2 Minwiinmunu lé Wezuofe Sɛbɛ 6 - Kazambale lé Sebe Sauunu 1979

Salomɔn we fe munu lɛ

¹ Yé Salomɔn léé: Gakelebale léé, ’éé nyanaan gunutinu va.

² Yé maa, maa i nyanagikɔn dɔ; é a fɛ lé i dan nyana lɛ ana lɛɛfaama, a glɛ ’ka lo, a nya.

³ Minwiinzan blɛn nɔla, yé é yara dɔ Izraɛl munu lé wo ke é zénle ékeva, wo ta, yé é wo drɔɔ vo, ’té wo faa a é dɔle loru.

⁴ Yé é léé: Gakelebale, Izraɛl lé Bale lé é we fe an ti David lɛ ébo ’léé, yé we lé é a fe é a lɛ sɔɔ élé plɛplɛ nya, ’wa drɔɔ vo ma. É léma:

⁵ É sia yian nya lé maa anlé munu Izraɛl si Éjipiti tɛrɛ la fɔɔ kyɔ, maa ’ka fla do si lɛ a va Izraɛl bɛngɔnɔnu faa va, léé, ’wo kɔn dɔ ana an tɔ nya lo, yé an ’ka mi do si lɛ a va léé, ’é kɛlɛ anlé munu Izraɛl nwiinzan nya lo;

⁶ naa, maa Jérusalɛm si a va léé, an tɔ ’é kɛlɛ ana, yé an David si a va léé, ’é pla anlé munu Izraɛl nwiin.

⁷ É a an ti David gi léé, ’é kɔn dɔa Gakelebale, Izraɛl lé Bale tɔ nya.

⁸ Yé Gakelebale lé an ti David lɛ léé: É a i gi fɛan zo léé, ’é kɔn dɔa an tɔ nya bɛ, we zin lé.

⁹ Naa, biian, i dan kɔn ’ko dɔ lɛ lo; i be lé i dan a yaa lɛ, yee ɛ dan kɔn ’ko dɔ lɛ an tɔ nya.

¹⁰ Gakelebale dérean fe, é a lɛ sɔɔ. Maa nwa an ti David pa gi, yé an nyana Izraɛl minwiinzan blɛn lé blin ta, Gakelebale a fe fɛan zo, a zo, yé an kɔn ’ko dɔ Gakelebale Izraɛl lé Bale tɔ nya.

¹¹ Gakelebale lé gipawe lé é a kɛlɛ Izraɛl munu va, maa a pagikɛsu dɔra ana.

Salomɔn bazoro

¹² Salomɔn dɔ Gakelebale banna ’lɛ, Izraɛl munu lé wo ke é zénle ékeva, wo yara, yé é bɛ soi.

¹³ Salomɔn dɔlafɛ kɛlɛ zéné nya, yé é a dɔ gɔrɔ méléna. A sangi kɛlɛ mɛtrɛ fié é buu; a ’wuola kɛlɛ mɛtrɛ fié é buu, yé a wuo nwale kɛlɛ mɛtrɛ do é buu. É dɔ a ta yé é powuo zun a ta, Izraɛl munu lé wo ke é zénle ékeva ’bɛna, wo faa yuɛ va, yé é bɛ soi lagi zia.

¹⁴ Yé é léma: Oo Gakelebale, Izraɛl lé Bale, dé é a lagi nyaoo, dé é a tɛrɛ la nyaoo, i danmabale ’ka wona lo. I wuozannu lé woo tawoo i ’lɛ ’wo bli faa nya, i gipawe lɛ sɔɔan wo lɛ yé i nyanai éé zén‐é wo ta.

¹⁵ Blivolɛdére lé bé fe an ti, i leezan David lɛ, bé tawe kɛlɛ, yé we lé bé fe i ’léé, bé lɛ sɔɔ kyɔ ilé plɛplɛ nya.

