Judas 1 - Biblia Yanowamö

Juda a wa̦fa lä wäyämou wei tä a̦

¹ Jesucristo ya nosie juabä ei camiyä Juda cä ya e, Santiago ya e mashi lä cui. Yai Bada tänö wamacö lä nacaleno wei wamacö nija, ei ya tä a̦ oni shömaö lä cule. Yai Bada bäma a nofi lä Fö̦ömalenö wamacö nofimaö dodijia lä cule. Jesucristonö wamacö lä nowamaö wei wamacö.

² Bei. Yai Bada nija showadi wamacö shino bayeliblamou dodijiobä. Wamacö nofi shino asibobä. Wamacö bufi ca̦i shino yanöcömabobä. ¿Ö̦jö tawä? Wamacö bufi ca̦i shino nofimabou fe balojoobä.

Bä lä moyawäblamaö wei tä a̦

³ Iba bämacö lä nofimaö wei wamacö. Jesucristonö bämalecö lä bayelibou wei ya tä a̦ nia ma oniblano wei ma cui, ö̦jö ya tä a̦ tablaö mlai ja, ei shomi ya tä a̦ oniblaö majöa dicoa lä cule, wamacö yai moyawäobä. ¿Ö̦jö tawä? Ya wa̦ fe nia blacäjou. Yai Bada bäma a nofi nia lä mölabou wei tä a̦ jöbämoa waiquibema, cama bäma ecö lä cui nija. Mijamö tä a̦ shomiblamaö majöo mlaobeje, cafä wamacö nia läo. Wama tä a̦ nofi bäyäbobä wamacö waiquiwä.

⁴ ¿Ö̦jö tawä? Camiyä bämacö nija Yai Bada a daö lä mlajei bä yädäo waiquio ja̦toolaliyoma, etä a̦ nia jole jole fa wäyäjenö. Bä nö nia lä bleaamaö wei, yedu ja ma cui Yai Bada tänö tä daö showaoma. ¿Ö̦jö tawä? No mlai ja Yai Bada tänö täbä nofi ojodabou cudeenö a wa̦fa ishoimi taöje, cama bä cuaaö bufi lä doblao weinaja bä cuaabä. Bada tä Jesucristo bäma a nosie shino yai juabä a waiquiwä ma cui, a wa̦ juaö mlajei, a wa̦ waiije.

Yai Bada a nia lä ishou wei tä a̦

⁵ Ei tä a̦ ja, wamacö yömölamou ma waiquiono wei ma cui, bämacö bufi nia jaducublamaö co̦o. ¿Ö̦jö tawä? Ejido jamö culanö Isaeli ebä lä co̦leno wei a lä cuinö, ai bä mö watäblaö majölayoma, a bejedi bufibou fa mlacujenö.

⁶ ¿Ö̦jö tawä? A̦jele bä ma cui, bä bada lämabou ma balöono wei ma cui, ö̦jamö bä cuo fa mojionö etä daquemaje. Fei däjä tä mö didi sublaodayobä jamö Yai Bada tänö bä o̦cabou majöa lä cule, duo shibä ba̦liminö. Yai Bada tänö täbä bluca jömabä etä cublou showao mlao däjä, ö̦jamö bä tabou balöa lä cule.

⁷ ¿Ö̦jö tawä? Sodomateli bä ma cui, Comolateli bä ma cui, ö̦jamö bä bälöblao fe lä fa̦yoono wei bä ma cui, inaja bä yabäcäo cuo mö feduo showaoma. Bä nofi ca̦i beshili jushublalou nö quiliadima. Ö̦jö cudeenö, cowa ba̦limi wacöbänö Yai Bada tänö bä nö blemalalema. ¿Ö̦jö tawä? Bämacö quilibä tä a̦.

⁸ Inaja showawä, mijamö bä lä cule, tabi tabi bänö bä bufi taamamou bufi fa doblaonö, Yai Bada tä a̦ juaimije. Bä nofi beshili ca̦i jushuaö. Fedu jamö täbä lä doblaladi täbä lä cui, täbä nö ca̦i waiblaö si ijejeweje.

⁹ ¿Ö̦jö tawä? Yanowamö täbä bädawä ma cui, täbä a̦ faö quilibloimi. A̦jele Miqueo a wa̦fa lä cui, a bada ma cui inaja a cuaanomi. Moisesi nomawä a nowa ja, fecula bada nija a wa̦ läo däjä a wa̦ oquewä fama. A jömaö däjä e a̦ lafujou mlai ja, abinaja a shino oquewä cuma. —Bada tänö wa nö nia bleaamaö —a shino moli cudaliyoma, oquewä.

¹⁰ Ö̦jö ma cui miji bä lä cuinö täbä daö lä mlajei täbä nö waiblaöje. Yalo bä bufi dao lä mlainaja ö̦jö bä cuwä. ¿Ö̦jö tawä? Yalo bä lä cui, showadi bä cama lä cuaaö weinaja bä cuaaö bädao. Inaja miji bä lä cui bä ca̦i cuaaö dicoa yalo bä mö watäblamou cuquei.

¹¹ ¡Bä nö bleaamabä lä! Caino a lä cui, ö̦jö a owämaö dicooje. Balaama a bufi yacläö lä cuaano weinaja bä ca̦i cuaaö nodiablalou. Ö̦jö a lä cui, a dobämou bufi fa doblaonö a noshi ö̦jödao dicooma. Colei a ma cui a ca̦i owämaöje. Bada bä a̦ ji̦liblaö fa mlacunö, a fe ou yalo cama ebä mö ca̦i bluca watäblamolayoma. Inaja showawä, miji bä mö ca̦i watäblamou nodiobä bä li cuaaö.

