Kwikari 8 - Kakaɨyari Niukieya

¹ Xɨka ne'iwa pehɨkɨtɨnike, nemaama tsitsieyatsie pemutawerixɨ. Kepauka nemɨmatsi'anukunake kiekaritsie nepɨmatsiku'itsewenikeyu, xewitɨ pɨkayɨwenikeyu kename 'axaneyɨane mɨnerahɨaweni.

² 'Amamatsie nekawietɨ, nemaamakie nepɨmatsi'atɨanikeyu, pemɨnetita'ɨkitɨanikɨ naki'eriya hepaɨtsita. Winu nepɨmatsi'anu'itɨanikeyu naitɨ tinɨkame, meta 'ikwaxi neharaweritamieme hayari.

³ Mɨtiniyɨweniketɨ nemu'u 'utatana nemɨniuka'uxipitɨani. Mɨtiniyɨweniketɨ yutseriekɨ mɨneniuwiya.

'Uki mɨnaki'eriwa

⁴ Ne nepɨxewawirie, 'ukarawetsixi Kerutsareme kiekatari, xepɨka'ihɨtɨaka meta xepɨka'i'uximatɨaka 'uka neminaki'erie, mɨkɨ yɨkɨmana kepaukake manutaniere.

'Ataxewiriekamieme Kwikari Yunaitɨ kwikarɨwame

⁵ ¿Kemɨ'ane pɨyɨane makumawetsie matimie 'uki minaki'erie hetsie rawiyatɨ? Xikɨti hetɨa nepɨmatsi'anutahɨtɨa, mana 'amaamatsie pepɨkaya, meta manatsiere pɨmatsi'utiniwexɨ.

'Uki mɨnaki'eriwa 'Uka mɨnaki'eriwa

⁶ Kenena'utɨaka 'a'iyaritsie tseyu hepaɨ, tepɨa hepaɨ 'amamatsie kenena'utɨaka. Waɨkawa pɨtɨrɨkaɨye naki'eriya, mɨki hepaɨ, kaniyuritɨni naki'eriya, mɨki teukiya hepaɨ. Naki'eriya taiyari Kakaɨyari taiyaya hepaɨ kani'aneni.

⁷ Tsepa haa muwaɨkawa pɨkayɨwe mitɨnikɨ, meta haa hatɨa mieme mikumaweriya tɨma pɨkayɨwe. Xewitɨ xɨka tita naime mɨrexeiya tipatamɨkɨni naki'eriyakɨ, 'axamɨtikɨhɨawarɨwanikɨ xeikɨa katinikaxeiyamɨkɨ.

Yunaitɨ kwikarɨwame

⁸ Kwinimieme yemekɨ 'etsipuyumate tataru 'uka 'akuxi tsitsiteya pɨkahanexɨawawe. ¿Keteteyurieni xɨka ta'iwa 'uta'iwaurieni?

⁹ Xɨka kiekari kuraruyaritɨnike, heimana tepetayatsakeyu pɨrata. Xɨkata 'itupari hɨkɨtɨnike, heimana tepikamanikeyu kariuxa mexayari.

'Uka mɨnaki'eriwa

¹⁰ Ne kiekari kuraruyari nekanihɨkɨtɨni, meta netsitsite huta tuxiyuyari pɨhɨkɨ. 'Ayumieme kepauka 'uki neminaki'erie mɨnetsikuxexeiyatsie kayuwatɨ nemukaxeiya hepaɨ nekatiniyumaika.

¹¹ Tsarumuni kaxie haraweriyari kanexeiyakaitɨni Wahari-Kamuni paitɨ, hipame te'uximayatamete kaniwarehɨritɨani. Mɨkɨ yuxexuitɨ mekaniyetuiriwakaitɨni 'ikwaxi mekaxuxuawerekai, xeimiriyari pɨrata tuminiyari.

¹² Tsarumuni xeimiriyari tumini kena'ɨtɨ, xemeta te'uximayatamete huta tsienituyari, peru nekaxie haraweriyari nexeikɨa pɨtinepiini.

'Uki mɨnaki'eriwa

¹³ 'Ekɨ, tuturi muwa'etsietɨkatsie pemɨti'aita, 'aniuki xeikɨa mekanita'enieka tahamikuma, kenetaniu kuta tepi'enieni.

'Uka mɨnaki'eriwa

¹⁴ Xeiya keneumietɨ, 'uki nemɨmatsinaki'erie. Keneunautsarɨmetɨ maxa hepaɨ, maxa 'etsimupe hepaɨ, hɨritetsie waritsamukɨ muwiriyarietɨkatsie.