¹⁶ Sin, Gakelebale, Izraɛl lé Bale, blivolɛderé lé bé fe an ti David lɛ, ’bé tawe kɛlɛ ma. I lé a lɛ léé, é ’ka dan vuru lɛ é paizan nyanale ma Izraɛl nwiinzan blɛn lé webleblin ta ’é ’lɛ lo, ’té dé a benu é yuɛ pa wo giégane va yé wo tawo ’é ’lɛ ’élé bélidɔwe yɛrama, éé tawoo ’é ’lɛ bɛan zo, a zo. A zo lé bé fe.

¹⁷ Gakelebale, Izraɛl lé Bale, blivolɛdére lé bé fe i leezan David lɛ, ’i a tawe kɛlɛ ma.

¹⁸ Ii! Bale é dan nyana lɛ munu va tɛrɛ la webozen nyaa? Bé ye, i ’ka sɔa lanu valé la zi lanu gi lo ’naan, kɔn lé maa a dɔ ’ko, i dan sɔ lɛ ’bɛ gii?

¹⁹ Naa, Gakelebale, anlé Bale, ’i tɔné dɔ duowo i leezan lé bazoro dére valé alé zantévɔdére lɛ; siaale valé ba lé i leezan a zorona i lɛ, ’bé ’ma ma.

²⁰ Kɔn ’ko, fɛna lé bé ma we fe léé, ana lé ’é tɔ é dan kɛlɛ lɛ, i yuɛ ’é vo é fuole a va bladi nyanadi ma. Ba lé i leezan a zorona fɛkona, ’i tɔné dɔ a lɛ ma.

²¹ Dé i leezan valé ilé munu Izraɛl bazoro fɛkona, ’i tua yé ’i wolé zantévɔdére ’ma ma. ’Bé ’ma i nyanana lanu gi loru, ’be ’ma yé ’i wo ma we vo ma.

²² Dé mi do wenyané kɛlɛ é bɔluzan ma, yé dé wa fe léé, ’é bale ’nyɔɔn, dé é da bale ’nyɔɔn lɛ i banna ’lɛ kɔn ’ko gi,

²³ ’i tɔné dɔ lanu gi, ’i we kɛlɛ; ’i i leezannu lé we ble; ’i wegyɛzan gyɛ we nya, yé ’i ’bɛzan kɛlɛwe dɔ ébo nwiin; ’i weanwiinlozan zé kɛlɛ néné, yé ’i we kɛlɛ a lɛ alé we néné yɛrama.

²⁴ Dé ilé munu Izraɛl wenyané kɛlɛ i ma yé wo nyanézannu wo kele ’bɛ we ma, dé wo nɔla i va i tɔ bɔle nya, dé wo bazoro yé wo zanté vɔ i ma kɔn ’ko gi,

²⁵ ’bé ’ma lanu gi ma, ’i ilé munu Izraɛl ma we vo ma, yé ’i da wo nya é ziin tɛrɛ lé bé nɔ wo valé ’wo tranu lɛ, a ta ma.

²⁶ Dé la lɛ a é tanle yé lɛɛ ’ka dan lo, wolé wenyané lé wa kɛlɛ i ma, a we ma, dé wo bazoro fɛkona yé wo i tɔ bɔ, yé dé wo yara si ’wolé wenyané kɛlɛle ta, ilé we lɛdɔle wo gi we ma,

²⁷ ’bé ’ma lanu gi ma, ’i wuozannu valé ilé munu Izraɛl ma we vo ma. Zi zima lé é a lé wo a ta tawo, bé gɔɔn wo lɛ ma; yé ’i lɛɛ da, tɛrɛ lé bé nɔ ilé munu lɛ wolé tɔnɔ nya, a ta ma.

²⁸ Dé é a lɔrɔ nyaoo, dé é a mi gyɛgyɛ nyaoo, dé é a féifɛnu gyɛgyɛ nyaoo, dé é a ’pooné nyaoo, dé é a gangan gɔnɔoo gɔnɔan nyaoo, dé wo da ilé munu lé tɛrɛ la, dé ilé munu nyanézannu da wolé tɛrɛ la wolé flanu mabɛn lɛ, yé wo bɔ wolé gɔrɔ ’léé, dé bawurumawe bɔ wo ma, dé gyɛoo gyɛan é ke munu gyɛna,

²⁹ dé mi do léé, dé ilé munu Izraɛl faa léé, dé wo bazoro yé wo zanté vɔ i lɛ, yé wo faa va mi do do ébo lé we naané valé élé we tɔntɔn dɔɔ yé é bɛ soi kɔn ’ko vazia,

³⁰ ’bé ’ma i nyanana lanu gi ma, yé ’i wo ma we vo ma; bii lé, i wo faa gibli dɔɔ, ’i we kɛlɛ wo lɛ wo giébɛ yɛrama ma, naa, bii do kpen ɛ blaminu gibli dɔɔ.

