Proverbios 3 - Biblia Yanowamö

Bämacö bufi yai jaducäblobä tä a̦

¹ U̦asi. Cafä bä bufi lä cadidamaö wei tä a̦ nofi mojodubo dijä. Bä lä yömölaö wei tä a̦ nofi yai da cadidibo.

² ¿Ö̦jö tawä? Ya tä a̦ lä wäyäö wei tänö wa nia demi malä cudio wei. Dodijidawä wa nia malä bälöo wei.

³ Showadi a da nofimo. A ca̦i da bejedimo, wa nofi mölabobeje. Wa lä nofimou wei tänö, wa ca̦i lä bejedimou wei tänö, a bufi yai da baushiblamolu. ¿Ö̦jö tawä? Wa nia lä nofimou wei tä lä cui, tä shi̦lo yai da dayäa, wa nia lä bejedimou wei tä ca̦i.

⁴ Inaja wa cuaaö ja, Yai Bada tä ma cui, yanowamo bä ma cui, wa bä bufi nia bluca doblamabou. “Ö̦jö a dodijaö”, wa nofi nia tabouje.

⁵ “Ya bufi dao”, cafä wa nofi tamobou dao ma cui, wa nofi mölamobou mlai ja, bei wa bufi yainö, Jeobaa a nofi yai da mölabo.

⁶ Wa cuaaö lä bädao wei tä ja, ö̦jö a da bufibo, wa cadidamafälöbä.

⁷ “Ya bufi jaducäwä waiquiwä”, a nofi tamobo dijä. Jeobaa wa nö quili talanö, wa̦lidiwä tä jamö a bufi mö da yabajadalu.

⁸ Inaja wa cuaaö ja, wa lä jaliliaö wei wa nia jalou co̦o. Wa lä nini wei tä nia wanonoblou.

⁹ Afä wa tä lä tabou wei tä ja, Jeobaa a da dobälö, afä nii bä jaba lä lalou wei bä ca̦i ja. Inaja wa cuaalanö, Jeobaa wa nofi lä tabou wei tä nia dablamou.

¹⁰ Inaja wa cuaaö ja, afä nii bluca wa bä nia yai tabou majöo. Afä nashiwä wa toubä befi ca̦i lä i̦tabou wei toubä fe nia lajoblou.

¹¹ U̦asi. Jeobaanö wa cadidamaö fe yadio ja, a jushudo dijä. Cama lija a wasömamou modaa dijä.

¹² Jeobaanö a lä nofimaö wei a yai wasöö malä cui. Bä fö̦ö ebänö bä ijilubö ebä yai lä nofimaö wejei bä wasöö lä culajeinaja showawä.

¹³ A bufi lä jaducäblou wei a lä cui, a bufi doblao. A bufi ya̦cumö lä dao wei a lä cui, inaja showawä.

¹⁴ Ö̦jö tänö täbä yai bayeliblamou malä cui. Blada bä ma cui ja, olo bä ma cui ja, ö̦jö bä ja täbä ma bayeliblamou wei ma cui, bufi jaducäwä tä lä cui, tä nowa shi̦lo yai bluca.

¹⁵ Maa mabä baushi wai lä tabolajei mabä nowa ma bluca wei ma cui, bufi jaducäwä tä lä cui, tä nowa yai bluca dodijiwä. Täbä bufijamobä bluca täbä cublawä ma cui, bufi jaducäwä tä lä cui, ö̦jö tä nowa shi̦lo yai bluca fe balojowä.

¹⁶ Bufi jaducäwä tä lä cui, jai a imicö dodoa, wa dobäbä. Wa nia dodijidawä lä bälödio wei tä ja, wa dobäö dao. Wa nö nia lä madofiböaö wei tä ca̦i ja. Wa nofi nia dodijidawä lä tabou wejei tä ca̦i ja.

¹⁷ Dodijidawä wa cuobä, bufi jaducäwä tä lä cuinö wa cadidamaö. Wa cadidamaö lä cuaafälöö wei däjä, wa bufi yanöcömabou.

¹⁸ Bufi jaducäwä tä lä cui ja, bä bufi mö lä blucao wei bä lä cui, bä dodijidawä cuo shi wa̦libä tä tabouje. Bufi jaducäwä tä lä lofotobolajei bä lä cui, bä bufi a̦fa doblalou taöje.

¹⁹ Jeobaa a bufi jaducäwä anö, bita a tablalema. A bufi moyawe anö, mösö lelemaquema.

²⁰ A bufi dao anö, mau u bada lä cubodi u bläshäblamalema. Tä mashita jäläobä, öjölashi bä jamö culanö jeu jeu cäbä blälämaö.

²¹ U̦asi. A bufi shi̦lo jaducäwä ca̦i da bälöo. A bufi ca̦i walalawä ca̦i da cuo. Moli ma cui tä nofi mojodubo dijä.

²² Wa bufi lä jaducäo wei tänö, wa bufi ca̦i lä walalao wei tänö, wa nia demi cudio. Dodijidawä wa nia dablaöje.

²³ Ö̦jö däjä, wa bufi nia lofote ca̦i bälöo. Wa bufi wedinajamou mlai ja, wa nia cadidofälöö.

²⁴ Quilii mlai ja wa nia bälödou, bufi cuaablalou mlai ja, wa nia dodijidawä mio.

²⁵ Täbä nö quilili bleaabä tä ma bädou däjä ma cui ja, a quili dijä. Bä doblou lä mlai bä waicabä etä ma cublou däjä, a bufi cuaa dijä.

²⁶ Jeobaa wa nofi mölabou fe yadiobä, a malä cui. Wa nia nowamaö.

²⁷ Ai a lä cui, a bayeliblamobä a waiquiwä ja, a noshi bayeli umlao dijä. Wa bayeliblabä wa tä tabou waiquia ja, a da bayeliblalö.

²⁸ Aifä a lä cui, cafä lija a bayeliblamou bufio ja, a bayeliblaö da showadao. Wa bayeliblabä tä cua waiquia ja, “Obi yai”, a cu dijä.

²⁹ Aifä a bälöa lä ajedele, “Inaja ya nia taamaö”, a bufi cu dijä. Cafä lija a malä mölaö wei.

³⁰ Wa yabäcaimi ja, ai a lä cui a wa̦ lafuma dijä. Tä nowa cuami waiquiwä.

³¹ A waitelimou si lä ijejei a lä cui lija a bufi waiyo dijä. A owäma dijä.

³² Wa̦lidiwä talewä bä lä cui, Jeobaanö bä nofi wa̦libou malä waiquile ma cui, bä lä bejedimou wei bä nofi shi̦lo tabou ayao.

³³ Bä doblou lä mlai bä lä cui, Jeobaa lija cama ebä ca̦i bluca waimamou. Ö̦jö ma cui, bä lä dodijaö wei bä lä cui, cama ebä ca̦i bluca bayeliblamou.

³⁴ Täbä nö lä waiblaö wejei bä lä cui, Jeobaanö bä nö ca̦i waiblaö mö feduo. Ö̦jö ma cui, bä jimöo lä mlai bä nofi ojodabou.

³⁵ Bä bufi lä jaducäi bä lä cui, dodijidawä bä nia ca̦i cuo wawädoo. Ö̦jö ma cui, bä bufi jaducäwämi nö lä beblalou wei bä lä cui, wawädowä bä nö nia shi̦lo bleaaö.