2 Minwiinmunu lé Wezuofe Sɛbɛ 7 - Kazambale lé Sebe Sauunu 1979

Bale é banfɛ ble yé é bɔra Salomɔn va

¹ Salomɔn nyaa aan wo bazorole nya, kyɛ si la gi yé balebanwi lé wa kyɛ blé, yee valé sarakanu, é wo kyɛ ble. Yé kɔn fan Gakelebale lé fuasan nya.

² Balebanzannu ’ka bɔa wɔrale lɛ Gakelebale lé kɔn gi lo; Gakelebale lé fuasan élé kɔn fan, azama.

³ Izraɛl munu faa kyɛ valé Gakelebale lé fuasan ye aan wo zunna kɔn ta, wo yara bua tɛrɛ va gɔrɔ gi, yé wo bua ’wo bli la, yé wo Gakelebale tɔ bɔ yé wo léé: Naa, é a é zin, yé a nyanai éé zén‐é yifaama.

⁴ Minwiinzan blɛn valé Izraɛlnu faa sarakanu bo Gakelebale ’lɛ.

⁵ Diri baa vu ta do valé ’bla baa yɔ yaa, minwiinzan Salomɔn Gakelebale ban wo nya. ’Bɛ zo lé minwiinzan blɛn valé élé munu faa kɔn pa é yɛrama Bale zé nya.

⁶ Balebanzannu dɔ ’wo dɔna; Lévinu é ziin, wo dɔ ana, ’té lɛrɛvɔafɛnu lé David a kɛlɛ Gakelebale tɔ bɔle we ma, a tɔ zin fele we gi bɛ, ’té wa Lévinu lee. Naa, David a fe wo lɛ léé, ’wo Gakelebale tɔ nwa a fele nya léé: Naa, a nyanai éé zén‐é yifaama. Balebanzannu dɔ ’bɛnu yara, ’té woo bélinu fɛɛn. ’Té Izraɛlnu faa ana.

⁷ Salomɔn Gakelebale kɔn ’léé gɔrɔ méléna pa é yɛrama, balebanwi lé wa kyɛ blé koo, bɔvɔ sarakanu lé wi nyɔnɔnu koo, é a nɔ Bale lɛ ’bɛna. Balebanna lé Salomɔn a kɛlɛ zéné nya, é a kiéné balebanwinu lé wa kyɛ blé koo, bɔvɔ sarakanu koo, wi nyɔnɔnu koo, wo ma, azama.

⁸ ’Bɛ bléyi va, Salomɔn valé Izraɛlnu faa fɛti kɛlɛ yi sɔrafié wuo. Mi gu blɛn lé wo si Amat zi fɔɔ Éjipiti lé ’yiyoro vazia, wo zén ékeva.

⁹ A yi sɔraazan nya wo zénle ékeva blɛn do kɛlɛ. Naa, wo we kɛlɛ balebanna pale é yɛrama we ma yi sɔrafié, yé wo fɛti kɛlɛ yi sɔrafié wuo é ziin.

¹⁰ A moné sɔrafié lé yi yɔ do wɔlɛ yaazan nya, Salomɔn munu pa zia léé, ’wo go ’wolé kɔn ’léé. Wo go gi nanale valé bli drɔɔ nya, wezin lé Gakelebale a kɛlɛ David koo, Salomɔn koo, alé munu Izraɛl koo, wo lɛ, alé we ma.

¹¹ Salomɔn nyaa aan wo Gakelebale lé kɔn valé minwiinzan blɛn lé kɔn dɔle nya, yé wenu lé wo ke a bli gi léé, ’é a kɛlɛ Gakelebale lé kɔn valé minwiinzan blɛn lé kɔn lé we ma, ’bɛ faa lɛ sɔɔ aan wo,

¹² Gakelebale bɔra Salomɔn va é béli, yé é lé a lɛ léé: Maa ilé bazoro dére ’ma, yé maa fɛkona si a va léé, ’wo saraka bo ana an lɛ.

¹³ Dé maa la lɛ tan, ’té lɛɛ ’ka dan lo, dé maa fe gangannu lɛ léé, ’wo ’wii tɛrɛ ta, dé maa bawurumagyɛ pa zia anlé munu va,

¹⁴ anlé munu lé an tɔ ke wo ma, dé wo wobo kɛlɛ kiéné yé wo bazoro yé wo an nagini, yé dé wo si ’wo kɛlɛwe naanénu zuo, maa dan wolé bazoro dére ’ma lɛ lanu gi, maa dan wo ma we vo lɛ wolé wenyanénu ma, yé maa dan wolé tɛrɛ dɔ lɛ é dɔbɛ gi.

¹⁵ Sin, an yuɛ é dan vo lɛ é fuole, yé an dan an tɔné dɔ lɛ ba lé wa zoroan fɛkona, a lɛ.

¹⁶ Sin, an kɔn ’ko si a va yé maa a pa é yɛrama léé, an tɔ ’é kɛlɛ ana yifaama, yé an yuɛ valé an bli é dan kɛlɛ lɛ ana lɛɛfaama.

¹⁷ Yé bii, dé i tawo an yara, i ti David tawo fɛan zo, a zo, ’té we faa lé maa a fé i lɛ, ’té bé kɛla, dé i tawo an sɔnnénu valé an déretawenu yɛrama,

¹⁸ maa dan izé plale mi nwiin dɔ lɛ gligli, maa fe i ti David lɛ fɛan zo, a zo, léé, é ’ka dan vuru lɛ é paizan nyanale ma Izraɛl lé webleblin ta monomono lo.

¹⁹ Naa, dé ka yara si a kɛlɛle ta, dé ka sɔn vɔ anlé bélidɔwenu valé an sɔnnénu lé maa fe ka lɛ, wo ma, yé dé ka go bale bɛnu bɔ lɛ yé ka dia ka bli la wo ’lɛ,

²⁰ maa dan ka si lɛ anlé tɛrɛ lé maa a nɔ ka lɛ, a ta, yé kɔn ’ko lé maa a pa é yɛrama an tɔ gi, maa dan a si lɛ an yuɛ gi, yé maa dan a kɛlɛ lɛ yérisiémafɛ valé gɔnévɔmafɛ nya bɛnnu faa va.

²¹ Kɔn ’ko a é dɔle gɔ nwiin fɛan zo bɛ, dé mi a giéna a sɔnɔ a gi é dan vuru lɛ a ma yé é dan a fe lɛ léé, mɛmalé Gakelebale we kɛlɛ tɛrɛ ’ko valé kɔn ’ko lɛ a zoo?

²² Yé wo dan a zi pa lɛ a lɛ léé: Gakelebale, wo tranu lé Bale lé é wo si Éjipiti tɛrɛ la, wo sɔn vɔ a ma yé wo wobo yere bale bɛnu ma, yé wo dia ’wo bli la ’bɛnu ’lɛ yé wo ’bɛnu bɔ, amalé. Bɛwemalé Gakelebale we tɔntɔn ’konu faa bɔ wo ma bɛ.