Amaus 7 - Vajtswv Txojlus - lus Hmoob Dawb - txhais tshiab xyoo 2004

Kooj txig thiab hluavtaws thiab lub qe hlau ntsuas qhov ntseg

¹ Vajtswv Yawmsaub qhia tshwm rau kuv pom li no. Nws tsim tej kooj txig rau thaum phaum qoob tom qab hlav tuaj, yog tom qab phaum qoob uas hlais pub rau vajntxwv lawm.

² Thaum kooj txig noj tej nroj tsuag hauv lub tebchaws tag lawm, kuv txawm hais tias, “Au Vajtswv Yawmsaub, thov koj zam txim lauj! Yakhauj yuav ua li cas ua neej nyob? Nws tseem me me xwb.”

³ Zaj no Yawmsaub hloov dua siab. Yawmsaub hais tias, “Yuav tsis muaj raws li no.”

⁴ Thiab Vajtswv Yawmsaub qhia tshwm rau kuv pom li no. Vajtswv Yawmsaub hu hluavtaws los txiav txim, mas hluavtaws kub kiag hiavtxwv loj thiab lub tebchaws huvsi.

⁵ Kuv thiaj hais tias, “Au Vajtswv Yawmsaub, thov tswj cia. Yakhauj yuav ua li cas ua neej nyob? Nws tseem me me xwb.”

⁶ Zaj no Yawmsaub kuj hloov dua siab. Yawmsaub hais tias, “Yuav tsis muaj raws li no.”

⁷ Thiab nws qhia tshwm rau kuv pom li no. Yawmsaub sawv ntsug ntawm phab ntsa uas siv lub qe hlau ntsuas qhov ntseg, nws tuav rawv lub qe hlau hauv nws txhais tes.

⁸ Mas Yawmsaub hais rau kuv tias, “Amau 'e, koj pom dabtsi?” Kuv teb tias, “Pom lub qe hlau ntsuas.” Yawmsaub hais tias, “Saib maj, kuv tabtom muab lub qe hlau ntsuas hauv nruab nrab kuv haiv neeg Yixayee, kuv yuav tsis zam lawv dua li lawm.

⁹ “Yiha tej chaw siab teev dab yuav raug muab ua puam tsuaj thiab Yixayee tej chaw pe hawm yuav raug muab tso tseg piam tag, thiab kuv yuav xuas ntaj sawv tsees tawm tsam Yelaunpau‑as caj ces.”

Amau thiab Amaxiya

¹⁰ Amaxiya uas ua pov thawj hauv Npe‑ee xa xov mus rau Yixayee tus vajntxwv Yelaunpau‑as hais tias, “Amau ntaus tswvyim fav xeeb rau koj hauv ib tsoom Yixayee. Lub tebchaws ris tsis taus nws tej lus huvsi.

¹¹ Rau qhov Amau hais tias, ‘Yelaunpau‑as yuav tuag hniav ntaj, thiab cov Yixayee yuav poob tebchaws mus deb.’ ”

¹² Thiab Amaxiya hais rau Amau tias, “Koj uas hais pom tom hauv ntej, cia li mus, cia li khiav rov mus rau hauv Yuda tebchaws. Noj tej mov qhov ntawd thiab cev Vajtswv lus rau qhov ntawd nawj.

¹³ Tsis txhob tuaj cev Vajtswv lus ntawm Npe‑ee dua li, rau qhov lub chaw no yog lub chaw uas vajntxwv pe hawm, thiab yog lub tebchaws li tuam tsev.”

¹⁴ Amau txawm teb Amaxiya tias, “Kuv tsis yog ib tug xibhwb cev Vajtswv lus lossis xibhwb cev lus li tub, kuv yog neeg yug tsiaj txhu thiab neeg tu txiv cev.

¹⁵ Yawmsaub coj kuv tawm hauv qhov uas yug yaj yug tshis tuaj, thiab Yawmsaub hais rau kuv tias, ‘Mus maj, cia li cev lus rau kuv haiv neeg Yixayee.’

¹⁶ “Nimno koj cia li mloog Yawmsaub tej lus. Koj hais tias, ‘Tsis txhob cev Vajtswv li lus tawm tsam cov Yixayee, thiab tsis txhob qhuab qhia tawm tsam Yiha caj ces.’

¹⁷ Vim li no Yawmsaub thiaj hais li no tias, ‘Koj pojniam yuav ua poj muag cev rau hauv lub nroog, koj tej tub tej ntxhais yuav tuag tag rau hniav ntaj, koj tej teb yuav raug muab ntsuas faib. Koj tus kheej yuav tuag rau hauv lub tebchaws uas qias tsis huv, thiab cov Yixayee yeej yuav poob tebchaws mus deb ntawm lawv lub tebchaws.’ ”