¹² Tä a̦ jole lä wäyäö wejei bä lä cui, wawädowä bä nofi fa jushuablalonö, Jesucristo bufilewä wamacö iyaö ca̦i co̦camou däjä tä wa̦lidiamaö läoje. Cama bä nofi shino yaimamou. Bä a̦ lä ji̦liaö wejei bä mölaa bälayou. ¿Ö̦jö tawä? Jai ölajashi bloque bä lä culenaja bä cuwä. Maa a quei mlai ja, wadolinö bä yaläö co̦ofälöö. Bä dodijaö mlai ja, jai fii bloque defibä ca̦i cuwä mö feduwä. Nii bä lalobä defibä cua ma cule bä laloimi. Jai fii fäwä defibä lä culenaja bä ca̦i cuwä, defibä nasöcö jocäblou lä waiquio wei defibä lä cui. Bäma bä a̦ nofi mölabobä bämi.

¹³ Mau u jamö bä moshi moshi shami dablamou nosi blacäcou lä culenaja, etä wa̦lidiwä ca̦i dablamodii cuwä. Shidicali bä queoblou lä culenaja, bä yacläö ja bä ca̦i cuwä. Tä mö didi lä sublabodi jamö bä nö bleaamaö shi wa̦libä bä waiquiwä.

¹⁴ Enocö a ma cuinö, inaja bä lä cuaaö wei tä a̦fa ca̦i wäyäö balöo showaoma. Ö̦jö Enocö a lä cui, Adana bä ijilubö ebä nodiwä bälöablalou fa cuaanö a bälöo nomöjöo nodioma. Tä nia lä cublou wei tä a̦fa wäyäö ja, abinaja Enocö a cuma. ¡Bei! Bada tä juu lä cuimi. A̦jele ebä lä doblaladi, bluca dodijiwä täbä ca̦i juu lä cuimi,

¹⁵ täbä nö jödödöwä bleaamabä. Yai Bada a daö lä mlajei, ö̦jö bä nowa nia taö cadidio, bä doblonomi cudeenö. Wa̦lidiwä talewä cäbä. Bä nofi jushublalou dodijioma. Yai Bada a wa̦fa wa̦lidiwä tamaje. A nö waiblaö dodijiomaje. Einaja Enocö a cuu showaoma.

¹⁶ Inaja bä lä cuaaö wei bä lä cui, bä bufi shino jushuablalou talei. Bä bufi diclojowä. Cama bä cuaaö bufi lä doblao weinaja bä shino cuaadii. Bä nofi cama shino doablamou. Jole jole täbä nofimaö buoje, bä shi ö̦jödamabeje.

Bä bufi lojodoobä tä a̦

¹⁷ ¿Ö̦jö tawä, bämacö lä nofimaö wei wamacö? Bada tä Jesucristonö bä lä shömöleno wei bä lä cui bä a̦ malä fano wei. Ö̦jö bä a̦ nofi da jaduculöje. Tä nia lä cublou wei tä a̦fa wayoaö balöomaje.

¹⁸ Abinaja wamacö nowa ca̦i tamaje. —Yai Bada tänö täbä nia lä jömaö wei tä cublou ajedou däjä, tä a̦ nö lä waiblaö wejei bluca bä nia wawäblou. Yai Bada a daö lä mlajei bä showadi lä cuaaö weinaja bä nia cuaaö, cama bä cuaaö bufi lä doblao weinaja showawä.

¹⁹ Ö̦jö bä a̦nö täbä nofi fa wa̦liayonö, täbä sheleleblou cuquei. Yanowamö täbä showadi lä cuaaö weinaja bä cuaaö mö feduobä cäbä. Yai Bada a Bufi taboimije, ö̦jö bänö.

²⁰ Ö̦jö ma cui, bämacö lä nofimaö wei wamacö. Yai Bada tänö wamacö bufi taamaö waiquiwä yalo, Jesucristo wama a nofi mölabou. Wama a nofi mölabou waiquia yalo, bä bufi showadi da lojodoablalo. Yai Bada a Bufi lojodenö bä nö bayeli da nacao.

²¹ ¿Ö̦jö tawä? Yai Bada tänö wamacö lä nofimaö wei wama tä bufibolanö, bä shino dodijidawä da cuo. Bada tä Jesucristonö wamacö nofi ojodabou yalo, ba̦limi wamacö nia cuo. Ö̦jö tä ja bä nö yai da daicu.

²² Afä ai bä lä cui, bä bufi wedinajamou dicoo ja, bä bufi yai da shaliliablalamaje.

²³ Ai bä mö feduwä lä cui, jai cowa wacö jamö bä nö bleaaö lä waiquile, lobe bä da co̦ablaje, bä jucäamobä. Ai bä lä shomiablalou wei bä lä cui, wama etä nö quili talanö wama bä bayeliblabä. Wamacö moyawälanö wama bä nofi ojodabobä, cama bä lä cuaaö wei tä ja, wamacö luluamou dicoo mlaobä.

Bä lä bayeliblou wei tä a̦

^24-25 Jesucristo a lä cuaano wei tänö, Yai Bada a yami cua lä ayalenö bämacö jucäaö. Dodijidawä wamacö yai tamabobä a. Wamacö shomiablalou mlai ja, cafä wamacö nija wa̦lidiwä wiisibö tä wai cua mlai ja, cama etä shi̦i lä cule jamö wamacö nia dodijidawä lä ublamabou wei, ö̦jö lä a waiquiwä. Wamacö bufi nia ca̦i doblamabou. Tä ulifi tablamou showao mlao däjä ma cui, fei däjä ma cui, obi ma cui, ö̦jö a wa̦fa doblao tamou shi wa̦libä a waiquiwä. Wawädowä a nofi Badabobeje. A nö ca̦i lojode ö̦jöböabeje. Inaja lä tä cuobä.