Amaus 3 - Vajtswv Txojlus - lus Hmoob Dawb - txhais tshiab xyoo 2004

Tus xibhwb cev lus li haujlwm

¹ Cov Yixayee 'e, cia li mloog tej lus uas Yawmsaub hais tawm tsam nej, yog hais tawm tsam tag nrho haiv neeg uas kuv coj tawm hauv Iyi tebchaws los.

² “Tag nrho ib tsoom neeg hauv lub ntiajteb no, nej yog haiv neeg uas kuv xaiv cia, mas kuv yuav rau txim rau nej vim tim nej tej kev txhaum huvsi.”

³ Yog ob leeg tsis tau teem tseg cia yuav ua ke taug kev tau thiab lov?

⁴ Tsov ntxhuav nyooj tom hav zoov rau thaum tsis tau qauv noj lov? Yog thav tsov ntxhuav tom tsis tau dabtsi noj mas yuav quaj hauv nws lub chaw nkaum lov?

⁵ Tsis cuab hlua noog yuav los mag rooj hlua hauv av lov? Yog tsis muaj dabtsi mus tsuj rooj hlua, rooj hlua yuav cia li txhais hauv av lov?

⁶ Tshuab raj kub yaj rau hauv lub moos, tej pejxeem tsis ras lov? Yog Yawmsaub tsis ua, tej xwm txheej phem yuav poob los raug lub moos lov?

⁷ Qhov tseeb Vajtswv Yawmsaub yeej tsis npog ib yam dabtsi uas nws ua es tsis qhia rau nws cov qhev uas yog xibhwb cev nws li lus.

⁸ Tsov ntxhuav nyooj lawm, leejtwg yuav tsis ntshai? Vajtswv Yawmsaub hais lawm, leejtwg yuav npog tsis cev nws tej lus?

Xamali yuav puam tsuaj

⁹ Cia li tshaj tawm rau tej chaw ruaj khov hauv lub moos Asadau thiab tej chaw ruaj khov hauv Iyi tebchaws hais tias, “Cia li tuaj txoos ua ke rau saum Xamali tej roob thiab tsa muag ntsia tej kev ntxhov hnyo ntau kawg thiab tej kev quab yuam hauv lub nroog ntawd.”

¹⁰ Yawmsaub hais tias, “Cov uas ua limhiam ntais ntuj thiab ua tub sab thiaj tau nyiaj txiag los khaws cia rau hauv lawv tej chaw ruaj khov, lawv yeej tsis paub ua raws li uas raug cai.”

¹¹ Vim li no Vajtswv Yawmsaub thiaj hais li no tias, “Yeeb ncuab yuav tuaj vij lub tebchaws no thiab ntaus nej tej chaw tiv thaiv kom pob tag, thiab lws nej tej chaw ruaj khov.”

¹² Yawmsaub hais li no tias, “Tus uas yug yaj txeeb tau ob ceg lossis ib nplais nplooj ntseg ntawm tsov ntxhuav qhov ncauj li cas, mas cov Yixayee hauv Xamali yuav tau ib nyuag ceg kaum rooj thiab ib sab chaw pw dim ib yam li ntawd.”

¹³ Vajtswv Yawmsaub, uas yog Vajtswv muaj hwjchim loj kawg nkaus hais tias, “Cia li mloog thiab ua timkhawv kom Yakhauj caj ces.

¹⁴ Hnub uas kuv rau txim rau cov Yixayee tej kev fav xeeb, kuv yuav rau txim rau tej thaj xyeem dab hauv lub moos Npe‑ee, thiab tej kub ntawm lub kaum thaj ntawd yuav raug muab txiav poob rau hauv av.

¹⁵ Kuv yuav rhuav tej tsev ntuj no thiab tej tsev ntuj kub pob tag ua ke, thiab tej tsev uas xuas kaus ntxhw ua yuav puam tsuaj, thiab tej vaj tse loj loj yuav ploj tag huvsi.” Yawmsaub hais li no ntag.