Mi Nɔnɔle 20 - Kazambale lé Sebe Sauunu 1979

Mari gale valé Mériba ’yinu

¹ Izraɛlnu faa bɔ Tisɛn bwi la moné vininzan nya, yé munu dɔ Kadɛs. Fɛkona lé Mari ga yé wa pa.

² ’Yi ’ka ana lo, amalé munu nwa Moizi valé Arɔn ma.

³ Munu we gini Moizi va. Wo léé: Bléyian va lé ko bwenu ga Gakelebale ’lɛ, é kɛlɛ kaa yé ko ’ka ga lɛ ’bɛ bléyi va loo?

⁴ Mɛmalé ka da Gakelebale lé munu nya bwi la ’ko, ko gale ana we ma, ko valé kolé trubɛnu nyaa?

⁵ Mɛmalé ka ko si Éjipiti tɛrɛ la yé ka da ko nya fɛna nyané ’ko naa? Fɛkona ’ko, fɛwɔlɛ vɔna ’ka ana lo, bɔrɔyili ’ka ana lo, dɔrɔyili ’ka ana lo, grénadéyili ’ka ana lo, yé mini’yi boen ’ka ana lo.

⁶ Moizi valé Arɔn si munu va, yé wo go zén‐ékevasɔkɔn ’léé. Wo dia ’wo bli la yé Gakelebale lé fuasan bɔra wo va.

⁷ Gakelebale lé Moizi lɛ léé:

⁸ ’I tawomayili si yé bii valé Arɔn ’é munu laa, ’wo zén ékeva. ’Ka we fe wo yuɛ va gɔlɛ lɛ, yé ’yi é dan bɔra lɛ a gi. ’I gɔlɛ gi ’yi bɔra wo lɛ, yé munu koo, wolé winu koo, ’i ’yi nɔ wo lɛ wa mini.

⁹ Tawomayili lé ke Gakelebale ’lɛ, Moizi a si, Gakelebale a fe a lɛ fɛan zo, a yɛrama.

¹⁰ Moizi valé Arɔn munu laa, ’wo zén ékeva gɔlɛ ’lɛ. Yé Moizi lé wo lɛ léé: ’Kaa nwamimazannu, ’ka tɔné dɔ do. Gɔlɛ ’ko gi lé ko dan ’yi bɔra lɛ ka lɛɛ?

¹¹ ’Bɛ zuo Moizi nwa, yé élé tawomayili duun gɔlɛ lɛ gɔnɔ fié. Yé ’yi kiɛre kun yorole ma. Yé munu ’yi mini, yé winu wozé mini é ziin.

¹² Gakelebale lé Moizi valé Arɔn lɛ léé: Ka ’ka ka bli vo lɛ an lɛ lo, yé ka ’ka an lɛdɔ lɛ a ma Izraɛlnu yuɛ va lo, amalé ka ’ka dan go lɛ munu ’ko nya tɛrɛ lé maa a nɔ wo lɛ, a ta lo.

¹³ ’Yinu ’ko tɔ lé Mériba. Ana lé Izraɛlnu za kɛlɛ Gakelebale va, ’té ébo kɛlɛ lɛamazan nya wo lɛ bɛ, a va.

Édom nwiinzan blɛn Izraɛl giéle yi ga

¹⁴ Wa Kadɛs bléyian va, Moizi munu nwunvɔ Édom minwiinzan blɛn va, a fele a lɛ we gi léé: I bwe Izraɛl léma: Nyané faa lé ko a ble, bé gi dɔɔ.

¹⁵ Ko tranu go Éjipiti tɛrɛ la, yé ko mɔn ana. Naa, Éjipiti munu nyané pa ko valé ko tranu ta.

¹⁶ Ko siaa Gakelebale lɛ, yé é ko dére ’ma. É lanje do pa ko lɛ zia, yé ’bɛ ko si Éjipiti tɛrɛ la. Yé bé ye, ko bɔ Kadɛs, ilé tɛrɛ glɛ la.

¹⁷ ’I zi nɔ ko lɛ yé ko gié ilé tɛrɛ la. Ko ’ka dan gié lɛ kalé féinu koo, kalé dɔrɔféinu koo, wona lo, yé ko ’ka dan kalé ’yiguru gi ’yinu mini lɛ lo; ko dan gié lɛ gbéin ta tegele; ko ’ka dan nɔla lɛ ko bɛyila valé ko bɛbola lo, fɔɔ yé ko ilé tɛrɛ glɛ kini.

¹⁸ Édom lé a lɛ léé: I ’ka dan gié lɛ an va monomono lo. Dé ’bɛ kaan lo, ko dan kee lɛ i nya gwɔun nya ko lee.

¹⁹ Izraɛlnu lé a lɛ léé: Ko dan gié lɛ gbéin ta; yé dé ko ilé ’yinu mini, maa valé anlé trubɛnu nya, maa dan a banwo lɛ i lɛ; an dan gié lɛ an gane ta é pla, we bɛ kaan lo.

²⁰ É a zi pa léé: I ’ka dan gié lɛ lo. Yé Édom go zi dɔ lɛ wo ’lɛ mi kiɛre nya é va, ’élé plɛplɛ tagɔɔnle nya.

²¹ ’Bɛ zo lé Édom Izraɛlnu giéle ’élé tɛrɛ la yi ga. Yé Izraɛlnu paa a ma.

Arɔn gale

²² Izraɛlnu faa si Kadɛs, yé wo bɔ Ori gɔ ma.

²³ Wa bléyian va Ori gɔ vazia, Edom lé tɛrɛ glɛ ma é pu, Gakelebale lé Moizi valé Arɔn lɛ léé,

²⁴ wo dan go lɛ Arɔn nya élé munu va. Ka kɛlɛ tɔnégiplɛplɛzannu nya anlé bélidɔwe ma Mériba ’yinu va, amalé Arɔn ’ka dan zun lɛ tɛrɛ lé maa a nɔ Izraɛlnu lɛ, a ta lo.

²⁵ ’I Arɔn valé é be Éléazaa si, yé ’i go wo nya Ori gɔ nwiin.

²⁶ ’I Arɔn lé varɔnu si é ta, yé bé zén a be Éléazaa ta. Fɛkona lé maa dan Arɔn si lɛ yé ’é ga.

²⁷ Gakelebale dérean fe Moizi lɛ, Moizi a kɛlɛ a yɛrama. Wo go Ori gɔ nwiin munu faa yuɛ va.

²⁸ Moizi Arɔn lé varɔnu si Arɔn ta, yé é wo zén a be Éléazaa ta. Ana lé Arɔn ga, gɔ nwiin. Moizi valé Éléazaa gɔ zun.

²⁹ Munu faa a ye léé, Arɔn lɛ bo, yé Izraɛlnu lé kɔngimunu faa a wuvɔ yi yɔ do wɔlɛ vu.