³¹ Yé wo dan kana lɛ i lee, tawole ilé zinu ta we ma, bléyi lé wo nyana, tɛrɛ lé bé nɔ ko tranu lɛ, a ta, ’bɛ bléyi faa va.

³² Bɛn lé é ’ka ilé munu Izraɛl bɛn nya lo, dé é si tɛrɛ baa ta i tɔ blɛn koo, i bɛ plɛplɛ koo, i bɛ soile koo, wolé we ma, dé é da bazoro lɛ kɔn ’ko gi,

³³ ’bé ’ma lanu gi, i nyanana, yé we faa lé bɛn ’ko a laa i lee, bé nɔ a lɛ ma, léé, tɛrɛla bɛnnu faa i tɔ dɔɔ kanale i lee we ma, bélé ilé munu Izraɛl zo, yé wa gi dɔɔ léé, munu éé i tɔ laan, kɔn ’ko lé maa a dɔ, a gi.

³⁴ Dé ilé munu bɔra gulidanle ’wo nyanézannu va we gi, ’té wo go fɛana lé bé gɔɔn wo lɛ, ana, dé wo bazoro i lɛ, ’té wo yara a é dɔle fla ’ko lé bé si a va, a vazia, yee valé kɔn lé maa a dɔ i tɔ nya, a vazia,

³⁵ ’i wolé bazoro dére valé zantévɔdérenu ’ma la gi ma, yé ’i we tegele kɛlɛ wo lɛ ma.

³⁶ Dé wo wenyané kɛlɛ i ma, naa, mi lé é ’ka wenyané kɛla lo, ’bɛzan ’ka lo; dé i bli fli wo ma yé i wo pa wo nyanézannu lee, yé wo go wo nya luu gi ’wolé tɛrɛ la, dé tɛrɛ baa léé, dé tɛrɛ pu léé,

³⁷ dé wo ’wuo dɔ wo ta é ziin wolé luutɛrɛ la, dé wo da i va é ziin yé wo zanté vɔ i lɛ wolé luutɛrɛ la, yé dé wa fe léé: Ko wenyané kɛlɛ; ko weple kɛlɛ, ko wenaané kɛlɛ;

³⁸ dé wo da i va é ziin ’wo bli faa valé ’wo boen faa nya, wo nyanézannu lé wo wo kɛlɛ luu nya bɛ, ’bɛnu lé tɛrɛ la, dé wo bazoro, ’té wo yara a é dɔle wolé tɛrɛ lé bé nɔ wo tranu lɛ, a vazia, yee valé fla ’ko lé bé si a va, yee valé kɔn lé maa a dɔ i tɔ nya, a vazia,

³⁹ ’i wolé bazorodérenu valé wolé zantévɔdérenu ’ma lanu gi, i nyanana, yé ’i we tegele kɛlɛ wo lɛ ma; wenyanénu lé ilé munu a kɛlɛ i ma, ’i wo ma we vo ma.

⁴⁰ Sin, anzé Baleoo Bale, i yuɛnu ’é vo é fuole yé ’i tɔné dɔ ba lé wa zoro fɛkona, a lɛ.

⁴¹ Sin, Gakelebale, ’i nwa, ’i da i flinna, bii valé i tɔbɔma kɛsu nya. Bale, Gakelebale, sile we gi ’é kɛlɛ i banzannu ta bélé varɔ zo, yé i sɔlɛzannu gi é nana wezin yele we ma.

⁴² Bale, Gakelebale, té i yara si mi lé wo nyɔnɔ zén a nwiin, a ta lo. Zin lé bé kɛlɛ i leezan David lɛ, a sele ’é dɔ i gi ma.