Marko 15 - Gvray Shànshér Mòngkà Kagvp Àngshv́r

Pilat yv́ng Yesu koò we

¹ Mèpvng sháng mvgá la:ngí, shvrúngshú vjìrì nø shaqré shaqtvngrì nv̀ng dvrá svrarì nv̀ng Shaqré Lìpòngmè vsv̀ngrì shvngbe tiqdø vrashì dá:ngí, Yesu sv̀ng dóngdv̀ng shøl bǿà nø̀ Pilat wur sv̀ng tvle bǿà.

² Wekvt Pilatní Àng sv̀ng, “Nà nø Yuda vsv̀ngrìò Koqkv́m èí má?” wa rø:tnòe. Yesuí àng sv̀ng, “Nàí ni èshø̀n bǿà,” wa vtá:nòe.

³ Shvrúngshú vjìrìí nø, Àng sv̀ng mvme ciqí koòe.

⁴ Wekvtrá Pilatní Àng sv̀ng, “Àngmaqí Nà sv̀ng wedv́ngte èko nìgø, Nà tiqkà gø mèshø̀n má?” wa rø:tnòe.

⁵ Íwe, Yesu tiqkà gø mvshø̀n rvt Pilat gvzà dàe.

Yesu shvtlv́m kà ra:tnò we

⁶ Shvlé Bóy vrv̀m taq bashàrì røtshì ra we tung rung vsv̀ng kagǿ í nìgø, Pilatní wegǿ shvlángalv́m vtóng vle.

⁷ Wenila taq vhaq vjángshì nø̀ vsv̀ng shvt dvkà rvt tung rung we vsv̀ngrì vle. Àngmaq nv̀ng tiqdø Baraba tǿò we tiqpè vle.

⁸ Wekvt vsv̀ng loksokrì nø àngmaq dvpvt àngwà wáaò dø, tung rung vsv̀ng tiqgǿ shvlángalv́m Pilat yv́ng di nø̀ røtshìe.

⁹ Íwe Pilatní àngmaq sv̀ng, “Yuda vsv̀ngrì Koqkv́mpè mv̀ng nàmaq dvpvt shvlángaì kvt èshòngnø̀nge má?” wa rø:tnòe.

¹⁰ Kadø íe wani Yesu sv̀ng shǿm rvtnø̀ shvrúngshú vjìrìí Àng kaq dvshílv́m tvlea:tnà we sv̀ng à:ngí dǿm bǿà.

¹¹ Ínìgø, shvrúngshú vjìrìí nø àngmaq dvpvt Baraba shèlángashà wa røtlv́m, vsv̀ng loksokrì sv̀ng dvzà:ngòe.

¹² Wekvt Pilatní vrá tiqkvt àngmaq sv̀ng, “Wedø íni, nàmaqí Yuda vsv̀ngrì Koqkv́m èlv́nnø̀ng pè sv̀ng ngàí kadø lvwv̀ngònø̀ng?” wa rø:tnòe.

¹³ “Àng sv̀ng nàtaqò,” wa àngmaq vrá vkiq lú:ngì.

¹⁴ Pilatní àngmaq sv̀ng, “Pà rvtnø̀ lè? À:ngí kapà mvrà vléa:pmà má?” wa rø:tnòe. Íwe, “Àng sv̀ng nàtaqò,” wa àngmaq té vkiqe.

¹⁵ Wekvt Pilatní vsv̀ng loksokrì sv̀ng nøt dvshǿm mvyǿ weí, àngmaq dvpvt Baraba shvlà:ngòe. Yesu sv̀ng nø vdip dvzá:rò dá:ngí, Àng sv̀ng wurgang taq vtaqlv́m tvle bǿà.

Yesu sv̀ng vdi:pmò we

¹⁶ Wekvt cìlcèrìí nø, Pilat chø̀mdø̀ng vdòng sv̀ng Yesu kaq shøl bǿà nø̀, cìl tiqdap køp dvkø̀:mòe.

