Amaus 2 - Vajtswv Txojlus - lus Hmoob Dawb - txhais tshiab xyoo 2004

¹ Yawmsaub hais li no tias, “Qhov uas cov Mau‑a ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv muab cov Edoo tus vajntxwv tej pob txha hlawv ua hmoov zeb sib.

² Vim li no kuv yuav tso hluavtaws los rau saum cov Mau‑a, mas hluavtaws yuav kub lub moos Kheli‑au tej chaw ruaj khov, thiab cov Mau‑a yuav tuag rau hauv tej suab ua nqaj ua nqug thiab rau thaum muaj suab qw ua rog thiab suab raj kub yaj nrov.

³ Kuv yuav muab tus uas ua thawj kav rhuav tshem tawm hauv lawv mus, thiab yuav tua cov thawj hauv lub tebchaws ntawd sawvdaws nrog nws ua ke.” Yawmsaub hais li no ntag.

⁴ Yawmsaub hais li no tias, “Qhov uas cov Yuda ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv muab Yawmsaub txoj kevcai tso tseg, thiab lawv tsis tuav rawv nws tej kab ke. Lawv mloog tej lus dag mus yuam kev ib yam li lawv tej poj koob yawm txwv.

⁵ Vim li no kuv yuav tso hluavtaws los rau saum Yuda, mas hluavtaws yuav kub Yeluxalees tej chaw ruaj khov.”

Rau txim rau cov Yixayee

⁶ Yawmsaub hais li no tias, “Qhov uas cov Yixayee ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv muab cov neeg ncaj ncees muag yuav nyiaj, thiab muab cov neeg pluag muag yuav ib nkawg khau.

⁷ Lawv tsuj tej neeg pluag lub taubhau rau hauv cov hmoov av, thiab muab cov neeg txom nyem nyuaj siab thawb pes ntiag mus. Ob txiv tub mus deev tib tug pojniam, ua qias puas tsuas kuv lub npe uas dawb huv.

⁸ Lawv pw ib sab ntawm txhua lub thaj xyeem dab pw rau saum tej tsoos tsho uas muab los yuam nqe. Hauv lawv tus Vajtswv lub tuam tsev mas lawv haus cawv txiv hmab uas yog muab ntawm cov uas raug nplua los.

⁹ “Kuv kuj muab cov Amaulai ua puam tsuaj rau ntawm lawv hauv ntej, yog cov neeg uas siab yam li tej ntoo ciab, thiab khov yam li tej ntoo qheb. Kuv muab lawv tej txiv uas nyob saud thiab tej cag uas nyob hauv ua puam tsuaj tag huvsi.

¹⁰ Kuv kuj coj nej tawm hauv Iyi tebchaws los, thiab coj nej hauv tebchaws moj sab qhua tau plaub caug xyoo, kom nej thiaj tau cov Amaulai lub tebchaws ua nej teej nej tug.

¹¹ Kuv tsa nej cov tub qee leej ua xibhwb cev kuv lus, thiab tsa nej cov tub hluas qee leej ua cov Naxi. Cov Yixayee 'e, tej no tsis muaj tseeb lov?” Yawmsaub hais li no ntag.

¹² “Tiamsis nej tseem yuam cov Naxi haus cawv txiv hmab, thiab txwv cov xibhwb cev lus tias, ‘Nej tsis txhob cev lus kiag li.’

¹³ “Saib maj, kuv yuav muab nej nias rau hauv nej lub chaw, ib yam li lub tsheb nyuj uas thauj tej qoob puv nkaus nias rau hauv av.

¹⁴ Tus neeg nrawm yuav tsis muaj peevxwm khiav dim lawm, tus neeg muaj zog los yuav tsis muaj zog lawm, tus uas siab loj siab tuab yuav cawm tsis tau nws txojsia.

¹⁵ Tus uas tuav rawv hneev yuav sawv tiv tsis tau, tus uas txhais taw nrawm yuav khiav tsis dim, tus uas caij nees yuav cawm tsis tau nws txojsia.

¹⁶ Tus uas siab loj siab tuab hauv cov tub rog, los hnub ntawd yuav khiav liab qab tsuas.” Yawmsaub hais li no ntag.