2 Tɛsalɔnik munu 3 - Kazambale lé Sebe Sauunu 1979

’Ka bazoro ko tɔ ma

¹ Yé sin, bwenu, ’ka bazoro ko tɔ ma léé, Mizambale dére ’é nwɛɛn fɛfaana yé ’wa nyi si é zima bélé fɛan zo lé ka a nyi si é zima, a zo ma,

² yé ko si tavozannu valé mi lɛrɛlɛrɛnu lee, naa, mi faa bli ’ka é pale lo.

³ Mizambale a yarapawelazan nya, é dan ka dɔ lɛ gligli, yé é dan ka ta kuun lɛ Satan lee.

⁴ Ko bli a Mizambale lɛ kalé we ma, léé, wenu lé ko wo pla ka lɛ, ka a wo kɛlɛna, yé ka dan wo kɛlɛ lɛ.

⁵ Yé Mizan ’é go ka nya Kazambale lé sɔlɛle va, é valé Krist lé bli tiéé va ma.

É a lé mi faa é nyanama pa

⁶ Bwenu, ko we plaan ka lɛ Kaazan Jézu Krist tɔ nya léé, Krétiɛn faa lé wolé tawobɛ ke é vɔɔle, ’té wo ’ka tawoo kolé wepaale yɛrama lo, ’ka kini wo nya ékema.

⁷ Fɛan zo lé é a lé ka kɛlɛ ko zuosonazannu nya, ka ’bɛ gi dɔɔ. Naa, ko ’ka we vɔɔle kɛlɛ lɛ ka va lo;

⁸ ko ’ka mi do kpen lé fɛ ble lɛ é pla lo, ko lɔa é wo; naa, tu valé é kinile ma, ko nyanama paan, ’té ko nyané blé, té ko kɛlɛ mi do kpen nwiin kɔné nya lo we ma.

⁹ Ka leefɛ blele se a ko lɛ, naa, é sɔ ko lɛ léé, ko kɛlɛ kalé wekɛlɛmazannu nya, yé ka we kɛlɛ kolé we ma.

¹⁰ Bléyian va lé ko a ka va, ko lé ka lɛ léé, dé é ’ka sɔ lɛ mianzan lɛ léé, é nyanama pa lo, té é fɛ ble lo.

¹¹ Ko a ’ma léé, ka va mi kenu a kun‐anwona; wo ’ka ’wobo lé nyanama paan lo, ’té woo giéan ’wo ’wuo wɔrale nya mi bɛnu lé we gi.

¹² Ko we plaan ’bɛ zoɛ munu faa lɛ, ’té ko wo tunuan Mizan Jézu Krist tɔ nya léé, ’wobo kun, ’wo nyanama pa yifaama, yé ’wobo lé fɛ ble.

¹³ ’Kaa bwenu, té ka wɔlɛgi é nyaan ka ma wezin kɛlɛle nya lo.

¹⁴ We lé ko fé sɛbɛ ’ko la, dé mianzan ’ka a lɛdɔama lo, ’ka bɛ zun ’bɛzan ma, té ka nana a va lo, ’bɛzan gyɛle yara nya we ma.

¹⁵ Naa, té ka a ye bélé ka nyanézan zo lo; ’ka we pla a lɛ bélé ka bwe zo.

Wo drɔɔ vole

¹⁶ Mizan, mivodrɔɔzan bozen, ’é ka vo drɔɔ bléyi faa ma, bɛ faa ma. Mizan ’é kɛlɛ ka faa va ma.

¹⁷ Weale ’ko, maa Pɔl ɛ gyɛ anbozen bɛ nya. Yee ɛ ke anlé sɛbɛ faa lé tɔmase nya. Maa a gyɛ ’ko zo: PƆL.

¹⁸ Kaazan Jézu Krist lé zin ’é kɛlɛ ka faa va ma.