¹⁷ Wekvt àngmaqí Àng sv̀ng shvmoq bèlaq dvgwaò nø̀, bv̀nghǿí za:tnò we koqkv́m vmo Àng sv̀ng shvmoòe.

¹⁸ Wedá:ngí Àng sv̀ng vpǿò nø̀, “Yuda vsv̀ngrì Koqkv́mpèá, gǿngzø̀l gǿngyàng leq vl dvr,” a:lòe.

¹⁹ Wekvtrá àngmaqí kø̀mbàng tiqtà:ngí Àng vgo sv̀ng vdi:pmò nø̀, tø:lí vpíòe. Àngmaq pvnciq tushì sórí vgo ngǿmshi nø̀ Àng sv̀ng noqòe.

²⁰ Àng sv̀ng wedø dvshá dvcø wàò dá:ngí, àngmaqí shvmoq bèlaq dùng chutnaò nø̀ Àng gónggwárì vrá dvgwaòe. Wedá:ngí Àng sv̀ng vtaqlv́m yv́ng shøl bǿà.

Wurgang taq Yesu vtaqò we

²¹ Wekvt vtv́r rvgaq kèní dì ráì nø̀ chàng vzv̀ng we Kureni rvwá pè Simon sv̀ng cìlcèrìí mvdø̀ng mvdaq Yesu wurgang baq dvzá:ròe. Àng nø Alesander nv̀ng Rufus àngnínvm àngpè íe.

²² Wekvt cìlcèrìí Yesu sv̀ng Golgota tǿò zàng sv̀ng shøl bǿà. (“Golgota” nø “vgo sharø rvgaq” wa kà íe).

²³ Àngmaqí muracì vshúò we bìmtì Àng sv̀ng shvaqò we À:ngí màtoò.

²⁴ Àngmaqí wurgang taq Àng sv̀ng vtaqòe. Wedá:ngí, Àng gónggwárì nø kagǿ vpvt vdu má, wa shvwøn dóò nø̀ vwalshìe.

²⁵ Àngmaqí vsháng dvgø̀nari taq Àng sv̀ng vtaqòe.

²⁶ Àng sv̀ng naò nø̀ koò we, “Yuda Vsv̀ngrìò Koqkv́mpè” wa kàrugø̀m taq vruòe.

²⁷ Wekvtrá àngmaqí tølvm vsv̀ng vnípè gø Àng nv̀ng tiqdø, Àng vbàngpa tiqpè, Àng vgwépa tiqpè vtaqòe.

²⁸ [Yalòng nø shànshér kàru taq, “Àng sv̀ng nø dvrá vléò vsv̀ngrì døni dvdut bǿà,” wa vru yà:ngà kà vhømá:mì we íe].

²⁹ Chàng vzv̀ng rìí gø, àngmaq vgo hwashì sórí Àng sv̀ng shvyǿ:mò nø̀, “Ó, Noqngø̀m Tø̀ngnø èca:tnò nø̀, vshø̀m nií rá èwàò pè Nàé,

³⁰ Nà vdè shèlutshì nø̀, wurgang kèní èlashì daq lè!” a:lòe.

³¹ Wedø tiqdvchá, shvrúngshú vjìrì nv̀ng dvrá svrarìí gø, Àng sv̀ng dvcøò sórí, “Dvgá vsv̀ng kaq nø shvlu:tnò we, Àng vdè nø shvlut la mvngutshì nìnø!

³² Nøngmaqí yà:ngì nø̀ kv́m lúnlv́m rvt Israel dvcì Koqkv́mpè, Kristu wa pè nø, wurgang kèní yalvng laq lashì daq lè,” wa tasv̀ng vrùnge. Àng nv̀ng tiqdø wurgang taq vtaq bǿà pèní gø, wedøni Àng sv̀ng zershìe.

Yesu shì we

³³ Vyáng rvwè tiqcé vnínari kèní nv̀mtan vshø̀mnari høq nø̀, we móng móngkøp dødv̀ng wàá:mì.

