim yog tim nej ntag, Xi‑oo thiaj yuav raug muab laij ib yam li laij teb, Yeluxalees yuav pob tag ua tej niag pawg, thiab lub roob tuam tsev yuav ciaj ua roob hav zoov.