³⁴ Nv̀mtan vshø̀mnari taq Yesu nø shaqmèí vkiq sórí, “Eloi, Eloi, lama sabaktani?” wae. Wekà nø, “Ngà Gvrayá, Ngà Gvrayá, pàwá Ngà sv̀ng èlàngà má?” wa kà íe.

³⁵ Weshvnvng rip rì tiqmaqí wekà tá bǿà nìnø, “Ku, À:ngí Eliya sv̀ng goòe,” wae.

³⁶ Wekvt tiqgǿ kvlv̀ngá:mì nø̀, bìmtì mvcat taq tìrvmøt tiqpù zø:nò nø̀, kø̀mbàng tiqtv̀ng taq dvcaqò dá:ngí, Àng sv̀ng shvaqò sórí, “Shini vwa laq vl. Eliya di daq nø̀ Àng sv̀ng ka daqò má yà:ngì,” wae.

³⁷ Wekvt Yesu nø, shaqmèí vkiq sórí shaq dvtná:mì.

³⁸ Wekvt Shànshér Tø̀ngnø taqò dvkøq laqtun gø, taq mvtú kèní pvng mvtú høq, talàm díngá:mì.

³⁹ Yesu nø wedø vkiq nø shaq dvtná:mì we sv̀ng, Àng vzv̀ng lap rip we cìlcè tiqyá øpshú dupèí yv̀ng bǿà kvt, “Yapè nø jø̀ngjǿngni Gvray Àngcèpè lví dá:rì,” wae.

⁴⁰ Vrúm yv́ngkèní dvjaqò we svmaré tiqmaq gø vle. Àngmaq dvhø̀ taq Makdala mvrìng kèní Mari nv̀ng, Yaku cv̀mpè ó Yose àngnínvm àngmè Mari gø, Salomi gø vbáe.

⁴¹ Àngmaq nø Yesu Galili rvgaqø vl dvgvp Àng mèpvng cà:nò nø̀ dvzø:mò rì íe. Vrá, Yesu nv̀ng tiqdø Yerusalem wamà sv̀ng ngang lú:ngì we, dvgádø svmaré mvme mè gø weyv́ng vbáe.

Yesu kǿ:mò we

⁴² Narni vzv̀ng ni nø, Dvgǿshilv́m Àngni í rvtnø̀, dørø̀m høqa:tnà dvgvp

⁴³ Arimatia mvrìngpè Yosep nø Pilat yv́ngsv̀ng vzaqshì sórí di nø̀, Yesu vnàng rø:tnòe. Yosep nø Shaqré Lìpòngmè taq vbá nø̀ dvgùng vl we mvgàm tiqpè íe. Àng nø Gvray móngdàn tuq daq we sv̀ng caò pè gø íe.

⁴⁴ Yesu shìá:mì wa kà Pilatní tá bǿà kvt dà lú:ngì nø̀, cìlcè tiqyá øpshú dupè sv̀ng goò dá:ngí, “Àng nø jø̀ngjǿng shìá:mì má?” wa rø:tnòe.

⁴⁵ Cìldùpèí, Yesu nø jø̀ngjǿng shìá:mì, wa àng sv̀ng vl bǿà kvt, Pilatní Yosep sv̀ng vnàng tvleòe.

⁴⁶ Yosepmí vzi shv́nàng laqtun wa:nò nø̀, Yesu vnàng kaò dá:ngí laqtun dù:ngí du:pmòe. Wedá:ngí vchuqshaq lóngdùng dvgv̀m tiqlòng vdòng taq Àng vnàng vyà:lò nø̀ lóngkø̀m tiqgø̀m tvriatnà weí dvgv̀m bv́ngkà bvt shøòe.

⁴⁷ Makdala mvrìng kèní Mari nv̀ng Yose àngmè Mari níí Yesu vnàng kayv́ng vyà:lò we yà:ngòe.